Cultura

Pamodi stória di nos bida ka ta kaba

ki nu ta kaminha sen izitason

ta obi oráku⊡ta bota dibinha

ta fla-nu ma angústia tanbe e marka

                                                   d’omi

nos ki ben desdi tenpu d’arka

ki nu sai nu benze ⊡ nu toma txon

nu simia midju i nu planta vinha

nu xinti friu i nu pasa fomi

nu rola na téra kaba nu laba

nu move pa nasenti ta djobe agu

nu dixi pa laxidu pa nu mata sedi

nu papia ku bentu nu fla-l ma nu ka bagu

nu kanba na mar nu stende nos redi

i si oxi di nos boka ka sta sai simenti

di éxitu  ⊡ e pamodi tenpu inda sta mufinu

i nébua ku serason sta tadja-nu na kaminhu

i puera na orizonti sta tapa-nu distinu

o sta instala na nos spritu so anbison daninhu

ki ta intoronpe nos divuson di krenti

mas nos spritu ael el ta ama universalidadi

pa tenpu txeu ⊡ tudu tenpu ⊡ tenpu inditirminadu

ti tenpu ki tenpu ta torna-nu tudu finadu

lenbrandu senpri ma nu foi fidju di sidadi

ma nu karega pedra pa si alisersi

purisu nu ka ta seta renu di nhu lobu

ki kre korta-nu nos orguliu sersi

ku medu k’es ta planta n’alma di pobu

mas nu sabe ma diferensa sta na tenperansa

ma forsa sta na serteza di djustisa di vingansa

ki anos nos brasu ka ta dobra ⊡ ka ta kansa

anos nos perna konxe konpasu di tudu dansa

mundu ta kaba ⊡ tenpu ta disparse

mas inda asi nos spritu ta tarse

son di grandesa pa riba di rivirensia

nomi di nos rasa ⊡ selu di nos indipendensia

k’e marka más grandi di jenerozidadi

di kes ki luta i more pa spritu ka matadu

mas disprezu pa kes ki ku boka raganhadu

kre mata alma ⊡ kre ntera dignidadi [di sidadi]

dentu di ses bolsu fundu i ses bandoba

largu ⊡ baxu ses pekadu tudu muntiadu

pekadu ki ka ta kaba pa más nu koba

pekadu di ngana ⊡ mata ⊡ toma ⊡ roba

sima un tara ki pa el kura ka [ta] atxadu

vive livri e prinsipal dizígniu d’omi

e selu postu antis d’el poi pe na txon

nos mison e sinplis ⊡ e fla-l ma si nomi

e sima un dogma pa uzu di tudu jerason

pa obidu ki konxe grandeza di disizon

ma si el more e p’el torna rususita

ku si sangi batizadu la djulangi

ku si folgu ki konxe trubuku grandi

ki ka ta inpidi-l d’el djata i di el grita

pa txada ⊡ ladera⊡ kutelu ⊡ matu fora

pa rubera ⊡ fonti ⊡ undi ki nos boka ta modja

i odju k’e ka segu tanbe ta odja

ma kurupson sta fase nos alma txora

sen sabe undi k’el al deta ⊡ o el al mora

purisu oxi e tenpu di labanta ku po

na mo ⊡ tenpu di tinji mar di verdadi

pamodi ael el debe ser alisersi di tudu

                                                         sidadi

na tenpu txuba ⊡ o tenpu seka ⊡ na natal

                                                i na entrudu

nos ki odja sedu sinaladu si sinal

nos ku el nu sta skotxadu na kel un no

purisu nu linpa odju di puera di mintira

nu volta nos spritu pa séu di dignidadi

ma si nu sufri pamodi nu fla verdadi

nen un vírgula nu ka ta muda ⊡ nu ka ta ritira

nu ka ta tra ⊡ nu ka ta sukundi ⊡ pamodi e verdadi

i ku nos spritu ki nada el ka debe umildadi

nu ta fla inda más altu ku alma dja tenpra

dipos nu ta fitxa odju nu ta suspira oki nu lenbra

ma nu mante tudu lobu baxu mira

p’es sabe ma brevidadi di bida

e ka nbipu pa koraji ⊡ k’e nos midida

mas e un kunbidu ⊡ un akrésimu

pa bai ti raís ⊡ ti radikal ⊡ k’e si étimu

ki ta fla-nu ma tuntunhimentu

o anbiguidadi e ka si préstimu

mas ma sofregidon e si simentu

purisu nu ta prufesa umanismu radikal

dianti di tudu pirkalsu i di forsa di mal

ael e frutu fundu di nos riflekson

simenti di nos afirmadu disizon

ki ta lastra sima txuba na si stason

sima simentera ⊡ ki kontudu e labor di anu interu

nu simia-l dja tenpu ⊡ desdi altu kutelu dixi tereru

sabendu senpri ma strela riba la k’e nos txon

i kel li basta pa nos spritu ka tuntunhi

pamodi e un milagri tantu sofregidon

nun tenpu ki verdadi si iriverensia ta unhidu

ta fladu m’el ka ten lugar más nes txon

i nton nu ta purgunta ⊡  kal k’é nos mison?

e ka fla omi ma el e donu di si distinu?

p’el ka bende si bida pa pon riku o mufinu

p’el stika p’el djobe so kaminhu di strela

i ma si dúvida tormenta-l p’el ka izita

anju di liberdadi ta da-l lus na mei di kerela

spritu di dignidadi senpri ta djuda-l grita

primazia di djustisa ⊡ si rastu sima un strela

di juliu nos maior ourguliu ti janeru

di nos rinasimentu ⊡ ku tudu alaridu pa téra interu

obi iternidadi des juramentu sen rapendimentu

na tenpu ki razon di dignidadi e nos alimentu

txeu bes forsa nen pa pega na maxin

mas ku fervor ki ta aparta medu

ora ki nos bida tranzitóriu txiga fin

tenpu’l riba tenpu nu ka ta skesedu

pamodi nu fase nos palavra meiu i fin

nu labanta palmanhan sedu ⊡  i sakedu

nu djobe infinitu ⊡ nu fla «e la k’e nos kaza»

nu aparta sinza friu ⊡ nu spadja braza

nu ka da medu nen un padás di dedu

di nos spritu konkistadu na dia grandi

purisu nu ka ta kunpradu ⊡ nu ka ta bendedu

pamodi nu ka ta poi presu na nos sangi

gosi gosi sin dja nu tirmina

pamodi dja nu fla dja nu skrebe

                                       dja nu sina

(sabendu m’e kel ki nu da ki nu ta resebe)

ma sal di dignidadi ma ael e oru

i nos k’e verdadi ku nos nomi koru

nu ben pa nu ben planta es signu

sima un fatalidadi ki ka ta kurijidu

pamodi e digrau o dizígniu

ki ta torna-nu dignu

kel li pa pirmanese tenpu riba’l tenpu

sima stribuilin ⊡ o sentensa di bentu

ta buska fundura fértil di bu obidu

p’el fla-bu pa kuze ki bo omi bu paridu