Cultura

Senpri

Nos lingua maternu

Sen el, nada nu ka tenba

Nen nu ka era nada

Nos Lingua e nos kultura

Nos kultura e nos lingua

Nos mimoria di povu skravizadu

Na forsa di batuku

Na briu di funana

Na djatu rinkadu

Dentu petu sufridu di nos rotxa

Mas ki ka ta obidu

Pabia skravu ka ten vos

Nos kultura

Ta ferbi dentu mi

Sima katxupa na lumi brandu

Di lenha di spinhu katxupa

Ki rinkadu di lugar

Pa simentera podi ten

Azagua e sertu

Si nu ramonda

Lugar modjadu más ki si

Ka podi ten

Ami e rapasinhu di Praia

Ku rais finkadu la Fora

Sangi Ferera ka brinkadera

Nha bilheti di identidadi e ka nha identidadi

Nha eransa e istoria di nos povu

Ma e ka podu na dukumentu

E ka lagua pa N txora

E ka dor pa N sufri

E txon di tudu Berdianu

Pa N finka pe, ku bida

Y nteradu nha kaxon, dia ki N mori

Sen batuku na tereru

O funana na jira-disku

Di kenha ki ten

Pabia mortu e pa ntera ku diginidadi

Nha povu

Di tudu ki nu pasa

Nu meresi vivi na nos tera

Sonhu di Indipendensia si perdi

Dja nu perdi tudu nos identidadi