Cultura

Nhu Sior di Mundu

Na grandeza Di-nho

Nhu pega-m nha mo

Nhu dexa-m kontinua ta sunha

Ku rotxa y rubera di Piku

Ku kastanhu y berdi d'es munisipiu

Senpri na nha mimoria

Pa N dixi na Txada Grexa

Pa N toma benson na Txada Liton

Di mo di nha tiu Nene

Ki ben di Purtugal

Dipos di anus emigradu

Pa N para na Burbur

Inbrasa rixu nha tiu Lópi

Sortiadu ki skapa di distinu di Santumé

Pa N xinti txeru erba doxi

Na meiu di pe di kongu berdi

Na kaminhu kaza nhas busdonu

Pa N mata sodadi Nhanhan ku Puxin

Nhas busdonu, la Fundura

Kau ian na fin di tardi

Nen lus ka ten, so lua na seu

Ta noti, nu ta reza

Deta sedu, nu ta korda sedu

Ku txeru tera fresku

Y di kafe ta ferbi na kintal di pedra

Tudu fika na nha odju y mimoria di mininu