Cultura

Undi ta tirmina nhos kaminhada konpletu la nhos t’atxa

porton di nhos distinu  i mudjeris otu ta labora sen para

ku pezu di tudu perplekisidadi riba kosta sima un tara                 

mas undi ki iniskesível sol di maravilia ta sai ta rakatxa

à mudjeris (di nobu di pedra i di po  di taxu i di balai)

à nhos ki e trisadu firmi na balenteza sen tenpu di kai

ki nu ta djobe tran pa nhos rostu i tudu e tal visisitudi

ki inda kaídu nu ta txoma pa nu odja si nhos pode kudi

à nhos ki ten tantu  tantu rostu  i tudu es e un prumesa

ma si bida e un puzzle intrinkadu kontudu pesa pa pesa

nhos ta fika ta sabe ma tudu lugar di sunha ma la tanbe e

lugar di trisa  i nes selebradu ikivalensia ta vive nhos fe

i pamodi anos oxi e numiadu bon pastor di tudu spritu

pa es sentensa ku si sinatura firmi  p’el fika ditu i skritu

p’el spadja nisisariamenti sima bon lumi na obidu stória

o sima un saga ta trepa di puera txon ti portal di gulória

ka ten midjor karni pa nu simia sinal di nos otentisidadi

ki la undi ki ka ta skesedu mamantason baxu di tudu tru-

bulason  purisu e dianti d’ansiedadi di tantu mes d’otubru

ki nos divuson ta karaga-nhos ti txiga porton di iternidadi

npos ka ten frakeza  frajilidadi  o otu nomi pa nhos keda

pamodi tudu e sofregidon dianti di izitason o dizusperu

i pamodi nada e ka más grandi ki nhos padisimentu interu

ki na ora di nhos bai pa senpri tudu téra áspri ta bira seda

purisu e na kes ramu más aitu ki nu ta prinda nhos nomi

i nu ta finka duedju dianti des pa le nhos fetus imimorial

i pa kualker midida ki nu al midi-s es ta pasa skala di rial

sikre inda ku tal lenbransa di divastason o di grandi fomi

i pa nu paga spesura di disirnimentu (ki e nhos apanájiu)

nada más nu ka ten sinon murgudja nos dos odju modjadu

na agu di tudu rubera di mundu undi ki nu konxe nofrájiu

pa nu fla ku forsa ki resta-nu ma si vastu e oror di pasadu

kontudu tudu inda e polpa poku pa intxi nhos seron  pamodi

aima lebi ta pidi rumor di tudu ki foi bida  sen rapendimentu

ta spera grandi vatisíniu  ki tenpu e di simia gran ki nu pode

pa gulória di nhos nomi  ó mudjeris sakedu riba kosta tenpu