• Praia
  • 29℃ Praia, Cabo Verde
Miditason sobri país di bazaltu
Cultura

Miditason sobri país di bazaltu

5 di juliu, nos dia más grandi

O meu país é o que o mar não quer 

                                          Ruy Belo

 

É di serteza dor di kada dia

ki ta faze pezu d'omi riba téra

ki ta faze-l irmon di lumi i nubris

                             [ki ta mexe

sen kudadu

ki sina runhu ta ditirmina

 

ó kenha ki pode flaba ku odju

postu riba pasadu ku futuru

n ten tamanhu di kel ki n vive

pa n kontinua ta txiga-m

kes mô kes pé i kes odju li

 

pa kes algen ki ta spadja

riba txon di bida

n ten sô kes pobri palavras li

é poku mutu poku

mas é na es ki n ta vive trankadu

 

ku ses feru i ses fiu

i si n ka sta nganadu sertus purfumu

ki gentis bibu di nha país ta dexa

na ta anda ta subi através di bida

naturalmenti

sima kenha ki ta da bondia

 

ô na fin di rua

ta fase un pobri dizenhu ku jis

riba di bazaltu sukuru

ka nhos purgunta-m n ka sabe

                       [kuzé k'el ta fla

mas ku dosura altivu

n ta transpo-l di un saltu

sima algen ta kruza

frontera dun otu país

 

mas é li k'é nha país

kanteru koredu ku ar di mininu

baru burmedju bazaltu pretu

pulidu

ku kuidadu di aprendís

di mansidon

ki ta kai riba des skinas

 

akontráriu di faronpa sanhadu

di kes ki stusioza i insidiozamenti

ta tisa norti kontra sul

i es ta labanta língua traisueru

sima un korimentu txoku i alusinadu

 

mas ten bafu linpu di gentis suridenti

ku mô xei di kalu i abrasu kenti

ten kes praia silensiozu

ta more na batenti di dia

mas ta planta simenti di bida

na spinha di abitanti

labantadu riba pedra di matrís

 

i ten subritudu prumesa

k'el ta rikonhese

na briliu di kanpus

entradu otubru

 

mesmu óra ki algen ta fla-l

oxi more un ómi

ki si nomi el ta txomada luiz

el ka more pamodi el krê

mas pamodi puta di morti

marka-l ku si bisetris

 

nton tristeza es atris bedja

ta badja riba di kanpu di nha país

undi ki ka ta krisi flor di lis

mas nu ta prende ser raís

baxu'l bentu vísiu velôs

ta nabega na tenpu ta djobe dizagua

 

é kel li   sin é kel li k'é nha país

pátria pikinoti

sen klázulas minusiozu

pa servidon ki n ta prumete-l

onradamenti na palavras

ka virtuozu ka iluminadu

mas ku rostu labantadu i txapéu na mô

ta salba gentis sakedu di nha país

 

 

Partilhe esta notícia