Cultura

Cultura

Mentira ta ruspetadu

• Por Redação
• 1 de Abr de 2020

Mentira e un kusa sagradu

Ki atoa ka debe kontadu

Pa kel ó ki na sériu e mestedu

Más ki verdadi na el setadu.

Óras ki un mentira e ben kontadu

Más di ki mil verdadi nel ta setadu.

Mil verdadi, mil tapóna pode lebadu

Un mentira, di gilhotina pode libradu.

Kantadu dretu pode strobadu

Ki kualker kastigu panhadu

Mas txeu verdadi si konfesadu

Ka ta inpidi di ka kondenadu.

Pamodi kenha ki konfesa se pekadu

E sta seta ma e fase kusa mariadu

Nton e ka debe fika mutu spantadu

Si e ka skapa di ka ser kastigadu.

I e debe senpri sta konsienti

Ma tudu kenha ki sai di kaminhu

Ki fika ta da so pa nosenti

Ka debe susta si e fri na spinhu.

Pa lei, ki ta konta e ka verdadi

E próva sertu ki debe mostradu.

Pa kulpa algen, tudu ta sirbi

Mas pa kondena, ten ki provadu.

Pur isu ki si fasedu kaba negadu

Ki ka parse próva pa kontrariadu

Sikré di bóka’l mai algen e pragadu

Kastigu nenhun e ka pode dadu.

Mas e ka si ki nu ten odjadu.

So pa suspeta nu ta prendedu,

Ku maldadi nu ta julgadu

I sen próva nu ta kondenadu.

Nton mentira ta ruspetadu

Si ka rokadu, e ka debe kontadu

Un bes pur anu e debe lenbradu

Pa un di Abril ka pasa dispursebedu.

• Tags
• #Sociedade
• #Emprofac
• #Covid-19
• #Máscaras