Colunista

Colunista

Tudu algen ka ta fladu "Ladron"

• Por Armindo Martins Tavares
• 22 de Ago de 2022

Pulísias prende-l, leba-l Trubunal, e mandadu Kadiâ Sibil. Na Kadiâ e atxa Pontxi la, un se patrixu. E konta-l modi ki e pasa, e fla-l ma kaba ta fladu ma pretus ki e buru. Ma Buru e inglês ki "PA PINTXA" es ta skrebe "PA PUXA".

Dasdi rapasinhu ki Girgoli tenba kabésa rixu. Na skóla e podu e nega studa, trabadju e nxinadu e nega prende. Na salbaxariâ go!.. Na kel-la bu ta kuda e tenba setimanista.

Ménbra e ranja sedu, fidju e ten bazadu. Ku 10 anu dja e ta tomaba moku, kantu bes dja e kaiba ku gata. E komesa bende padjinha ku 15 anu, ku 16 dja e sa ta fumaba e ta poba ganza. Ku 20 anu e da spidienti e kanba Oropa. E entra pa Portugal, e dixi Spanha, e subi Fransa, e kanba Inglatéra.

Na Inglatéra, un sertu diâ, e bai ku tudu buréza, temoziâ i tolobaskariâ, sen pensa minimamenti, sima ki kabésa ki e ten riba d'onbru sustedu pa piskos e so pa konpleta se skiletu pa ka fika más feiu di ki sima ael dja éra, e bai fase un asaltu na Banku. E kanba dentu Banku, e rinka Bóka-Bedju di préga e ponta un funsionária na kabésa, e tra un bólsa plástiku di dentu bolsu kazaku, saku plasti di kes grandi ki ta podu lixu na el, e longa-l funsionária, e fla-l ardigadu:

- Givi li-sin-sin, tudu moni ki bu revi na kofri. Va. Givi fepu ka fika!

Xeiu di medu, ku korpu ta treme, tudu funsionárius labanta, fika ta panha dinheru ta bai po-l dentu saku. Kantu Dja e tene saku xeiu di Libra, so di kes nóta gros, e da rinkada pa pórta pa e bai sai. Na pórta staba un plaka prindadu, skrebedu na el: "PUSH". Nton e pega pórta e poi ta puxa, e puxa, e puxa, e puxa te ki soris baza-l, intelijensia ka po-l pa e spurmenta "pintxa". Nton, gentis di Banku telefona pa Pulísia, Pulísias txiga atxa-l inda so na katikati, ta katrisa ku puxa pórta, soris ta disprinda. Pulísias pega pórta puxa pa es, Girgoli ragala odju, abri bóka, poi mo riba txada kabésa, fla:

- Eeeeee! Éra pa N pintxaba!!!

Pulísias prende-l, leba-l Trubunal, e mandadu Kadiâ Sibil. Na Kadiâ e atxa Pontxi la, un se patrixu. E konta-l modi ki e pasa, e fla-l ma kaba ta fladu ma pretus ki e buru. Ma Buru e inglês ki "PA PINTXA" es ta skrebe "PA PUXA".

Pontxi ri, da-l palmada na onbru fla-l:

- Nha armun, es tene rezon. Bo ki e buru ki ka diskubri ses truki.

- Truki?! - Girgoli purgunta-l, dimiradu. - Ses truki di kuse?

- Es skrebe PUSH dikaloti. - Girgoli ragala odju, Pontxi kontínua - Es skrebe dikaloti pamodi es sabe ma nu sta un monti burus pa li, nu ta arma en sabidu.

-Aseriu?!!!!

- I nen e ka so li na Inglatéra txaskan ki mudadu alguns nomi di kusas. Gosi, na tudu párti di mundu dja trokadu nomi di un-monti kusas.

Girgoli purgunta-l kuriozu:

- Na Kauberdi kuse ki trokadu nomi?

Pontxi djobe-l tan, rabida purgunta-l:

- Bu sabe modi ki kes maioris ladronsis, bandidus... sa ta txomadu gosi?

Girgoli rusponde kolergu:

- E ka "Ladron" ki es ta txomadu? - e ta djobe-l un bokadu. - O bu kre fla ma e Tagi ki es sa ta txomadu?

Pontxi kontínua:

- Bai txoma-s "ladron", bai!

Girgoli prezenta-l un lista di aldrabonsis ku aldrabisa ki es fase:

- Abo, kel brajeru ki troka un karu ku Pasaporti Diplomátiku... kel ki bende Bonba di Gazulina ki un-monti milion e ka ntrega... kes gentis ki poi anbienti baxu lá na Fundu... kes ki rinka fódja di livru di Rejistu Sivil, ki poi un Txada txon di algen na se nomi... N ka pode txoma-s "ladron"?

- Bai txoma. Bu ta odja si go e ka bo ki ta podu na kadia?

- Pamodi ki es ta po-m na Kadiâ ami? E mi ki da Pasaporti pa N dadu BMW?

- Midjor bu kala pa es ka purlonga-u prezon preventiva pa más di ki un anu.

- Pamodi go?

- Pamodi kazu di BMW ki trokadu ku Pasaporti inda sta na Segredu di Djustisa. Si bu bai txoma makaku bedju di "ladron", Ministru Públiku ta manda fitxa-u pamodi bu sa ta straga bon nomi di omi. Kaba abo nen bu ka ten inpunidadi parlamentar.

- Abo si un algen e "ladron", e txomadu "ladron", modi ki e sa ta stragadu se bon nomi?!

- Abri odju, mos! Bu dexa di da pa kabalu.

Girgoli pára un bokadu, fika ta pensa:

- Nton e modi ki sa ta txomadu kes más ladronsis i bandidus ki nu ten?

- Dikes más ladronsis i bandidus, gosi es ta txomadu POLÍTIKU.

Palmarexu, 22 di Agostu di 2022

Armindo Martins Tavares