• Praia
  • 29℃ Praia, Cabo Verde
Texti “PCR” kusta más di ki saláriu mínimu
Cultura

Texti “PCR” kusta más di ki saláriu mínimu

I SÉNA

Dukinha ta papia ku se pai ki sta na Suisa, pa telefoni.

DUKINHA – Papá, dja N kunpra pasaji, N ta bai diâ-dimingu li, nóvi óra di noti. Es fla-m ma N ten ki ta faze texti di PCR pa odja si N ka tene Korónaviru, sésta-fera di palmanhan.

KAPEDI [V. O.] – Ka ten probulema. N ta bai manda-u dinheru gosi li pa Uesterni union. E kantu?

DUKINHA – Fladu ma e mil-ixkudu…

KAPEDI [V. O.] – Ka ten probulema.

DUKINHA – Nhu dexa-m kaba papia, papá!

KAPEDI [V. O.] – Paké? Ka dja bu fla-m ma e mil-ixkudu? Kabuverdianu ten mau maskabu. Gosta di stika konbersu pa fla un sinplis kusa!

DUKINHA – Papá!…

KAPEDI [V. O.] – E ka mil-ixkudu?! E más o menus 10 euro li na Suísa. N ta bai manda-u 100€ gosi li pa Uesterni union bu ta bai tra na Koreiu.

DUKINHA – Fladu ma e mil-ixkudu riba di Saláriu Mínimu.

KAPEDI [V. O.] – Mamodi?! Kredu un krus bataretu! Aburnúnsia, águ tuntun! Dés euro riba di más tres mil?! Kel-la e txokóta ki es sta na el!

DUKINHA – Nton go e módi? Ka ta da pa N bai?

KAPEDI [V. O.] – Modi ki ka ta da pa bu ben?

DUKINHA – Di manera sima nhu spanta la!…

KAPEDI [V. O.] – Bu atxa ma N ka debe spanta?! Ma N debia toka palmu… pila badju! Nhos ka ten tinu na nhos kabésa. Mas Ok. N ta bai po-u tres mil i sinkuénta euro na Uesterni union bu ta bai tra.

DUKINHA – Mutu obrigada!

KAPEDI [V. O.] – Óras ki N poi dinheru N ta liga-u N ta fla-u kódiku bu ta bai tra.

DUKINHA – Ok. Nhu ta txoma-m.

E ta desliga telemóvel e ta poi riba mésa. Ta obidu vós di Kapedi na pensamentu.

KAPEDI [V. S.] – Paxénxa na mundu! Pretu e so lenbésku! Nu gosta di lenbe branku! Di ta lixonxa-s! Sima nu ta kati-kati pa nu ben ses téra?! Sima mi, po-m N bende nha boi, ku nha nabidja ki staba manidjada; po-m N bende nha pardoeiru ki faltaba so pa N kubri, pa N poi pórta ku jinéla pa N moraba; N npinha un padás di órta ki nha pai dexa-m ku ei di erdansa, N kunpra vixtu pa kinhentus kontu, dos bes, N gasta mil kontu, N ka ta ben! So na di terseru bes, ki N torna bende un padás di saradu, ku un djaki, ki N konsigi. Pa N txiga dentu Europa, so nha vixtu ku pasaji fika-m pa kuazi dos mil kontu. Mas grasas a Deós N ka sta rapendedu pamodi N sta na nha trabadju, N ta ganha suguru, dja N tene nha papel na mo, saúdi ka sta falta-m na korpu. Mas ki ta due-m e ó ki N ta odja brankus ta bai nos téra… ka meste vixtu. Es ta kunpra so ses pasaji, es ta soti na avion es ta bai. Ago, Dukinha dja, pa ben pasa un mes di féria ku mi, e ten ki ta fase kel téxti di porkariâ pa e paga más di ki un mes di u ki N ta ganha li na Suísa! Kel-li es ta paga-m el sertu go. Nen si e na fus! Lakarionsis!

II SÉNA

Sarapion ta sta ngostadu na paredi djuntu di entrada unde ta pagadu texti di PCR. E ta sta ku un xikoti di bargadju boi na mo, Dukinha ta bai ter ku el.

DUKINHA – Nho-stâ, senhor!

SARAPION – Deós da-u juis na kabésa, libra-u di kai na mo di malandru.

DUKINHA – Ami e la di fóra, N ben pa N ben paga texti di Kovid-19, mas N ka sabe módi ki N ta fase. Kuazi N ka konxe Praia. Nhu ka ta nporta djuda-m?

SARAPION (interamenti disponível) – Ka ten probulema.

DUKINHA – Mutu obrigada.

SARAPION – Abo e di ki fóra?

DUKINHA – Mi e di Santa Katrina.

SARAPION – Dja bu sabe e kantu ki bu ten ki paga?

DUKINHA (ta longa-l un sakutelu) – Nhu toma. Sta tudu la-sin-sin.

SARAPION (ta xinti na volumi ku na pezu, ma milagri dja kontese) – Nu bai N ta po-u bu ta fase texti, mi N ta bai paga N ta tarse-bu diklarason.

DUKINHA – Mutu obrigada.

Sarapion ta bai ku kel sakutelu ki tene trezentus i trinta i oitu kontu i kinhentu na el, e ta tarse-l diklarason dentu di un envlopi fitxadu. E ta atxa-l na pórta ta spera-l.

SARAPION (ta longa-l envlopi fitxadu) – Dja sta. Envlopi bu ta ntrega na Eroportu óras ki bu ta nbarka. So ka bu abri-l antis di bu ntrega-l na Eroportu.

DUKINHA – N fika-nho mutu gradesedu. N ta pidi Deós na Seu pa lumia sénsia di-nho kada bes más inda.

SARAPION – Amen!

Sarapion ta perde, ku se diâ di trabadju fetu, Dukinha ta volta pa Santa Katrina kontenti ma di li saténta i tal óra e ta soti na avion e ta ranka pa Suisa.

III SÉNA

Dentu di kasa, xintadu tudu tristi, Polísia Judisiária ta kanba, ku un sakutelu na mo. Sanéma ta odja-l ta spanta.

SANÉMA – Nha subrinhu?! Fórti N staba ku sodadi bo!

POLÍSIA JUDISIÁRIA – Nharastâ!

SANÉMA – Deós djuda-u, libra-u di prigu’l mundu. Nhu Santu Sakramentu ta pega-u na mo, ta kontínua ta fase-u ser ben kasadu.

POLÍSIA JUDISIÁRIA – Enves di bu fika kontenti pamodi bu sa ta nbarka, bu sa ta txora?! (E ta stika-l mo es ta fla mantenha, e ta vira pa Sanéma) Titiu liga-m, e fla-m ma prima sta nbarka oxi di noti, N fla-l ma nton N ta pasa li pa N dispidi del, ma N ta tarse-l (e ta poi sakutelu riba mésa) un garafa di mantega-téra ku un litru di grogu pa e leba-l. Sta tudu dentu sakutelu.

SANÉMA – Naaaaah, bu prima ta bai manhan, ku Deós. Dja e striba txeu… dja e konxe nfernadja, mas e gosi ki Nhor Dés kre.

POLÍSIA JUDISIÁRIA – Tudu e óras ki Deós kre, titia. (Pa Dukinha) Dja bu fase texti di PCR? Sen el bu ka ta dexadu nbarka.

SANÉMA – Dja e fase na ontonti. E paga un-monti dinheru… mas dja e fase.

POLÍSIA JUDISIÁRIA – Kel texti la sta un-kusinha ezajeradu! Sta mutu karu.

Telefone di Sanéma ta toka, e ta djobe pa ekran, dipos pa Polísia.

SANÉMA – E bu tiu. (E ta poi telefoni na obidu) Oi, Kapedi!

E ta sai na ruâ es ta bai papia, Dukinha ku se primu ta kontinua na sala ta konbersa.

KAPEDI [V. O.] – Modi ki nhos sta pa la?

SANÉMA – Nos nu sta pa li tudu dretu. Nau: kontenti… sábi propi.

KAPEDI [V. O.] – Onti N papia ku nha subrinhu ki e Judisíaria, e fla ma oxi e ta baba la dispidi di Dukinha.

SANÉMA – Dja e sta li. E txiga kuazi gosi!

KAPEDI [V. O.] – E fla ma e ta leba-l un garafa mantega baka ku un litru grogu pa e tarse-m.

SANÉMA – Sakutelu sta riba di mésa propi.

KAPEDI [V. O.] – So ka bu bai stunka meninu di kamóka ku kuskus toradu pa e tarse-m, pa bu dexa nha mantega ku nha grogu la.

SANÉMA – Tanbe N ai ta manda-u mangi. N ta manda-u manginhu ku bidjogô. Es anu mangi xinta pe na txon pari!

KAPEDI [V. O.] – Deós ten!

SANÉMA – Sima kel pe di katotóna… kel ki fika la na bóka fonti… un ramu propi laska pamodi ka aguenta pezu di tantus fidju ki staba xaranpantadu nel.

KAPEDI [V. O.] – Manda-m mangi, sin. Manda-m katóna. El e fórti óras ki e sta berdi, mas dja, ó ki e sta dibês o madur, el e doxi.

SANÉMA – Dja N tene tudu armadu pa N manda-u. Dja go… komu bu subrinhu sa ta manda-u grogu, N ta purpara-bu un marmitinha ku karni asadu pa bu bai fase bafiu ku el. Lenbra ma bu ta flaba manenti ma omi ki ta bebe ka ta bafa ma ta bafadu.

Es ta ri.

KAPEDI [V. O.] – Tanbe si matxu subi na stribu… kume ka farta, ben tenta bafa es Kapedi li… N ta kamuga-l bariga N ta mostra-l. (Sanéma ta ri) I azágua modi ki sta? Txon sta modjadu? Lugal sta animadu?

SANÉMA – Luga-l sta sustedu, txon sta bulanhadu, txuba dja ten un sumana ka pára.

KAPEDI [V. O.] – Nton sta sima li na Oropa! Ali ki txuba kuazi ka ta pára.

SANÉMA – Naaaah! Ali kre kusa dja konpo-nu. Pamodi si Nhor Dés dexa-nu so na mo di kes gardionsis ki sta na poder la… dibagar ta panha-nu.

KAPEDI [V. O.] – Ka ten más nobidadi? Es anu nhos ka dexa padja-bedju toma-nhos kónta lugal?

SANÉMA – Náaaaa! Padja-bedju sta so na lugal di Dinda Pin, sima tudu anu. Nobidadi… tirandu txubara di Muntura ki kai na kórda… ku mudjer di Palu Nhinha ki fladu ma bota bariga… sta tudu dretu. Nada ka kexadu. Ah! Odília di Naná ki tanbe fladu ma tradu di kasa, ma atxadu bédja tonda podu na kaminhu.

KAPEDI [V. O.] – Odília senpri e nanprésta dasdi pekinoti.

SANÉMA – Koitadu! E bonitinha go!

KAPEDI [V. O.] – Bunitéza di mudjer ka sta na rostu, nen na bistiménta. Sta na modi ki e ta ruspeta, ki e ta nobega ku se pabaxu.

SANÉMA – E kulpa rixu, Kapedi. E se planéta ki da pa si!

KAPEDI [V. O.] – Ki ten kulpa rixu e kei koitadu ki tra-l di kasa, ki atxa-l bédja i ki ta bai pasa restu di se bida ta fasedu txokóta ma e atxa mudjer bédja.

SANÉMA – Akel?! E el ki atxadu bédja o e mudjer?

KAPEDI [V. O.] – Nu muda di asuntu.

SANÉMA – Kuazi ki mé!

KAPEDI [V. O.] – Inda ka fladu nada sobri mórti di nha tiu Viera Lopi?

SANÉMA – Kre nen ka sa ta fladu. Anos inda nada nu ka obi. Funaná bai kadiâ kel dos diâ… e sai, ka ten dos mes dretu… bu tiu atxadu dentu di kasa smaiadu, e lebadu Ospital, e fla ma e gás ki e dadu ku el. Dja ten uns mes ki e móre, mas inda nada nu ka sabe. Si e móre o si e matadu… só Nhor Dés ki sabe.

KAPEDI [V. O.] – Mas pamodi ki na Kabu Verdi ka ta fasedu djustisa?! Un kau ki Prezidenti di Kánbra dadu tiru… ka móre sórti… el mesmu e kala se bóka ketu?!

SANÉMA – Módi ki e ka ta kala?! El e sabe pamodi ki e kala. E ka tudu algen ki ta ten sórti pa skapa dos bes.

KAPEDI [V. O.] – Mas Deós ka ta durmi. Sima nha tia Anja ta flaba, Ael e ka rapasinhu, E ka ta síbia ku mo na bolsu, e ka ta fuma sigaru, nen e ka ta bisti kalsa pe-kurtu. São Tanás pode pensa ma e ta fika ta goberna mundu un-bes-bai, mas ali-ben-tenpu ki e ta txora lágua ka ta sai; e ta grita vós ka ta sai; e ta kre kóre pe ka ta labanta-l di txon.

SANÉMA – Un nha subrinha ki e Divogada fla ma si Purkurador-Jeral tenba sirbintiâ, i ma si e ta kunpriba se papel dretu, ma e ta mandaba investigaba. Ma kualker krimi ki ta fladu «krimi públiku» induménu mórti ki ta suspetadu ma e mórti matadu, ma el e obrigadu manda investiga. Mas ma e ka manda, nen ma e ka ten diâ di manda, pamodi ma dja e sabe ma si investigadu, ma makakus ka poku, nen ka mermeneus, ma na ka d’oxi dja staba trás di gradi. E fla ma e pur isu ki e sa ta síbia, ta ratxa pedi ta pasia sen djobe pa ladu, sima ki tudu es kusa ki sa ta pasa e ka nada ku el, o ma tudu golu ki sta metedu, sta ser markadu pa djugadoris di se timi.

KAPEDI [V. O.] – Ael e podu la pa e bai ratxa pedi, o pa e bai fase djustisa?

SANÉMA – Nha subrinha fla ma e pur isu ki se koléga Amadeu ta intxi-s di aldrabonzeku, i ku ses kara di pórka-burgónha, nen es ka ta liga. Es ta finji ma es ka obi.

KAPEDI [V. O.] – Tanbe inda ka fladu nada di kel nha subrinhu la di Portu Santiadu ki es rinka kuazi tudu denti na bóka, ki es fra tudu dos odju, ki es sapa língua, es prutxi gran, es sapa pé ku maxin, es pinta rostu ku tinta pretu i es poi lumi nalguns párti di kopu? Sa ta ben faze tres anu!

SANÉMA – Nada inda ka fasedu. Bu subrinhu Armindu Tabari dja skrebe te ki sta-m ma dja e kansa, e ta fla ma se armun ka fasedu otópisia, e ta pidi pa dizenteradu korpu pa fasedu, nen es ka ta liga-l. E ta fla klaru ma médika ka txiga bera di se armun, ma e sta na kondison di prova, u ki sima nha subrinha Divogada fla, si e na téra ki ten djustisa di berdadi, o e ta poda na kadiâ pamodi e sa ta nkrimina médika, oliás, propi kel médika li, pa e linpaba se nomi, e ta kexaba di bu subrinhu Armindu Tabari.

KAPEDI [V. O.] – Modi ki e ta kexa?! El dja e sabe dretu kusé ki e ka fase! N ka sabe si na Kabu Verdi algen dja ka sta finu más, o si e burgónha ki dja kaba-s na rostu.

SANÉMA – Kapedi, ki ten burgónha e algen koitadu, ki albes ta móre di fomi ku burgónha di fla ma e ka tene nada kusia pa e kume. Ladronsis ka pode xinti burgónha, pamodi pórka-burgónha e ses diplóma di dotoradu.

KAPEDI [V. O.] – Dibagar na mundu! Amadeu fla, kaba e skrebe na Interneti, ma alguns Juis di Supremu Trubunal di Djustisa ta falsifika dukumentu, ta aldraba prosesu i ta altera lei, mas nada ka ta kontese ku ningen. Amadeu ta largadu soltu pa kontínua ta kalúnia Juis, Juis ta dexadu na ses kau pa es kontinua ta falsifika dukumentu, ta aldraba prosesu i ta altera lei. Paxénxa tanbe. (E ta raspira fundu) Pasa-m nha subrinhu la.

SANÉMA (ta volta pa sala e ta longa Judisiária telemóvel) – Bu tiu kre papia ku bo.

POLÍSIA JUDISIÁRIA – Oi, tiu!

KAPEDI [V. O.] – Dja N odja ma bo e omi di palavra, nha subrinhu!

POLÍSIA JUDISIÁRIA – Omi sen palavra e ka omi, tiu.

KAPEDI [V. O.] – Dja N odja ma bo e sima bu falesidu pai. Bu pai éra omi di palavra. E toma-m un bodeku fiadu, e fla ma e ka ta paga-m, e ka paga-m mé. (Es ta ri) Ago nu bai na asuntu sériu.

POLÍSIA JUDISIÁRIA – Bóra la.

KAPEDI [V. O.] – Modi ki kazu di bu primu, kel ki es mata la Santu Diabu…

POLÍSIA JUDISIÁRIA – Santu Diabu?!…

KAPEDI [V. O.] – Sin! Bu ka sabe unde ki fika Santu Diabu?

POLÍSIA JUDISIÁRIA – Nau!

KAPEDI [V. O.] – La unde ki ka pode ser Santa Krus! Na Santa Krus ta tendu pás na alma, susegu na spritu i konfortu na korpu. Mas la bu ta bai branku bu ta ben pretu; bu ta bai pretu bu ta ben rusu. Dja djugadu la, te Padri dja podu na badju! Orelengus! So maldisuadus… skumungadus!

POLÍSIA JUDISIÁRIA – Tiu, si nhu gosta di mi, sima N sabe ma nhu gostaba un bes, ka nhu purgunta-m kes tipu di kuzas la.

KAPEDI [V. O.] – Mas pamodi?

POLÍSIA JUDISIÁRIA – N ta koredu ku el di trabadju inda oxi… si ka podu koléga pa mata-m.

KAPEDI [V. O.] – Kredu, mos?! Pamodi?

POLÍSIA JUDISIÁRIA – Tiu, N tene família pa N sustenta… inda N sta nobu. N tene medu, tiu! Li na Kabu Verdi tudu algen tene medu. Tene medu i sta ku burgónha. Nu tene medu até di xinti medu, i nu sta ku burgónha di kes un-monti ki ka ten burgónha. Nu tene medu si dadu kónta ma nu sta ku medu, pamodi si es xinti medu ma nu pode denunsia-s, ses medu ta po-s pa es kaba-nu ku medu… nton es ta manda mata-nu.

KAPEDI [V. O.] – Ka bu fla, subrinhu?!

POLÍSIA JUDISIÁRIA – Ali ki ta manda e Polítikus ku Trafikanti, es ta ganha ben i es ten tudu mordomia. Inda es ten un redi ki es ta fase kusa ki es kre, sabendu ma ningen ka ta xatia-s, kifari pa mexe ku es.

KAPEDI [V. O.] – Mas pamodi ki nos téra bira di kel manera li, Nhor Dés?!

POLÍSIA JUDISIÁRIA – Nha primu DEKU nos tudu nu sabe ma e matadu i modi ki e matadu. So ki na inísiu, komu flada ma éra NIJERIANU, negru i sen prakenha, sima primu Armindu Tabari dja konxe skrebe ta fla, es ka fase-l otópisia, es poi na papel di óbitu ma e móre pamodi e kai. Mas nau. E o’kontráriu: e kai pamodi e móre. Oliás, pamodi e matadu. I kantu es ben sabi ma e ka éra korpu di NIJERIANU… es barbari. Nton Xefi fla-nu ma ten ki ta fika bóka-bóka, tudu entri nos. Ma si algen sai ki fla un kusa… ma se odju ta mostra-l. Tiu, N ten mudjer ku dos fidju pekinoti, N ten kasa ki tudu mes N ta paga Banku, kuazi nha dinheru ki N ta resebe sima sta. I purbiâ di es nos pakutu di selensiu, gosi nu sa ta ganha mutu más midjor. Ami ku nha txaskan désimu-sugundu anu, ku un formason di sais mes, N sa ta ganha más di ki txeu makakus ki xinta sinku anu na banku di Universidadi ta studa.

KAPEDI [V. O.] – Dja N konprende.

POLÍSIA JUDISIÁRIA – Nha tiu, nos Sistema ta sta na paródia tudu santu diâ na un bar ki txoma Nhu Krimi; Uiski ki es ta bebe e fetu di sangi di koitadu, musturadu ku soris di kansera di ses trabadja di até 24 óra pur dià, sen féria nen fin-di-semana, sen folga nen direitu pa es duense; ses bafiu e bifi ki es ta fase ku nos karni, dipos di kuatu o sinku dià ó ki es rapta-nu. Nos Sistema ta fladu ma e demokrátiku, ka pamodi ma e povu ki ta manda, mas sin, pamodi es ta ruspeta relijiozamenti Separason di Poder. Kada un ta fase se sirbisu sen kunfiadésa di kes otus. Poder Ezikutivu e un mákina ki ta leba saisentus mil abitanti, mas so e spesializadu na bati xuxidadi di koruputus i brankia-s ses porkarâ; Parlamentu e un diterjenti putentísimu, ki ta invita di kiria lei ki poi koruputus txoka na kadià; i Poder Judisial e mákina ki ta seka, ta liza, ta paga kualker mantxa di korupuson. I inda, Prezidensia di Repúblika e simiteri undi tudu ta bai fika nteradu, musgedjadu, bóka-bóka. La so ta fladu kel ki dja flada; ta fasedu kel ki dja faseda o ki mostradu ma kre fasedu i ka dexadu.

KAPEDI [V. O.] – Ok. Nton nu pasa pa otu asuntu.

POLÍSIA JUDISIÁRIA – Ok.

KAPEDI [V. O.] – Anhos si ki nhos tene texti di koróna karu?!

POLÍSIA JUDISIÁRIA – Sta karu sin, tiu. Tudu algen sa ta raklama.

KAPEDI [V. O.] – Karu sin! Pa bu paga pa bu podu vixtu…

POLÍSIA JUDISIÁRIA – Nha prima kunpra vixtu?!

KAPEDI [V. O.] – La na Sentru Kumun di Vixtu e ka paga?

POLÍSIA JUDISIÁRIA – Aaaaan! Ok.

KAPEDI [V. O.] – Pa bu paga suguru di viaji, pa bu kunpra pasaji, kaba inda pa bu paga tres mil i tal euro pa téxti di PCR?!

POLÍSIA JUDISIÁRIA – Nha tiu, nho tanbe nhu sa ta ezajera dimás. Texti di PCR e un Saláriu mínimu ku más mil-ixkudu riba del.

KAPEDI [V. O.] – Nton?! Ka foi si ki N fla-u?! I foi kel-la ki N manda Dukinha… inda N po-l un kunbidinhu riba del. N manda-l tudu ku konpostura.

POLÍSIA JUDISIÁRIA – N fla-nho: Saláriu Mínimu Nasional.

KAPEDI [V. O.] – Bo bu kre kansa-m, o kusé, nha subrinhu? Saláriu Mínimu li na Suisa, u ki mi N ta resebe tudu mes, e tres mil euro, ki ta da trezentus i trinta kontu la na Kabu Verdi. E kel-la ki N manda.

POLÍSIA JUDISIÁRIA – Saláriu Mínimu Nasional, e kel ki ta pagadu li na Kabu Verdi, nha tiu. Ki e treizi kontu. Téxti di PCR e katorzi kontu.

KAPEDI [V. O.] – Nton pasa-m Dukinha telefoni.

Judisiária ta longa Dukinha telemóvel.

DUKINHA – Alou, papá!

KAPEDI [V. O.] – Abo kantu ki bu paga pa texti PCR?

DUKINHA – Kel dinheru ki nhu manda. Mamá troka-l e da trezentus i tal kontu.

POLÍSIA JUDISIÁRIA (ta fika ardigadu) – Da-m telefoni N fala ku el. (E ta toma telefoni) Titiu!

KAPEDI [V. O.] – Nha subrinhu, djobe-m kusé ki sa ta pasa la, pamodi N ka sa ta ntende nada!

POLÍSIA JUDISIÁRIA – Nhu desliga telefoni, nhu dexa-m N berefika li ku es, dipos N ta liga-nho.

KAPEDI [V. O.] – Ok. Nton boas óra, nhos fika na pás ku mizedikódia di Deós.

POLÍSIA JUDISIÁRIA (pa Prima) – Bu paga trezentus i tal kontu pa bu fase texti PCR mé?

DUKINHA – Si N ka pagaba, N ta flaba ma N paga?

POLÍSIA JUDISIÁRIA – Algen ngana-u, prima. E na kenha ki bu paga?

DUKINHA – Un omi baxinhu, ka gordu, ki ta kiria un perinha, ta uza lunéta, ki N atxa la na pórta sakedu, ki bai paga-m el.

POLÍSIA JUDISIÁRIA – Omi ki ten perinha!… ta uza lunéta!… E ka Deputadu?!

DUKINHA – N ka sabe. E staba ku un xikoti di bargadju boi na mo.

POLÍSIA JUDISIÁRIA – Ooooh! Dja N sabe e kenha! E Sarapion ki dja ngana-u. (Ta sukudi kabésa) El e grandi Bandidu! (E ta tra telemóvel e ta liga) Bondiâ!

VÓS OFF – Bondiâ.

POLÍSIA JUDISIÁRIA – E di Sedi di PJ na Praia?

VÓS OFF – Sin.

POLÍSIA JUDISIÁRIA – Ami e Inspetor, Xefi di Delegason di Santa Katrina. Nhos lokaliza-m Sarapion imediatamenti, nhos investiga-m el, nhos odja si nhos ta rakupela trezentus i dizaséti kontu ki e toma un jovi pa e paga-l texti PCR.

VÓS OFF – Ok. Nu ta faze delijénsia já.

POLÍSIA JUDISIÁRIA – Obrigadu. Asin ki nhos lokaliza-l, nhos da-m fidibéki. (Pa prima) Mas abo tanbe, grandi si, pa bu bai kai na un kusa di kel-la, prima?!

DUKINHA – Ami N ka konxe Praia Dretu!… N ka sabia kantu ki e pa N pagaba… omi ta parse-m sériu!

POLÍSIA JUDISIÁRIA – Titia, nha liga titiu pa N papia ku el.

SANÉMA (ta marka núnbru ta poi telemóvel na oredja) – Tá sin!

KAPEDI [V. O.] (sen demora) – Oi!

SANÉMA – Spéra N pasa-u bu subrinhu.

E ta longa Judisiária telemóvel.

POLÍSIA JUDISIÁRIA – Oi, tiu!

KAPEDI [V. O.] – Oi, subrinhu!

POLÍSIA JUDISIÁRIA – Dja N sa ta trata di asuntu. Prima foi nganadu.

KAPEDI [V. O.] – Foi nganadu modi? E ka ta ben oxi?

POLÍSIA JUDISIÁRIA – Texti e katorzi kontu. Mas e da un senhor ki staba na pórta tudu kel dinheru ki nhu manda, pa bai paga-l el, konvensedu ma e kel-la ki éra valor.

KAPEDI [V. O.] – Nha fidja nton, inda sta txanbu si?! Pa e bai da omi ki e ka konxe tudu kel dinheru ki N manda?!

POLÍSIA JUDISIÁRIA – Mas ka nhu fadiga, pamodi omi nu ta bota mo já. So ki N ta fla-nho klaru: dinheru nu ka ta atxa-l ku el tudu. El e sépa’l bandidu.

KAPEDI [V. O.] – Djuda-m, nha subrinhu. Djuda-m, Deós ta paga-u.

POLÍSIA JUDISIÁRIA – Ok. Nton nu desliga pa nu ka perde más tenpu.

KAPEDI [V. O.] – Mutu obrigadu.

POLÍSIA JUDISIÁRIA (pa Sanéma ku Dukinha) – Nhos dexa-m N ta bai, pa nu odja si nu ta pega Sarapion antis di e kaba gasta tudu dinheru.

SANÉMA – Bai faxi, Deós bai ku bo. Nha Virja Mariâ Parida ta djuda ki bu ta liga-nu faxi pa bu fla-nu ma dja bu pega baldubinu. Fidju di Naxu!

Judisiaria ta sai, Dukinha ta fika ta txora, Sanéma ta konsola-l. Kel diâ mé, Polísias ta serka Sarapion na Zóna di Tra Txapeu, riba di móta ki e kunpra ku kel dinheru. Un Polísia mudjer ta da-l tiru, bala ta bai serta na otu Polísia. Kel ki dispara ta dizorienta, ta perde kontrolu. Un Ajenti ta tenta sakóre kel ki sta pankadiadu, Sarapion ta da-l tiru e ta kai el ku kel otu ki e tene pegadu, tudu es dos mortu. Sarapion ta ranka móta pa fuxi, un otu Polísia mudjer ta da-l rajada ku Bereta e ta kai e ta tufudja el ku móta.

Partilhe esta notícia

SOBRE O AUTOR

Redação