Cultura

Mentira e un kusa sagradu

Ki atoa e ka debe kontadu

Pa ó ki na sériu e mestedu

Sima verdadi na el setadu.

Óras ki e kontadu ben kontadu

Más ki mil verdadi nel ta setadu

Mil verdadi, mil tapóna ta lebadu

Un mentira, di gilhotina ta libradu.

Kontadu dretu pode strobadu

Ki di kualker kastigu panhadu

Mas txeu verdadi si konfesadu

Ka ta inpidi pa ka kondenadu.

Pamodi si algen konfesa se pekadu

E a ta seta ma e fase kusa mariadu

Nton e ka ten nada ki fika spantadu

Si e ka skapa di e ka ser kastigadu.

Anton, e ka debe dexa di fika sienti

Pa e odja ma ken ki sai di kaminhu

I ki subi na stribu da so pa nosenti

Ma ka ten ki susta si fri na spinhu.

Pa lei, ki ta konta e ka verdadi.

E próva sertu ki e pa mostradu.

Pa ki kulpadu ta uzadu maldadi

Pa kondenadu ten ki ta provadu.

Pur isu ki si fasedu kaba negadu

Ki ka parse próva pa kontrariadu

Sikré di bóka mai stadu pragadu

Kastigu nenhun ka ta pode dadu.

Mas e ka si ki kusa ten pasadu.

So pa suspeta sa ta prendedu,

Ku tudu maldadi sa ta julgadu

Ka meste próva pa kondenadu.

Nton mentira debe ta ruspetadu

Si ka rokadu e ka debe kontadu

Un bes pur anu e debe lenbradu

Pa 1 di Abril ka pasadu nsodadu.