Cultura

                         [pulítiku ta sai pa bai mas inda e ka bai.

                         xuxinhu ta poi ta rasmunga indiginadu]

                         [xuxinhu]

grandi kabron        kel li k'é odamoni propi

ta prumete prumete ti bira garganta seku

dipos es ta kai na kel k'es prumete ta nguli fepu

mas kenha ki badja é pamo sabi parse-l kel toki

inda kaba e ta disfama pueta

nu ta baza-l po na piskós

oliás nu ta baza-l basia di kokó

(olia u pon ki ven du renu

kore pamo oxi é dia di trenu)

sima kel ki prinseza bazaba nhu lobu

nu ta fla-l «nhu toma rasposta'l pobu»

nu ta dispixa-l sima águ ta kai di jerós

riba di si falta di koketa

n ta fase si nhos ka pega-m mo

[xuxinhu ta kore ku po na un mo

                         i un basia di kokó na kelotu mo

                         riba palku ta fase faronpa]

nhos pega-m nhos toma-m po

nhos toma-m basia di kokó

n ta da n ta da   n ta lansa n ta lansa

n ta mostra-l na ki toki k'e ta dansa

[koru ta sentensia]

dipos di un PAI di dizastri

susede un MaiPaiDiós di kalamidadi

rususita un txUCIDe so dun ilia i dun sidadi

(apezar di kel li nu ten simpatia pa es

ale-s na mei di tibaron ta djobe ses ves)

partidu di juaun alén

é propi kusa di alén

un partidu ki si sedi é sentru spírita?!

mi go dja n ratxa dja n pita

grandi foku sermon di fogu

anos nu ka ta djuga es djogu

kre so un PePé pa tra-nu des distinu áspri

pa da-nu nen s'é iluzon di diferenti

pa nu ka fika na kes mesmu dos di senpri

nu bai nha povu ku koraji vota rostu pa frenti

o nu ta salba o nu ta bá para la piku d'infernu

nu bai povu nu bá vota pa nobu guvernu

nu ta spera nu debe spera veron i non invernu

kes ten stadu ta da-nu tudu es tudu es tenpu

li na pátria di morabeza i mar ku sol ku bentu

[pulítiku ta suri lenbrandu kel stória di morabeza

ki po-l straga el ku pueta ki ka ta konpo nunka más

a-non ser k'e ben na públiku pidi diskulpa i fla, sima

                          ta ben odjadu más pa dianti,  si tenda algun dúvida,

                         ma afinal pueta é ka rasista, el ka pode ser rasista,

                         ma foi língua soitu di bisenti ki mete-l nes iternu nkrenka]

un ku si estrela negra di mau agor

otu ku si ventuinha k'inda ta da-nu más kalor

kre nos pur algun maldison so infernu propi k'é pa nos

nhordés nhu da-nu un milagri nhu manda-nu

un ki ta djobe pa nos       

nen s'é un nhu lobu fanfaron

sikré un buneku seku di alkatron

ki kes li óra k'es striba es txiga puleru

nos é botadu la pa posilga ku txikeru

[pulítiku sukundidu (ki el e sta pensa)]

dja nhos odja ma kel xuxu di txonbon li

ma el é mesmu spertu

ti kelotu bazalisku li

dj'e poi na si ladu

inda e ta skrebe más kusa mariadu

ta ataka tudu dos ladu

pa ka sabedu kal k'é ta apoia au sertu

n ta manda nhas rapasis txera-l ti trus

(mas prumeru p'es bense p’es fase krus)

p'es smiusa tudu si pensamentu

pamo tudu algen nes téra di padisimentu

ten ki ta ten un portu p'e ka fika el so na dizertu

mas spertu go ael é spertu

dios seja lovadu

ker dizer xuxu seja lovadu

koitadu mi mi so abron   n ka mi so má pa el

é igual  tantu faz  po e ta panha e ta zinbra-m el

e ta da-m el so na kostela

ti kria-m pustema

e ta lonba-m kadera na txon

má el go nu ta kreba-el na nos partidu

na nos ladu   talves si e ta fikaba ntritidu

ku nos makinason ki ta ultrapasa tudu si fikison

nu ta teneba-el boka kaladu

o nton e ka ta atakaba tudu dos ladu

e ta takaba so kelotu ladu

[pulítiku ta ferga mo kontenti ku es si ideia

i inda e ta konfesa ku vos baxu«mi é propi

                         bidjaku p'e ka pensa ma so el k'é nhaku»

                         e ta kontinua na si disertason]

ker dizer nhas rapasis aes é xuxu tanbé

es ka ta durmi nen si diabu spertu paga-s

nen si kel molestra runhu li panha-s

mas kel mos di txonbon li dja pasa-s

el e panha-l i e bira inda pior ki satanás

dianti del es é mininu ta kodje sinbron

es é propi nosenti tabanka

ku el ka ta da nen pa tenta tranka

konparadu ku el nos tudu fepu é bon rapás

ku séu na nos alkansu sima bá txada malpás

el é diabu dés bes xa-m larga di si pé

xa-m sai di si kontu

sinon oki n ta da fé

dj'e bota-m la baxu pontu

[koru]

kudadu pueta alguns ki da pa skritor

alguns ki tanbé da pa pueta inpistor

tenedu granpadu baxu sobaku tenedu maradu

ku korda’l porku através di kanu di tubu dijestivu

falta di ruspetu go é sita pueta sima bo ku arméniu

na ses manifestason di nisisidadi kumistível

ki sima nu sabe é tanbé un nisisidadi fiziulójiku

txuba ka txobe   pa alguns kau rusu torna mariadu

mas bo pode pasa kalamidadi anus i diséniu

bo bu ta kontinua na bu kutelu senpri livri i skivu

sikre boka porku fla ma bu kreba ser ministru kriativu

bu ka ta fase nunka bu puezia mueda konvertível

                   o bu proza omesmu tenpu atu di bajulason

                   i di tristi kontrison  ta pidi perdon

                   (será k'é pa paga o pa resebe algun padás di txon?)

                   sima nu sabe é dever sagradu di kualker bon kriston

                   pidi perdon kuanta-más nos k'é un grandi nason kriston

                   di valoris osidental i rikonhisidamenti katóliku

                   [un vos iróniku la di meiu di multidon]

                   si inda ka branku i judeu é pamodi di kes  amigus li

                   tudu bazadu li dja nvadi-nu ilias i es ta kontinua na kel li

                   des mandjakus ki dja toma-nu txon i tene-nu ta arde

                   nhos ka sta odja ma kel li k'é nos prinsipal prigu si si

                   ka nu fitxa frontera dja manhan antis di ser tardi

                   aliás un lovor pa nos pulísia di frontera

                   ki ta trata-s sima es merese ta mostra-s si li k'é rubera

                   di fin mundu

                   s'é li k'e rubon fundu

                   kau di fuxidu i aimas dotru mundu

                   [senpri en spanhol] si si

                   inda s'es era branku oropeu nu ta daba-es ti txabi séu

                   nu ta dizeba-es pasa so sabi

                   asi nau       si si    nu pode poba-es la djeu

                 mas gosi djeu bira kau finu ka kadia di mufinus si si

                   [otu vos]

                   ka nu skese tenpu ki nos salvason

                   staba na bisau ku dakar

                   ka nu skese ma es é más ki nos irmon

                   m'es foi prumeru ki povoa es txon

                   trazedu sima limária riba d'agu mar

                   é des ki nos tudu nu ben

                   mesmu kes ki sa ta da branku i pa judeu

                   nhos toma na bazofaria txeu

                   mas nos é tudu pretu sploradu pa tudu algen

                   [koru]

                  ka nhos intoronpe-nu ku lison

                  di stória kel li é inpurtanti mas

                  ka gosi sinon nunka más

                  nu ka ta kaba

                  undi ki nu staba?

                  ah sin nason di valoris osidental

                  osidental nen na mapa ratxadu

                  nen na globu skangadjadu

                  katóliku so na boka mas non na nos

                  kurason(sima nu obi na kel vos

                  ki prumeru ben di multidon)

                  k'é trata tudu koitadu sima irmon

                  k'é raparti bu rikeza ku bu pon

                  k'é faze dor di bu similianti bu paxon

                   [kel prumeru vos ki papia sukundidu trás

                   di kurtina ta fla entri sériu i iróniku]

                   pueta nhu asumi tanbé afirmason

                   ka nhu sukundi trás di koru

                   pa nhu fla kel ki nhu kre fla

                   nau nhu fla m'é boka-nho ki fla

                   ma pensamentu dinhô é kel la

                   é si k'é koraji dinhô bazofon?

                   anho nhu ka ten konpaxon

                   nhu kre odja so tristeza ku txoru

                   riba des somedjanti txon?

                   raparti pon ki bu ta ben

                   ka faze bajulason pa ningen

                   é pa algen more seku rusu

                   (raganhadu n ka meste fla

                   pamodi kel dja nu sta)

                   pamodi des balela di diginidadi

                   pamodi des stória di irmon?

                         nhu aitu la pa nhu ka nguli vaidadi

                         pa nhu ka nforka na solidariedadi

nhu da pa bon dipos nhu ta busu

nhu fika ta sabe ma nhu ka ten kondison

                         di da ninhun kriston lison

inda nhu ta koka pamodi

des stória di diginidadi armundadi

i otus dispalidadi

[pulítiku ta fase jestu ta apoia vos

                         e ta abri un surizu largu e ta da ku

                         kabesa       vos ta purgunta]

pueta anho na kenha

ki nhu ta vota nu pode sabe?

[otu vos ta risponde. es vos é propi

pueta ki sta xintadu la fundu el so]

isso só a mim cabe

[vos ta ritorki]

bajofu ku mania di purtugés

[koru ta risponde]

el si votu sta fitxadu

na seti txabi

ta spera midjor ves

e ka ta prumete nen k'e matadu

el si votu é studadu i matutadu

p'e ka vota tortu nen rabés

p'e ka sai ta da ataki ta labi-labi

pamo e kai na kontu sima nosenti

mas nu ta pensa m'e ta rakumenda

pa nu vota na amândio barboza bisenti

(será k'é parenti di kelotu bisenti

kel putu bitxentu ki ka ten imenda?)

[koru é ominisenti mas kel li personajens

ka sabe. i komu e tene odju tapadu e ta finji

                         m'e ka sabe m'é propi mensionadu ditu-kuju

ki era kel pulítiku ki staba ta diskursa]

ki ta djobe pa kenha ki ka ten prakenha

ki ka ta prumete m'e ta poi séu prenha

pelumenus enbora sen grandi iluzon

e ta pensa m'e ka ta da-nhos mo na txon

si kusa nen si ka fila nton suluson

é pega pulítikus baza lenha

po-s korda ku pedra na piskós

fases-s fexu dos dos

dipos bá funda-s la djeu

[koru ta kuriji imidiatamenti]

nau la djeu nau

ten ki djobedu otu kou

ki djeu é di david chow

talvês la alkatrás

djeu dja nu ka ten más

(k'e diskansa en perpétu pás)

nen spretadu xintadu la di pueta

nen ku konpo sta o ku dibrusa

pamodi un prédiu medonhu

sima satanoku kabesa’l kusa

obra d'algun arkitetu dotu planeta

dja tra-nu vista dja tra-nu sonhu

[vos otu bes]

kudadu pueta ko mete ku putu bitxentu

el si língua ka ten tentu

(dja nhos dos) inda el ta da-u ramoki

pamo el so kenha ki sta la lonji papia

e ta ben faxi e ta ben da si toki

[vos ta kontinua. koru ta kunpanha-l]

e ta fla-u ma bo nen bu ka ta vive

na bu téra (pudera! ku ministru moda el)

mas e ka sabe ma bu ta karega-l dentu petu

ma bu ta ama-l pa más bu atxa ma kusas sta mal

i ma kusas ka sta dretu

e ka sabe ma bu spritu é la ki ta vive

ma si bu more lonji bu ta ben nteradu nel

na txon di bu nasimentu

na mar di txonbon ku ronku festa sima kazamentu

ma kel li é bu firmi prumetementu

ma kel li dja sta skritu na bu testamentu

ki pa anu bu ta da mundu kunhisimentu

[koru ta kontinua el so]

el sin el sin spesialmenti

el go nu meste apia

simia nes txon nobu simenti

el sin el go nu ten ki fla abertamenti

m'e meste mandadu pa otu kau kanpia

[pulítiku rostu ta bá transforma ti bira burmedju

soris ta baza-l e ta tra óklus burmedju tanbé

                         e ta linpa testa mas e ta rikonpoi dentu faxi pamo

                         el e ka meste tenpu p'e riflete el é so abri boka baza

                          bentu   xou k'é si alimentu   nton e ta dispidi]

dja nu bai diós ku nhos más un bes

si nhos é di diabu el ku nhos otu bes

[kel li é piada el e ka ta rizisti]

nhos vota i nhos vota dretu

pamodi tudu ki ka ten ta ben ten

ka nhos vota na diabu nganadu

ka nhos kai na kel si mau maskabu

nhos pensa nisu dretu duranti dia di sabru

oliás ka nhos pensa nhos fase sima nhos fladu