Cultura

Bla, bla, so bla bla !

Na janela ta minga

sen koraju di Nzinga

Bla, bla, dja bira un kantiga

Un bes pur anu

na ladera ku kutelu

mesmu disku riskadu

sima porku mal borodjadu

Bla, bla, so bla bla !

dja bira un kansasu

Na spera tenpu, sen spasu

na roda pion, dun manifestu

Bla bla, e so oxi

Manhan anti di manxi

Tudu ta baredu sima fomi

ta fuliadu na profundeza di ignoransia

« Oxi nos e ka flajeladu di bentu lesti »

nos e fidju ki negadu identidadi

fidju sen direson, sen pozison

sen norti, sen sul, sen serteza

Sen jiografia linguistiku

Nos e fidju famintu di nos storia

Fidju na spera bokadu di stranhu

fidju ki diskubri si Santu

kubri Santu di otu argen

I si mar seka !

Ki povu bira mudu !

Lingua trankadu na boka

Odju kran na paxenxa !

Sera ki nu ta odja poder

i valor ki lingua ten ?

E un gritu di rivolta

lanterna di diskontentamentu

Dipos di 50 anu di indipendensia

Bla, bla, so bla bla !

anu ta sai, anu ta entra

Tenpu ta bai, i Parlamentu ?

Nen na fiu di konbersu.