Cultura

Bo e pontu i virgula ki marka un frazi

Bo e farol ki limia nha suavi pensamentu

Rainha sen koroa borduadu di sabidoria

Inkantada na konkista prufundeza ku si meludia

Dislunbranti na seda burmedju

Bu petu e direson di sentimentu

Strela na seu

Bu pinta mundu

Lua nha kretxeu

Bu penetra nha korason

Na un sinplis toki perfumadu di surizu

Bu dansa moda sereia

Gitara na areia

Ton afinadu na sentura

Mo na altura

Promesas, perfeson na andar

Ku pasu di noiba na altar

Klareza na bu oliar

Ku filisidadi kristalina di mar

Medu na bentu

Kalor na dedu

Kuadru na menti

Dosura na denti

Bo e mudjer

Oh menina mel

Entra na nha petu

I liga nha korason na bus odju

Pinta mar i kanpu di alegria

Xinta-m na barku i faze-m xinti karinhu

Kanta inu ki ta bisti bu alma

Bu flora na monti di sonhus

Pa sol karisia bu petulas

Ki rabenta na kutelu

Di versus ku puezia

Bo e vos i fos

Amor ku febri

Amor ku gloria

Flora nha beleza Spinola

Na ondia di bus palavra

N navega ku firmeza i xama

Bu bira sukri na kuskus

Oh Neusy, bo e joia

Bu spadja aroma pa nha viola.