• Praia
  • 29℃ Praia, Cabo Verde
É KA LOBU KI FASE - Parti 6 i últimu
Cultura

É KA LOBU KI FASE - Parti 6 i últimu

Bon leitura pa kenha ki kre, pode i sabe le, i kenha ki ten dúvida sobri intenson des skritu, pa torna le intruduson ki dja nu publika dos bes li na Santiago Magazine.Es skritu é un forma di intirvenson na polis di skritor i sidadon José Luiz Tavares, purisu el ka ta pirmiti pa ninhun parti des obra ser uzadu publikamenti pa konbati pulítiku.

[Dipos di el obi tudu kes kuatu personajen

kandidatu koru ta faze es miditason final]

 

[koru]

 

Na kenha ki nu ta pidi sakor

si na nos boka di bibu

dignidadi ka ten ninhun valor

si nos alma ta odja so un kor

kel di dinheru k'é ses i nos stribu

 

es pode fla ma djustisa é ses bandera

mas ti di noti ses falsidadi ta txera

el ta subi di téra ti dentu d'osu

(o visi-versa pamo ka ta da pa ntera)

el ta lastra na agu di posu

el ta mustura ku baru di nos korpu

el ta po-nu so na kaminhu tortu

ki sikre nu kre buska otu porta

ki ta abri pa spiga na tenpu'l korta

el ta fika senpri na nos bera

el ta fla-nu ma ka bale pena

tudu es sforsu

pamodi ku tantu o xis milena

nos alma ta seta entra na korsu

 

nton é nos ki spantadu ta purgunta

undi ki sta mastru di dignidadi

undi ki sta mare di nos vontadi?

é ku spantu  é ku el propi ki nu ta asunta

i nu ta matuta na kes ki munta

na ikivalensia o simetria pamo aes é metadi

kada un di mesmu porka nisisidadi

k'es ta inventa pa morti di bu kapasidadi

di labanta odju pa séu di imurtalidadi

 

kunpra ku bende na tudu tenpu izisti

mas bo nha povu bu ten ki sabe rizisti

s'es fla m'é tormentu ki dja bu bisti

fla-s ma bu ka nase pa izitason

mas pa lumi ki di li ti orizonti

ta fla-u ma falta o pekadu d'onti

bu ta paga-l ku novu disizon

k'é rigresa linpu pa bu fonti

ku bu mo i ku bu pe ta palpa ta prende razon

ku kabesa ku spritu ta treme d'imuson

pamodi bu persebe ma vida é ka so pa pon

mas pa livri disizon k'é séu di tudu benson

ki tenpu ta sopra riba bu kabesa

pa abri orizonti di bu testa

pa fla-u ma vida é ka so festa

m'é ka so juru rikonpensa o tensa

mas m'é tanbe anda ku pe riba di aresta

ki ta fase-u grita o mante boka kaladu musesa

i é na kel ora la ki ta rusisuta bu krensa

                                      na verdadi

ku si nomi i si pilidu k'é liberdadi

ki ta nxina-u ma dedu pontadu é umildadi

pamodi skuridon inda sta na kelotu metadi

mas bu vontadi é kauson

ki ta dikreta na kurason di bu nason

ma dja é tenpu di mudansa

obi otu múzika badja otu badju

peza prumesa nun diferenti balansa

fla ma bu disizon k'é bu libertason

                                    ka ten tadju

 

                        pamodi nos razon dja é ka algarismu

                        i sikre nu prende pratika sinismu

apezar di tudu nos alma sta linpu

pamodi el resebe un novu inpu

i gosi nu ten razon bastanti pa lovor

purkuantu nen tudu ka amor

sikre fla ma kre txeu ku tudu kalor

dianti di verdadi tudu é segera

k'u ta kore kol di kalbisera

pintxa-l ku mare di bu disizon

pa obskuridadi di boronsera

pamodi tudu kel ki ta podrise o mata

spritu   é ka bon pon

si presu é ka sinplis puera txon

mas el ta subjuga liberdadi

el ta piza-l sima barata

ta tra-l si grandeza k'é dignidadi

ti bira-l rostu inprópiu pa tudu siduson

 

mas si nu foi fraku mesmu mutu fraku

na tantu stason di nos pasadu

oji nu ta asinala ku nos atu

nu ta ilustra ku disirnimentu diklaradu

ma nos razon dja sai di braku

ma nos obidu linpu ta obi un novu kanson

tudu tardi ta fortalese nos konvikson

el ta po-nu ta djobe pa grandeza

i non so pa pratu riba meza

na pridumíniu di krensa

ma disizon al ser frutu di riflekson

é kel li  i so kel li k'é nos sentensa

 

 

 

Partilhe esta notícia