Cultura

Cultura

DOS EX TA KOBA KUNPANHERU

• Por Armindo Tavares
• 3 de Abr de 2021

Foi pamodi kel-la ki e perde kontrolu ki poi karu ki e sa ta giaba rabida ku el. Sima e sai di dentu di Asenbleia ku kel pilon di nervu, Kodé di Dóna bai papia ku el, e manda un karu pa leba Kodé Sonfransisku, el e soti na di-sel, el ku más dos rapasis, e ranka. Ta ruedu ma un di kes rapasis ki bai xintadu na banku di tras, ma da-l ku po na kabésa, ki po-l perde kontrolu, karu subi buranku rabida ku es.

SÉNA ÚNIKU

Biluka ku Punoi ta sta dentu di un Bar, xintadu na un mésa, Pirekis ku Verginha ta kanba ta bai ngosta na bulkon. Verginha ta sta ku fatu ku gravata, Pirekis ku balalaika.

VERGINHA (pa Enpregada) – Da-m un sereveja i poi Pirekis un grogu.

Verginha ta sta distraídu, Pirekis ta panha serveja ta bebe.

PIREKIS – Sta mesmu jeladinhu.

VERGINHA (tavira dirapenti) – Abo sereveja éra di-meu.

PIREKIS – Anton grogu éra pa kenha?

VERGINHA – Pa bo.

PIREKIS – Pa mi?! Kenha ki fla-u ma N kre grogu?

VERGINHA – N kuda ma bu kreba grogu?

PIREKIS – I bu kuda así, pamodi?

VERGINHA (pa Enpregada) – Óh nha senhóra…

NPREGADA – Nhu ta diskulpa-m, mas ami N ka e senhóra di-nho.

PIREKIS – Bu sa ta odja?! Bo e kunfiadu!

VERGINHA – Diskulpa-m.

NPREGADA – Ami e menina. Menina séria, inda virja i onrada.

PIREKIS – Bu ka sabe sta ketu… ago, toma!

VERGINHA – Diskulpa-m, menina.

NPREGADA – Dja nhu sta diskulpadu. Kusé ki nhu kre?

VERGINHA – Tarse más un serevejinha fresku. (Pa Pirekis) Komu bu tene so 150 kontu na banku!…

PIREKIS – Pamodi N ka ladron.

VERGINHA – N ka sabe si e pamodi bu ka e ladron, o pamodi bo e diskudadu! O nton pamodi N panha-u nsodadu.

PIREKIS – Odja ma bu sa ta falta-m ruspetu.

VERGINHA – Diskulpa-m. N ka xinti si N sa ta ofendeba-bo. Diskulpa-m.

PIREKIS – Ingratu… portunista!

VERGINHA – Pamodi ki bu sa ta fla-m si?

PIREKIS – N teneba bo pa un grandi amigu… komu nha brasu ndreta. N tinha tantu kunfiansa na boi!

VERGINHA – I N foi tanbe senpri fial ku bo.

PIREKIS – Senpri fial ku mi?!… Bu ka sa ta konfundi ku kel fial ki e malgós?

VERGINHA – Splika la midjor.

PIREKIS – Pamodi ki bu dizafia-m na ileison di 13 di Janeru di 1991?

VERGINHA – E ka bo ki da abertura? Bu staba moku, oh?! Ami sinplismenti N konkóre sima kualker sidadon.

PIREKIS – Ami N ka da nenhun abertura. N finji ma N da pa N odja si N ta nganaba Komunidadi Internacional ki staba ku odju riba’l mi. I bu parse so faxi ta koba-m, ta intxi-m di un-monti di nomi.

VERGINHA – E bida, Pirekis! O midjor: e pulítika!

PIREKIS – Nton e pur isu ki bu skrebe un data di lei, N paga-u txada dinheru, dipos bu ben koba-m so fedi, ta intxi-m di ditador i karasku pamodi N aplika-s?

VERGINHA – Bu sa ta papia de ki lei? Kusas e un-monti!

PIREKIS – Purmeru: Di Artigu kuartu di Konstituison di Repúblika ki ta flaba ma nha Partidu e forsa pulítiku, dirijenti di stadu ku sosiadadi.

VERGINHA – I bu atxa ma e mi ki e kulpadu?

PIREKIS – Kenha nton ki e kulpadu? Bu ka fase párti di kumison ki skrebe-l?

VERGINHA – Sikré N fase párti. E ka éra mi-so trimodi!

PIREKIS – I pamodi ki bu ka flaba ma kel artigu kuartu éra prigozu?

VERGINHA – Da-m medu si bu mandaba koreba ku mi di kumison. Mi N staba la pa N ganhaba nha dinheru.

PIREKIS – Materialista! Sen burgónha!

VERGINHA – Materialista nau. Kotelozu.

PIREKIS – Bu foi Porkariador-Jeral di Repúblika kantu Trubunal Popular ku Milísias izistiba…

VERGINHA – Porkariador, nau. N foi Porkurador-Jeral. Mas kenha ki kiria Trubunal Popular ku Malísias, tipu’l kumunista, foi bu Ministru di Djustisa, Dr. Fase Dívida ku Alma Diskansadu.

PIREKIS – Pamodi ki bu ka flaba, na kel altura, ma dotrina di Kumunista ka baleba?

VERGINHA – Mi?! Pa bu Malisianus prende-m, pa julga-m na meiu di ruâ, pa da-m xóki na kes nhas tumatinhu burmedju li?! Arnegu kel kau!

PIREKIS – E kenha ki fase lei i ki konsedja-m pa N toma txon di ses donu, pa N da kenha ki sa ta trabadja-s?

VERGINHA – Bu sa ta papia di lei di kel Rafórma Agrária?

PIREKIS – Aian… N sta.

VERGINHA – Bu paga-m pa N fase.

PIREKIS – Falsu!

VERGINHA – Mas ka foi mi ki manda fase 31 di Agostu na Santanton, nen ki manda trópas kanba na kasa di koitadus, altas óras di noti, pa labanta-s di riba ses kama ku pontapé na kadera i koronhada di AK-M, G3 ku AK-47.

PIREKIS – Kes la foi konsekuensa di kel lei ki bu skrebe.

VERGINHA – Ki bu paga-m pa N skrebe.

PIREKIS – Ki N paga-u pa bu skrebe?!… Nton si bu pagadu pa bu skrebe lei di péna di morti, bu ta skrebe?

VERGINHA – Si grana for txeu… ki ta justifica!

PIREKIS – Aldrabonzeku, gatunu, sen vergonha. I kaba na kanpanha bu kulpa-m, bu fla ma N tortura sidadon…

VERGINHA – E ka si, nton?

PIREKIS – Klaru ki e ka si!

VERGINHA – Nton brajeru ki skrebe livru: "Tortura na Nomi di Partidu Úniku" … tanbe konta kasí?

PIREKIS – Kenha? Kel mankelu, dispentiadu i barbudu?

VERGINHA – Si e mankelu, dispentiadu o barbudu, N ka sabe. So N sabe ma un dus omi ki bu manda pa torturadu konta-l, ma kantu e staba na kadiâ, ma es da-l águ pa e bebe, na baldi ki antis e kokoba na el.

PIREKIS – Ami teoxi N ka foi kasareru, nen guarda di kadiâ.

VERGINHA – Inda ben ki bu papia nisu.

PIREKIS – Inda ben pamodi?

VERGINHA – Kasareru e ka éra armun di un bu Ministru? Di Ministru Sabidu Sukuru?

PIREKIS – I napundi propi ki kamaraaaa… oh, diskulpa. Napundi ki bo bu staba?

VERGINHA – Ami N ka podia faseba nada. Bu katxoris ta farejaba di lonji i es éra txeu, kaba so runhus. Es ka sabeba púrdua i es ka konxeba kusé ki éra rezon. Es ta ajiba pa forsa di arma i pa briu di poder.

PIREKIS – Dja bu skese ma bo éra un des. Enbóra u ki bu sabeba más, éra lenbe-m bóta.

VERGINHA – Na kel-li até N ta konkorda ku bo. Txeus ki rakuza lenbe-u bóta durmi antis di txiga tenpu.

PIREKIS – Da-m pelu menu un próva di es bu mentira.

VERGINHA – Kel ki ta tokaba Funaná!…

PIREKIS – Kál? Kodé di Dóna? O Kaitaninhu? Di kualker un des N gostaba txeu!

VERGINHA – Da pa dodu! I kel-otu ki éra di bu Governu?

PIREKIS – Di nha Governu… ki ta tokaba gaita?! Si e Marloku ki bu kre fla… el e ta toka gitara i e kustuma kanta na Parlamentu, ki N atxa ma e foi kunfiadu dimás.

VERGINHA – N sa ta fla-u di kel ki éra bu Sekretáriu di Stadu.

PIREKIS – Aaan! Sobri kel-la pegadu un suspetu, mas e ka pertenseba nha Partidu!

VERGINHA – Koitadu di Badiu Bokiseru! Komu e ka ta dexada lenbe-u bóta… odja modi ki e pasa. Kabésa ba-l, di tantu soti ki e leba.

PIREKIS – Nos tudu nu sabe ma N ka ten nada a ver ku kel mórti la.

VERGINHA – Ka bu fla «kel mórti la»! U ki bu debe fla, e: «kel asasinatu la».

PIREKIS – Trimodi na Trubunal ka fika provadu.

VERGINHA – Modi ki ta fika provadu?! Ku kel Juíza ki bu manda nomia pa fase julgamentu!… Até ta ruedu ma el e bu fidju!

PIREKIS – Pode fladu kusa ki kredu. Ael ate N gostaba mutu del.

VERGINHA – Del… kenha?

PIREKIS – Di kel ki bu sa ta papia.

VERGINHA – Di Renantinhu?

PIREKIS – Aian.

VERGINHA – Dja N rapara ma bu tene un ramorsinhu ta tromenta-u bu konsénsia.

PIREX – Nha konsénsia sta trankuilu.

VERGINHA – Foi un ditador ki inventa kel frazi li. Bu sabia? Ditadoris teoxi ka ta rakonhese ses kulpa. I alguns propi ta ngaba ses kabésa… ta atxa ma es e erói.

PIREKIS – I kusé ki bu kre flaba sobri mórti di omi ki ta tokaba Funaná?

VERGINHA – Bu sabe pamodi ki e móre?

PIREKIS – N sabe, sin.

VERGINHA – Nton fla la, ku onestidadi, pelu menu so di es bes na bu bida.

PIREKIS – E móre di dizástri, na karu ki e sa ta giaba.

VERGINHA – Aian. Karu éra el ki sa ta giaba. Mas dizástri foi giadu pa otu algen. Bu sabe pamodi, i pa kenha?

PIREKIS – N ta gostaba ki bo bu sabeba.

VERGINHA – Pois, ami N sabe.

PIREKIS – Nton ladra.

VERGINHA – N ka ta ladra pamodi N ka katxor. N ta fla.

PIREKIS – Diskulpa-m, si nhas verdadi sa ta maxuka-u!

VERGINHA – Meiu tiston ka ten troku. Nton, obi: dipos di frónta ki Katxás pasa, di umilhason ku subadju ki e leba di un bu ex-Ministru, ki kobal so fedi la dentu Palásiu di Asenbleia Nasional Popular…

PIREKIS – Ami ki N sabe, e ma kel dizastri kontese na dixida di Téra Branka, dipos di Luar. Kusé nton ki ten aver ku nha ex-Ministru… na Asenbleia Nasional Popular?

VERGINHA – Ezatamenti. Ku kel sépa’l nervu ki e sai ku el, dipos ki e subadjadu i kaba e ka dexadu papia pa e difende se kabésa; i e ka éra purmeru bes ki e sa ta pasaba mal i butuperiadu na mo di bus katxoris i di bu goloriozu Partidu…

PIREKIS – Bu ten provas di kusa ki bu sa ta fla?

VERGINHA – Nhos ka prende-l, nhos fitxa-l na kadiâ, so pamodi e ka dexa-nhos toma-l se konjuntu di toka?

PIREKIS – Abo bu sa ta mustura tudu kusa… pa bu konfundi bu propi kabésa.

VERGINHA – Nhos ka manda trasferi-l pa Santanton, di kastigu, lonji di se família, so pamodi e ka kolabora ku nhos bandidésa?

PIREKIS – Kel-la foi mi?

VERGINHA – Ka foi bo, diretamenti. Mas foi bus katxoris.

PIREKIS – Ka bu meste ki ben ku lérias txeu. Splika-m pamodi ki nha ex-Ministru ten kulpa di se morti?

VERGINHA – Foi pamodi kel-la ki e perde kontrolu ki poi karu ki e sa ta giaba rabida ku el. Sima e sai di dentu di Asenbleia ku kel pilon di nervu, Kodé di Dóna bai papia ku el, e manda un karu pa leba Kodé Sonfransisku, el e soti na di-sel, el ku más dos rapasis, e ranka. Ta ruedu ma un di kes rapasis ki bai xintadu na banku di tras, ma da-l ku po na kabésa, ki po-l perde kontrolu, karu subi buranku rabida ku es.

PIREKIS – Nhor Dés ta da-m paxénxa pa N kustuma ku bus porvokason sen pé nen kabésa.

VERGINHA – Kes algen ki burgónha ka ta fase párti di ses sentimentu, es ka sabe kusé ki e kulpa. Pa es, tudu verdadi ki ta dismaskara-s ses pórka vergonha, e provokason sen fundamentu.

PIREKIS – Na tudu kes kazus ki bu sa ta fla li, senpri julgadu algen. Tantu na kazu “di Katxás”, ku na kel di Rafórma Agrária o na di Renatinhu. I es julgadu pa un Trubunal ki mi N ka éra juis.

• Tags
• #Armindo Tavares
• #Cultura
• #Teatro