Cultura

U ki pasa ku bo, Eloiza

Foi mutu tristi i angustiadu

Pamodi dinheru BINTER rekuza

Salva-u bu vida ki staba en prigu

N odja-bu dentu lantxa steradu

Ta txora dor ta pidi agu

I governu, sen djobe pa ladu

Ki nporta-l si bu sta frontadu

Bu tinha dezeju di serba mai

Mas es dezeju fika li i bo bu bai

Bo ku bu fidju ki nen ka sai

Di dentu'l bo pa na txon kai

Pamodi dinheru ki bu ka tinha

Bu móre prenha sima bu staba

I Governu enves di pidi diskulpa

Ben tenta justifika se patetaria

N odja-u ta txora dizusperadu

Dentu di un lantxa ta pidi agu

Detadu di kósta steradu pan

Sima limária largadu na txon

Ku sedi, dor i sofrimentu

Sen forsa pa bu pintxa bu tormentu

Bu nbarsa mórti ku odju kran

Pabia di un Governu sen korason

Ah Kabu Verdi, ah nos téra,

Ja verdi bu ka e, dja dura

Sta-m ma dja nen bu ka ezisti

Pa bus propi fidju ki bu pari

Bu Téra bendedu pa Xines

Bu Mar npinhadu na Europa

Bu Seu dja feresedu Spanhol

Bu diginidadi dadu Merkanu

Konpitentis e kes ki grita VIVA!

Karton di Militanti bira ses Diploma

Sidadon e kenha ki ta fla SIN SENHOR

Sikre kusa ka sta da-l ku stangu.

Ah, nha téra di bo e duedu

Ku dotoradus tudu bariadu

Ki na ses kurikulu ta sta skrebedu "Ami e militanti di "X" Partidu

Soluson pa bo dja más ka tenedu

Bu dos maridu dexa-u asfikisiadu

Tudu bus braku es dexa tapadu

Dja bu Ar, sta kuazi pa ka raspiradu.

Kel meninu ki strobadu nase

Talves un dia e pode ben serba

Un sientista ki ben inventa

Algun ramedi pa korupuson