Cultura

Bu oliar disliza na mi moda Lua na seu

Na un simplis oliar korpu kaiambra-m

Di bu oliar misteriozu

Surji un sol Maraviliozu

Surizu kai-m

Na meiu di multidon

Bu poi nha kurason para tudu funson

Bo e Bentu ki bentia nha elegansia

Perfumi ki abrasa nha petu

Bus labius sukundi tras di palavras ki nega sai pa fora

Nos dos e armunia na lus

Kriansas ku surizu di mel

Moda paixon na kama di Lua

Nu troka palavras ku oliar

Bo e briliu na labius

Lus suguru

abrasadu na karisias

Lus brilianti na garafa viva ta dirama brindi na nos pe

N ka ten medu di nos

N ten medu si Mundu e ka nos

E Na bu kolu ki e nha txon

E na bu petu ki N planta nha bandera.