Cultura

Cultura

Stória di kusa modi ki bai  

• Por Armindo Martins Tavares
• 8 de Jun de 2022

Nhos dexa di konta mintira / Nhos pára di ngana nosenti / Nhos branda furta kusa di algen / Nhos lenbra nhos mizéria di onti.

Es ben ratorku, xeiu di fúria

Ta djata ku uma bazofariâ

Setadu na es, dadu maioriâ

Es xinta es fase so porkariâ.

Es ben ku tudu ses galantariâ

Mas, uki es fase e so patifariâ

Ki es sabe fase más e piratariâ

Ki ka ta eziji-s txeu sabedoriâ.

Kudada ma es éra midjor

Votadu na es ku tudu amor

Más dentu faxi xintidu dor

Odjadu ma es inda e más pior.

Es djata ma es e konpitenti

Ma tudu es fepu e dotoradu

Kel otu fla ma el e konbatenti

Ma e konxedu e komu balenti.

Es poi konbatenti na Trubunal

Pa bai fla napunde dinheru sta

Mas es fladu pa es dexa di treta

Es simula ntera-l pa nunka más.

Mas antis, es djunta es tersidja-l

Ki es po-l fika kuazi dizorientadu.

Mas e fla ma el e pe di tanbarina

Ma e ka ten medu di stranjeradu.

I dotoradus kudi ku bazofaria:

- Si abo e pe di tanbarina

Anos e matxadinhu d'asu

Ki ta korta pe di tanbarina.

Mas konbatenti nen ka liga-s

I e ka buska nbarka pa E.U.A.

So ku se 150 kontu na banku

E bai pidi gazadju na se armun.

I dotoradus fika riba kanporta

700 kontu es gasta na un jantar

Kusas bendedu dinheru k'odjadu

I pa fuxidu, pasaporti oferesedu.

Mas kantu kusa ben da pa tortu

Komandanti nton dizenteradu

Dotoradu julgadu i kondenadu

Pa e ka ganha más na se bida.

Nton go es bira sima kunbosu

Ki un mudjer so, ten 3 maridu

Kada un más spértu ki kelotu

Es bende te muléta di suste nel.

Es poi ta bende tudu ki es atxa

Ta furta tanbe txon di koitadus

Divogadu matadu nen ka ligadu

I djustisa nburdia na se Segredu.

Mas es xinti ma bóita ka bale

Kes 3 kunbosu djunta poi sabi

I ate un propi ben subi puleru

Ta fladu: ku dukumentu falsu.

Es konxe kati-kati di tudu manera

I sen djobe pa ladu es troka nomi

Mas txeru di ses bósta e ton fedi

Ki aes propi es xinti inkomodadu.

Es bira es tudu ta frekuenta igreja

Relijion katólika ta dadu na Skóla

Igrejas bedju manda konpodu

Santu kebradu, konbatenti kulpadu.

Mas es mundu e ton konplikadu

Ki nun kusa ka ta fika sukundidu

Fladu ma noiba sa ta torna kasa

Ma dja parse mas un nobu noibu.

Dja N pidi Deos pa nobu noibu

Pa e ganha, pa e ben purfidja-m

Pa N ten direitu trabadja tanbe

I pa N ganha sima N ta merese.

N sabe ma txeu sta nkomodadu

Mas mi dja N fla ma N ka ta kala

So N sa ta kritika ses di aldrabisa

Anton e es  ki ten ki ta konpo sta.

Nhos dexa di konta mintira

Nhos pára di ngana nosenti

Nhos branda furta kusa di algen

Nhos lenbra nhos mizéria di onti.

Palmareju, 8 di Junhu di 2022