Cultura

Omis, mudjeris i kriansas
Nu korda, dja txiga ora di labanta
Povus, nasons, konpatriotas
Sigi en frenti es fila retu di speransa
Sima txuba finu na porton di mamai velia
Txuba amigu ki bati dentu di korason

Kunpanherus, militantis, vizionarius
Pintoris di pas i liberdadi
Puetas, skritoris, jornalistas
Porta-vos di umanidadi
Filozofus, storiadioris, ‘Cabralistas'
Muzeu bibu, livrus abertu di nos Eroi

Sidadons, Afrikanus, kabuverdianus
Unidu, mo djuntadu nu Ominajia Cabral
Ladu a ladu, na marxa di soldadus sima e meresi
Nu silebra Sentenariu di Nasimentu di Amilcar Cabral
Nu silebra es personalidadi, i es data markanti
Cabral, poeta vizionariu, pensador

El ki luta, ki studa futuru ki matuta
El ki konbati, ku aima ku pensamentu
El ki uni Afrika, ki konstrui patria
El ki e Lider di storia di Giné ku Kabu Verdi
El un grandi figura Afrikanu
Inblema sinboliku di pas

El konstrutor di igualdadi i identidadi
El ki luta pa nos liberdadi ku dignidadi
El ki da si vida, pa nos indipendensia
Nos rikonhisimentu e premordial
Nos agradisimentu e senpri silebra-l
Nton ka nu kala sima na Asenbleia

Ka nu fitxa odju sima txeu instituison
Ka nu ser kobardu sima Pulitikus
Ka nu ser traidor di nason
Nos menti ka ten korenti
Nos boka ka ten barbitxi
Nos oliar ta trabesa orizonti

Nos arma e forsa di palavras
Vos di povu e dimokrasia
Ku refleksons i filozofia
Amilcal Cabral fla Unidadi i Luta
I mi N kre subi riba di Munti'l Birianda
Pa N ta grita rixu, ma kada un di nos e Cabral.