Cultura

Tanbé pa nha Pursora
Dona Fátima Moreira-Wright
Ki djudam sai di lera
Kantu N’txigaba dentu kalbisera

Oxi N’ta xinti sodadi
Di nha Pursora k’in tinha
Era txuba d’amizadi
Moda Fidjadu ku Madrinha

Pa Ken ki ten ruspetu
Panha un papel ku kaneta
Dja txiga kel mumentu
Fitxa koraji skrebi di bó un karta

Nu da mas valor
Pa tudu nós pursor
Ki nxina-nu ku karinhu
Ki po-nu na kaminhu

És ké Mai ku Pai
Oras ki nu sai ki nu bai
Ki nu txiga dentu sala
És ké porta ku janela

És ké nos spedju
És da-nu txeu konsedju
És ki abri-nu odju
És tratanu moda fidju

Pa ka mingas ku dinheru
Sés trabadju é duru
És tanbé és ta ba merkadu
Ka djobi n’és é pekadu

Gratidon pa nha Pursora
É nha rezan di tud’ora
Oxi lonji li fora
N’ta diklara ku onra

Obrigadu tudu Idukador
Imajina mundu sen idukason
Mas grandi inda é sés korason
N’ta n’tregas na mó di nos Kriador

Gratidon y rispetu di fundu korason!