• Praia
  • 29℃ Praia, Cabo Verde
DOS EX TA KOBA KUNPANHERU – sugundu párti
Cultura

DOS EX TA KOBA KUNPANHERU – sugundu párti

N ka skese ma bu po-m na Trubunal pa N julgadu pa kusa ki N ka fase. Deos paga Enjenheru Iani di Sandumingu, ki labanta firmi na Parlamentu, ki sai di kabésa ku nhos… nhos mondo rabu nho txusi dentu kadera. Bazaliskus! Péna e ki, ka ten nen 2 mês, koitadu di Iani móre séku rusu.

VERGINHA – Bu ka éra juis xintadu na kel kaderóna. Mas éra bus órdi ki ta komandaba. Senténsia éra bo ki ta daba, juis so go ta komunikaba réus.

PIREKIS – Fórti kasi!

VERGINHA – Sokel go! Kasi e bo ki fla.

PIREKIS – Ka tenba Supremu Trubunal ki tinha konpiténsia pa nulaba un senténsia kel ó ki serba mal dadu?

VERGINHA – Tinha.

PIREKIS – Nton pamodi ki e ka nula? E konkorda ku tudu senténsia ki dadu i e konfirma anus di kadiâ ki dadu.

VERGINHA – Tinha Supremu, mé. So ki riba di Supremu tinha un Súper ki éra bo.

PIREKIS – Abo bu ka é pórka-vergónha di brinkadera, nau! (Verginha ta da un grasa na trósa) Ri te bu xuxa! Rostu ma gatu-banhú! (E ta pára un bokadu, e ta spia-l di pe sai kabésa) Bu sa ta lenbra e kenha ki éra Prezidenti di Supremu?

VERGINHA – Mi N sabe! So N sabe ma e ka éra mi.

PIREKIS – Fórti respósta disfarapadu! Propi di algen ki dja ka tene argumentu.

VERGINHA – N ka sabe si Trubunal Supremu konkorda ku kes senténsia, o si se Prezidenti ka xinti medu di durmi sedu dimás, i un sonu purfundu.

PIREKIS – Pamodi el e kobardu. Oliás, senpri e foi. Ael e ka traisueru nobu, nen e ka stapor di brinkadera. Bu ka obi ma e fuxi di géra kantu nu sa ta lutaba na matu pa nu toma nos téra di mo di portugezis?

VERGINHA – Bu sta xeiu e di dor di kutubelu. E ka si mé?

PIREKIS – E klaru ki N sta.

VERGINHA – I pamodi go?

PIREKIS – Pamodi nhos e so sakana. El e un di kes ki djunta ku bo, ki da-m golpi. Nhos e so portunistas, traisuerus i sen burgónha. Nhos foi ton runhu ki te di kasa unde N ta moraba nhos bota-m fóra, sen dor nen piadadi!

VERGINHA – Sen dor, nen piadadi?

PIREKIS – Klaru! Bu da-m un sumana ma bu ta bai po-m nhas kusas na ruâ!

VERGINHA – Algen 15 anu moradu na kasa di genti… inda bu kre moraba más?! Bu ten sórti N ka kobra-bu rénda di kes 15 anu ki bu ten la moradu. N manda so po-bu na ruâ.

PIREKIS – Kobra-m rénda… pamodi? Kasa éra di bo?

VERGINHA – Kasa e di Stadu.

PIREKIS – I Stadu e bu pai? Deos paga nha armun ki da-m gazadju. Sinon N ta bai durmiba baxu Pontu, sima sen abrigu… sima menino di ruâ.

VERGINHA – Ma dja e si bu ta prende ma kasabi ta due!

PIREKIS – Baldubinu! Mantranpilu! Po-m N ta deta noti N ka ta durmi… N ta kuda na nha bida. N bira pior di ki kantu N staba na matu N ta luta kóntra mandrongus.

VERGINHA – Ami go N fika N ta durmi N ta ronka sonu, N ta sunha ma N sa ta odja-u tras di gradi, ku kel bu butxetxóna la ta treme di reiba.

PIREKIS – Pragadu! Maldisoadu! Kain!

VERGINHA – Pragadu e bo ki ka ten dinheru, ki bus trabadju ka ten lus.

PIREKIS – Ka ten lus e bu trabadju ki e so na konta mentira.

VERGINHA – Bakan! Pur isu ki kantu N kóre ku bo bu staba so ku 150 kontu na Banku.

PIREKIS – N staba so ku 150 kontu na Banku, mas teoxi N ka bai roga-u. Teoxi N ka bai pidi-u gran di sal pa N poi na panéla, nen kanéka d’agu pa N bebe.

 VERGINHA (ta ratxa un grasa) – Inda go bu atxa ma un algen ki ten 15 anu ta governa un país komu Purmeru Ministru, ka fase nen kasa pa e mora… guarda so 150 kontu na Banku, ma e pode bebe otu kusa ki ka grogu fedi?

PIREKIS – Pur isu ki bu fika la so 10 anu. Povu kóre ku bo pior ki kóre ku Tagi.

VERGINHA – Nada aver. Mas kantu N sai N bai réta nha kasa… réta nha trabadju. N ka bai pa kasa di nenhun di nhas armun. N sai riku, ku dinheru na Banku. Nha dinheru N ka po-l so na Banku-Kabelu, sima bo.

PIREKIS (ta pára un kóxi) – Si e ka éra algen ki staba li N ta flaba-bo un kusa.

VERGINHA – Mi bu ka ten nada fla-m. N ka ten rabu-padja, N ka pergisozu, N ka buru, N ka malkiriadu. I N ten nha profeson. Amii e dotoradu.

PIREKIS – Mi tanbe N ten profeson. Ningen ka ta tra-m el. Mi e Komandanti.

VERGINHA (ta ri, ta da-l palmada na onbru) – Ten kalma, pá. Bu ka meste ki stressa. (E ta vira, e ta da un pasu) Spera-m N bai kuartu-banhu, N ta ben ja.

PIREKIS – Bai pa Infernu si bu kre! Bagabundu! (Verginha ta da rinkada) Tanbe gosi ningen más ka ta botadu na ruâ. Nha guloriozu Partidu sa ta fase KASA PARA TODOS. Pa tudu algen mora.

VERGINHA (ta torna pára, ta vira rostu) – Pa tudu kes ki e nhos kamarada. (E ta da un grasa) Senpri foi asi!

PIREKIS – Burgónha ki bu ka ten na rostu.

VERGINHA (ta torna da rinkada, ta torna pára, ta volta) – Abo e pa Deos purdua-u! Mas… N ka sabe! Bu ka ta akredita na Deos! Anhos kumunista nhos ka ta akredita ma Deos ten!

PIREKIS – Kalunientu! Pur isu ki nhos manda tra prezus la di kadiâ, nhos poi ben kebra Santu na Igreja, nhos poi ma e nos ki kebra!

VERGINHA – E ka nhos, mé?! So ki nhos nega! Bóka nhos ten bedju!

PIREKIS – Ki ten bóka bedju e bo, ki ate Bispu bu ngana! Omi móre mal ku bo!

VERGINHA – E ka móre nada mal ku mi! Pamodi ki e móre mal ku mi?

PIREKIS – Bu skrebe Lei ki ta fla ma mudjeris pode bota-bariga, bu finka pe na txon bu difende pa e aprovadu na Parlamentu, inda bu tranka uma géra bedju ku un Deputadu ki staba kóntra bo, bu miasa-l ma bu ta rabenta-l.

VERGINHA – Otu bes! Ka foi bo ki paga-m pa N skrebe?

PIREKIS – Pur isu ki kel óra N purgunta-u, si bu pagadu pa bu skrebe Lei sobri péna di morti, si bu ta skrebe, bu kudi-m ma: «Si grana for txeu… ki ta justifika!» Aldrabon! (Verginha ta kanba na kasa di banhu e ta fitxa pórta. Pirekis ta papia el-so) El e traisueru, kaba e ka ten burgónha! Portunista!

Biluka ku Punoi, ta fase planu modi ki es ta tra Pirekis ku Verginbha kartera di bolsu.

BILUKA – Nu bai fika na bulkon, óras ki e ben di kuartu-banhu nu ta gamá-s kartera. Bu ta tra un, N ta tra kel-otu. Nu ta tra tudu dinheru, nu ta mete kartera di un na bolsu di kel-otu.

PUNOI – Iá! Ta bai ser un bon tiatu entri es.

BILUKA – Tanbe, ta parse ma es e dos bon ator.

PUNOI – Bu sabe kusé ki Deretor di “TACV” fase nha armun na kel últimu ileison ki Pirekis nganhaba Verginha?

BILUKA – Nau! Kusé ki e fase-l?

PUNOI – Nha armun fla-l ma e vota na Pirekis, e da nha armun un pasaji di bai ku ben, e paga-l otel pa 30 diâ, pa e bai pasa féria la Boa Vista. Nha armun go, nen ka votaba na Pirekis. E votaba na Verginha.

BILUKA – Aes e so palhasu!

PUNOI – Palhasu i gatunu.

Verginha ta volta di kasa di banhu, ta ben ta taka kalsa. E ta atxa Pirekis ta papia el-so.

PIREKIS – Bandidu ki até se rapasis e uza sima uza «kamizinha». Kantu e uza-s te ki e kaba, e fulia-s la pa boronsera.

VERGINHA – Bo bu sa ta papia bo-so, mos?! N ka ta seta ma dja bu bira ta fuma?! Moku N sabe ma bu ka sta… pamodi un sereja inda ka ta moka-u.

PIREKIS – Mas kes palérmas, komu nenhun des ka ten burgónha, sima bo, nhos torna poi sabi ku kunpanheru, nhos konloia… kel bóka ma pitada ki panha tronbozu konsegi txiga la unde ki e sta.

VERGINHA – E txiga la, pamodi el e konpitenti. Nos e so dotoradus.

PIREKIS (dimiradu) – So dotoradus! (E ta labanta rostu e ta djobe-l dentu d’odju) N sta li N ta fase paródia ku bo, mas ka bu pensa ma N skese kusé ki bu fase-m.

VERGINHA – Kusé ki N fase-u?

PIREKIS – N ka skese ma bu po-m na Trubunal pa N julgadu pa kusa ki N ka fase. Deos paga Enjenheru Iani di Sandumingu, ki labanta firmi na Parlamentu, ki sai di kabésa ku nhos… nhos mondo rabu nho txusi dentu kadera. Bazaliskus! Péna e ki, ka ten nen 2 mês, koitadu di Iani móre séku rusu.

VERGINHA – Bu gosta di rankor! Ami ki debia staba ku rankor di bo… N ka sta!

PIREKIS – E ka rankor, kamarada…

VERGINHA – Modi?! Bu sta txoma-m kamarada?!

PIREKIS – Diskulpa. N skese ma nhos ka ta kurti kel palavra li. Ma nhos ka gosta pa nu ta uza-l.

VERGINHA – Teoxi nu ka fla pa ka uza palavra «kamarada». E ki anhos nhos ta txoma tudu algen di «kamarada», mas nhos ta trata pokus komu «kamarada».

Biluka ku Punoi ta prosima di bulkon, es ta fika kada un, pertu di un des.

BILUKA (pa Enpregada) – Da-nu dos garafa di Spraiti.

E ta paga, e ta toma un e ta da Punoi kel otu. E ta sukudi di-sel ngatxadu, e ta fika na meiu di Pirekis ku Verginha, e ta fla Enpregada pa abri-l el. Enpregada ta stika mo, ta poi txabi na tanpa ta abri, skuma ta trintxa, ta modja Pirekis ki Verginhas ses kamisa. Biluka ku Punoi ta fase ma dja es spanta, ma dja es trapadja, es ta finji ma es sa ta linpa-s kamisa, es ta purbeta, es ta furta-s kartera. Es ta sai na ruâ, es ta dispixa kartera, es ta torna kanba, es ta finji ma es sa ta djobe si kamisa inda sta modjadu, es ta purbeta mete kartera di un na bolsu di kel otu, es ta dispidi es ta sai.

PIREKIS (pa Enpregada) – Tarse kónta, pur favor.

VERGINHA – Mi ki ta paga.

PIREKIS – Nau, senhor. Kónta e mi ki ta paga.

VERGINHA – Nau, senhor. Dja N fla-u ma e mi ki ta paga.

PIREKIS (ta tra kartera ta abri) – Makusé»!… Kel-li N ka ta kredita!…

VERGINHA – Kusé?

PIREKIS – N ka tene dinheru na kartera?!

VERGINHA – Dexa star. N ta paga ami.

PIREKIS – Mas ami N tinha dinheru.

Enpregada ta tarse kónta nun papel, dentu di un piris, ta poi riba bulkon.

VERGINHA – Ka bu fadiga. Debe ser ki bu 150 kontu dja kaba, bu ka da kónta.

PIREKIS – N k asta na brinkadera!

VERGINHA – Dja N xinti ma bu k asta na brinkadera.

PIREKIS – Nha dinheru ten ki ta parse gosi li propi.

VERGINHA – Txoma Milísia! (E ta ratxa grasa) Bu sa ta odja?! Si bu fikaba ta bebeba so grogu… podia ser ki inda restaba-bo algun tistonsinhu. Mas dexa star ki N ta paga! (Pa Enpregada) Tarse más dos sereveja.

PIREKIS – Ami N ka kre. Kusa ki N kre sabe, e modi ki dinheru disparse-m di dentu’l kartera… mi ku bo li nos dos?!

VERGINHA – N ta paga kónta, omi! Bu ka meste pokenta. Ka ten krizi!

PIREKIS – Mi N sabe ma N tinha dinheru. Algen ki tra.

VERGINHA – N ka ta akridita ma bu sa ta diskúnfia di mi?

PIREKIS – Si N diskúnfia N ten rezon. E ka pumeru bes ki bu sta tra-m u ki e di-meu.

VERGINHA (pa Enpregada) – Diskulpa, joven. E kantu ki e kónta?

ENPREGADA – Un grogu, sinkuénta merés; dos sereveja Stréla, oitenta merés kada, sentisasenta… ta da duzentus i dés.

VERGINHA – Ok. N ta paga. N ta paga, nu ta bai nos kaminhu. Dja N xinti ma bu sa ta kre falta-m!… (E ta tra kartera e ta abri, e ta spanta) Algen furta-m dinheru na kartera?

PIREKIS – Da pa spertu! N ka sabe kenha ki bu kre ngana?

VERGINHA – N ka tene nun tiston na kartera! (E ta rapara na kartera ki Pirekis tene na mo) Pára si… kel kartera la ki bu tene na mo e di-meu!

PIREKIS (ta odja na kel ki Verginha tene) – Kel ki bu tene la tanbe e di-meu.

VERGINHA – Bu furta-m nha kartera, Pirekis?! Más un bes, bu torna furta-m?!

PIREKIS – Mi?! Nton bo tanbe bu furta-m.

VERGINHA – Bu ka e pirata di brinkadera, mos! Bu furta-m dos bes na urna… ago pa bu ben roba-m kartera di bolsu?!

Partilhe esta notícia