Cultura

E na bu petu ki nha vinhu ta skori
Universu dividi ku mi gritu di korason
Nha imuson karega korason
N xinti toki N xinti arepiu

E na bu beju ki txuba nansi
Atimusfera brilia ku kristal di seduson
N xinti ritimu suavi i sensual
Ta flutua na bentu

Na meludia di bus labius
Sen bluza sen kotxon
Na kanbar di bu brasu
Sen kaisinha sen sution

Bu duspi-m na bu prizensa
Kama di areia
Lua na seiu
Alma ta fremi

Bu murgudja na mi ku presa
Manta na praia
Strela na meiu
Biku ta tremi

Bu dexa-m nua di prazer
Na tenpural di amor
Nha kama modjadu di silensiu
Kubridu di sentimentu

N splora bu orizonti di lokura
Ku ansiedadi i dosura
Na prufundeza di nha perna
Subi ondia ku spuma
Ki borota na rubera di nha frakeza

Nha korpu stendedu na dizeju
Romansi di nha bexu
Pidi mas karisia mas intensu
Ardenti na bu oliar
Nos xama fazi vulkon

Pensamentu na tenpu
Furia di paxon nos tras
Ta okestra flor di nos lasu
Kontenti ku bu andar
Nos pasu bira kanson

Bu lonbu na mi
N xinti-u ku mi
N abrasa seu
Nos kalor bira un so
Bo dentu mi, mi penetradu na bo
Ku jemidu di nha kretxeu

Si mi N ka anju
Batiza-m novamenti
Pa N ama-bu mas ki ningen
Si mi e bu fetisiu o bu tentason

Dexa-m libri pa N skodji nha kantu
K'e na infernu di bu petu
So la ki ten fogu di artifisiu
Ku lava di nos amor