Cultura

Cultura

⚜️AMILCAR CABRAL ⚜️

• Por Águeda Lopes
• 21 de Jan de 2023

Soris dja baza txeu / Nu longa mo pa nos armun / Pa luta / fika meresidu / Nu ser Otor di nos distinu

Kabu-Verdi di CABRAL
CABRAL di nos povu
Di nos bandera
CABRAL di nos mar
Mar azul divinu
Sima bu bandera di seu
Kabu verdi di speransa
Cabo verde di CABRAL

Ku butuperiu na petu
Dexa-m dizenha-u
Ku odju fitxadu,
Dexa-m imajina-u
Inventa bu meludia ki dobra nha kurason na spera pa kanta-u bu gloria
N kre skrevi
Bu Solidon pasasu ki da-u koraji ki nasi frutu di speransa
Pa N skrebe-u bu vitória
Bu storia

Storia
N kre luta na bu ladu
Na diginidadi di un pai ku mai
Na koraji di un lutador
Na sonbra di sol
Ku kultura i konpaxon
Di bu berdura kultivadu ku amor

Kabu-Verdi na livru di storia
Bo e matrikuladu
Bo e grandi i gloriozu
Bu kaminhus bu andal lonji e txeu pa bu ganha bu liberdadi
Bu surizu partikular
Limia nos odju na sukuru
Bo e mai natureza ki kria pon pa fidju nen Si for na ladera
Nos e mistura di un povu
Tamanhu ardenti
Korason kenti

Nu salta rubera i oseanus
Mas ku speransa na koba di nos mo
Nu ten seduson ku morabeza
Nos e briliu di strelas
kosta largu pa konta viaji
Nos e 10 grains di areia ta parsi la di seu
Mas nos pe finkadu na txon ta labanta nos bandera altu na seu

CABRAL menti forti
Omi eleganti
Amanti di palavras
Omi sabiu
ki labanta mo pa Riba
Lus di dia dozi di setenbru
1924
Rais di tera furakon
ki jara na ventri abensuadu
Biku de Guiné
Ki durba tenpu ku sabidoria
E abri porta
Dia 5 juliu de 1975
pa un novu kontinuason
E luta pa nos indipendensia

Soris dja baza txeu
Nu longa mo pa nos armun
Pa luta fika meresidu
Nu ser Otor di nos distinu
kaneta na mo
Ruspetadu
Nu dexa barku dansa na muzika di briza
Rizus di kriansa na kintal
Nu ser rais di un novu komesu
Nos e tudu Cabral
Viva CABRAL
Viva juliu
Viva nos luta
Mi e netu di Cabral

20 di janeru di anu 2023.