Colunista

Demokrasiâ na txon di asnu

Ka nun blá-blá di brinkadera

Ta skesedu del duranti 5 anu

Tufudjadu dentu’l boronsera

Povu tersidjadu di tudu manera

Burus na puleru ta fase asnera

Ta studa fórma di konta mentira

Pa es kontínua senpri la ta sura.

Na tenpu kanpanha es ta oferese

Tudu i kualker kusa numa skarera

Es ta dadu votu sen ki es merese

So es xinta, es fase di ses manera.

Es ta intxi koitadus di bebedera

Ta po-s bai urna numa skarera

Si es ka dexadu vota es ta géra

Es ka ta nporta si ratxa-s kadera.

Standu moku ka ta dadu kónta

Ma ses diskursu e tudu batóta

Pobri es ta trata más pior ki bósta

Sime ta briga pa es riba kanporta

Es papia na separason di puder

Nu odja kunbinason di ka serius

Governu pa ka mexe ku djustisa

Djustisa ka ta mexe ku Governu.

Sta klaru ma separason di puder

E konloiason di puder kamufladu

Governu ta skodje se propi fiskal

E ta paga ben pagu pa ka xatia-l.

Na txon unde ki Governu ta aldraba,

Ki djustiserus ta falsifika dukumentu,

Otoridadis ta ezukuta nosenti pa sisí

País dja sta anda di «éka», sen «ku».

Palmareju, 21 di Otubru di 2022

Armindo Martins Tavares