Cultura

Mudjer ti kaba na nada
Onrada i amada
E bo mai, prizenti di Nhordes

Merkador pode po-u presu en meres
Klienti pode pidi paga pa mes
Diskudadu pode da pa burges
I buska-u pa freges
Mas bu valor e mididu na balansa di Nhordes

Na seu di Atlantiku bo e strelha brilhanti
Ku brilhu mas klaru ki kristal o diamanti
Bo e oru pulidu
Diskansu di bu maridu
Manta di mundu
Kubertor di bu fidju

Algun mesmu sen omi pa djuda leba karga
Fase sakrifisiu ti ki ntorta ndjarga
Korpu kria bulun
Fika ku dor na kundundun
Mas kria fidju sen saita tapun

Novi mes na tera di diskonhisidu
Ta spera djazigu pa dixi pa es mundu
Sen globu, sen mapa pa ponta kaminhu
Ka faita-nu amor, amizadi i karinhu

Bu po-nu na ragas
Ti ki nu da minina ku rapas
Bu da-nu kana, bu kume bagas
Bu da-nu midju, bu kume sorodju
Bu konko-nu senpri pa nu abri odju
Pa nu libra ki kuensakuensa
Pa nu ka txiga na musan d’argen

Pa nu kria i pa nu da bon argen
Bu nsoila-nu petu ku kadanfran
Bu konsedju tra-nu di mau asan
Pa nu konserba bon nomi di nos rasa ku nos djerasan

Bu sedju ta mamanta mundu
Bu palavra e orbadju ki ta rega bida seku
E purfumu pa da bon txeru pa dizanimadu
E agu ki ta tra sedi di viajanti kansadu
Bu mo e di obreru di amor ku djustisa

Ku dor bu traze-nu pa es mundu di Adon
O ki nu pupa bu ta mara kordon
Da vida i amor e bu don
Mas na fin bu ta resebe ingratidon
Na bedjisa bu ta bai pa lar di solidon
Pa bu txora bu distinu di sufrimentu sen mondon
Mas bu filisidadi e na dia di gloria
Ki bu ta odja bu fidju, frutu di bu storia
Riba mar di vidru ta kanta vitoria
Ta izalta Nhordes, ta fase-u didikatoria

Na tera ki oru des mundu e skoria
Bu nomi skrebedu na libru di mimoria
E mas aitu lovor pa un mortal
Ki Kristu na si dia ta torna imortal

Grandi des mundu e izaltadu
Gentis di talentu e adoradu
Gentis di fama e idolatradu
Bo txeu bes e mal amadu

Mas bu obra di amor
Musturadu ku dor
Sta na palmu di mo di Nhordes
I na dia di bu rikonpensa
Ningen ka ta atxa rabes

Mai, Rainha di lar
Prizenti di Nhordes