• Praia
  • 29℃ Praia, Cabo Verde
Nos Fartura   
Cultura

Nos Fartura  

Jogu na rilason ka ta dexa vitoria / Nen momentus sabi pa konta storia! / Kumida nha kudjer e pa dos / I fartura ta xintidu oji i dipos!

E inpusivel kalkansa filisidadi

Si amargura sta koronpi bu identidadi.

Futuru é un lugar lonji i opaku, pa undi nu debi kaminha sen fadiga!

E un paraizu undi kenha ki ka ten amor propriu ka ta txiga.

Ka bu djobi spinhu na gatu

Nen unha na pexi.

Ka bu korta agu ku xizatu

Nen ka bu spera ma montanha kre mexi!

Salgadu mar ka ta xinti

Kenti sol ka ta fla m’é kenti

Modjadu txuba ta dispensa…

Na kuza dretu, ningen ka sta pensa!

 

Pikinoti ka ta kredu pa fazi par

Pamodi tamanhu podi divididu.

Rapidu ta para divagar, divagar

Ti ki ta mori na ora difinidu.

 

Sabi sen asukra e sabi ti fin di tenpu.

Mas margos ku asukra e sabi ti iluzon dispixa.

Grilu ka podi txomadu di lagartixa

Nen gatu di onsa

I nen saia di kalsa.

Kenha ki e runhu ka ta konpu.

Kama nunka durmi sakedu

Bananera nunka pari detadu!

 

Xikoti sen forsa di omi ka ta xikotia

Mo sen vontadi ka ta bota.

Kurason sen maldadi ka ta fri

Nen beju sen un objetivu ka ta ri.

 

Kabesa sen pensamentu nada ka ta finji.

Amor verdaderu mal ka ta atinji

Tera ta tremi, rotxa ta ronba, vulkon ta spludi

Mas kurason ka ta vibra nen ka ta duesi

Pamodi na mundu di Amor

so rispetu ki ta guverna tudu,

ki ta planta un jardin di flor

i ta silensia magua skesidu!

 

Jogu na rilason ka ta dexa vitoria

Nen momentus sabi pa konta storia!

Kumida nha kudjer e pa dos

I fartura ta xintidu oji i dipos!

 

 

 

 

 

Partilhe esta notícia