Cultura

Sidadi velia,
Na bu petu
Sen pekadu
N kre diskubri i vivi
N kre kurva i purba
Folgu para-m
Ben buska-m
Perta-m i ama-m

N kre faze amor
Nes por di sol
sen rizistensia na txon di Sidadi velia sen sandalia
N kre xinti dosura pura

Sidadi velia,
Na bu petu

Bu trazi mas ki palavras
Bu trazi majia i fantazia
Bu trazi buluzia i alegria
kamoka na lata,
Bu trazi mas ki paxon na bu bexu, Mel na odju
Bu trazi amor na lensol
Bo e nha sol

Bu ama-m di noiba na rua di sidadi velia
Nha korason ta jira
Bu prinda melodia na nha obidu i kultiva dia
pa entragas di puezia
Koxa di fregezia
Ta fazi amor ku matimatika

Nha Sidadi velia di saia kunpridu,
di txapeu kor di oru
Di andar sensual
Di lus di Natal
Lus spiritual
Mudjer di tripa linpu
Amanti di tenpu
Di prizensa i ezensia
Nua na tranparensia
Bunita sima folia di siensia

Nen si N korda sen bu amor ta lapi na tetu
N ta manxi na bu petu
Odju ku odju ta infrenta vontadi
Baxu'l strela di intimidadi
Dja nu ten idadi i maturidadi
Nos porta di fuga e fitxadu na petu sen eku

Nu selebra amor prizenti
Ki xinta na meza ku sedi
Nu prinxi nos kalindariu, lijendariu
Ku ERANSA di rasa

Nha sidadi di petu
N kre vivi i dividi
Nhas fatiotas
grasas i pureza
Nha alma nunka fitxa porta di Aliansa amor e bazi
Familia e tudu
Tudu nha tudu e nha ERANSA.