Korda, mos; korda bu labánta

Cultura

Sin, JMN ten STRIBILIN grandi! Mas, un "BADJON" ti Sol kanba otu dia... nada mau!

Era un grandi multidon. Algen ki txiga di tudu Sidádi, di tudu aldeia, di tudu ladu. Ómis, mudjeris, adultus, stranjêrus, toma konta di Txada Sant'Antoni, na Praia. Tudu kel largu frenti di palàsiu di AN i BCV staba pan d'algén. Na spreson di kada rostu,un grandi spluzon di alegria: gritu, djátu, txoru; e imuson ki râpia algén kabel'na korpu. Povu Toma Posi di Txada ki Pulisia fitxa stráda di Poeta ti entráda Cruz di Papa, pa tenta kontrola tudu kel mar di jenti. Mas, pamodi go? Sen kumunika, sen artikula ku Organizason, Tubaron Nhonhó konloiádu ku Kwame Gamal traze di Santa Katrina Tabanka di Mato Baxu, di Txan-di-Tanki, di Mato Sanxu, i Batukaderas di Trabésa Baxo. Pa dizaforu, Narciso Freire rozolve traze grupu OTACA. 'A-viva' forsa, Txitxu kre mostra kel pésa Fomi47, na AN. Mesmu kusa kontise na Praia: Paula Moeda djunta ku Geko Moniz, Pedro João, Djy di Tanbra, mobiliza Tabánka di Txada Grande, Txada Sant'Antoni, di Várzia nun strondozu disfili kultural ki intupi subida di Bonba, borôta stráda d'asésu pa Poeta. Riba Txada es resebedu ku txabéta di Batukaderas Nôs Eransa, Tradison di Tera, Raís di Taráfi, nun palku, i notu palku, Kotxi-po, ku fidjus di Kodé di Dona. Mas, lumi pega propi ku Josina Fortes. E traze di Soncent 2 BestFly te-pó di Mandingas di Ribêra-Bote. Uma lokura na Kapital; un verdaderu izérsitu, krintxa, xeiu di briu, i nun ritimu iletrizanti toma kontaTxada Sant'Antoni. Enfin, era 1 Txada, ku 2 sensason, a volta di 1 úniku Ómi. La dentu un sensason sériu, diskursu soleni i linhabádu, protokolu rixu. Li fora, na ruâ, tudu spontâniu; dibáxu fogeti ku fogu d'artifisiu, un inpresionanti multidon, di povu umildi alegri, barudjéntu, ta sána, ta kanta diskontroladamenti, ta badja, ta nbrása kunpanheru. Na meiu kel balbúrdia, Olimpio Varela labanta un Bandera Spiga ku imuson i ku lágua, kantandu ku multidon <<Sol, Suor, Verde e Mar...>> ti finda.

Dentu sabura N rapikadu palmáda na kosta

- Benvindo, korda mos; labanta bu sta sunha!

N salta prikiti:

- Sunha klaru si, judith Tavares ?

- Abó Tomáda di Pósi e ti tersa-fera, 9.

...

Sin, JMN ten STRIBILIN grandi! Mas, un "BADJON" ti Sol kanba otu dia... nada mau!

Artigo anterior