Pub
Por: Selson Batalha

 Selson Batalha1

Nha tera di bo dja e duedu

Porta sta na seti txabi trankadu

Abridu so pa kenha ke ferenha

Strangerus dja ka mesti senha

Nha tera bira moda kobon di zupu

Kolonus kumi tudu nos pexi

Es dexa so kraki na karaka

Mosinhus fika tudu raboitadu

 

       Tera dja bira moda odju verdi

       Na rostu di alguen galanti

       Sen sirbintia pa nada...

 

Txuba dja ka sta sima era antis

Midju burmedju ki ben di Argentina

Ka teni tutanu pa kakera nos mininus

No fika disgobernadu moda

Djandjan na kutelu ta sumara vapor

Pa traka na baía Praia Santa Maria

Pa trazenu txas kan pingu speransa

 

Norti ku sul ka sta ta fila mas

So ganânsia mundu

Kulpa podu na BADIU

Pabia kor di peli ki no erda di mai Afrika

Djes kre sipara pabia sotaki ke diferenti

Es tratanu di strangeru na nos propi tera

    

         Es skesi ma buru si pasu e markadu

         Ma santxu ka konxi markason

         Mas e tras di katxu ke mandukada

         Nhos lenbra ma bói kangadu pila e paradu

         Ago si nhos ka medu pila kana

         Nos tanbi no ka medu torsi bagaz

 

Tera dja bira karegadu ódiu

Barku en bez di trazi arós

Trazi so notisia di morti

No fika moda kaza di dos porta

Se abridu un kelotu ten ki fitxadu

Pabia inveja ku kubisa

Sta pior ki katxor di kunbosa.

 

DATA: 22 DI JANERU DI 19

ORA: 18:00 DI TARDI

Comentários  

+1 # Ladmir 24-01-2019 15:01
Sensacional mt bem escrebedo parabéns
Responder
+1 # Kriolu kauberdianu 24-01-2019 14:42
Bali!
Letrax fortiz, i kada bez ki nu pranunsiax ta fikanu trankadu baxu lingua pamo sta ratrata rialidadi di tera.
Ben konbersadu!
Puezia bunitu'l di le i rale!
Parabens
Responder
+2 # Maria Tavares 23-01-2019 15:16
Parabéns! Muito bonito!
Responder