Cultura

VII SÉNA

Mariâ ta sta el-so, tristi, ku rostu na txon ta pensa, ta obidu se monólugu intirior.

MARIÂ [V.O.] — «Si bu obi fladu ma dja N móre, ka bu stranha, kifari pa bu txora, pamodi N ta ntupi-bu odju ku po-di-finadu. N julgaba ma bo éra mudjer di nha bida, mas N da kónta ma bu ka ta sirbi nen pa bu toma kónta di nhas limária, kantumás pa bu toma kónta di un ómi, ku rasponsabilidadi di un kasa. I filismenti N pursebe sédu ma bu ka ta npresta. Bu ta arma en relijioza pa bu pode ngana makaku. Sen burgonha, bu ta fla-m pa N ka meste ki mula nha faka, pamodi ma bu ka ta dexa-m mata-u bu porku. Bo bu kuda ma mi e di kes tolobasku ki ta kasa ku mudjer sen ki da-l próva purmeru, pa e bai atxa-l bedja pa rapasis fika ta fase txokóta? I prajá bu sta bédja. Si bo éra nobu bu ta daba mi prova kantu N pidi-u. Mas fase di kónta ma tioxi nu ka konxe kunpanheru i, si bu kontra ku mi na nha kaminhu, ka bu djobe-m, kifari pa bu papia ku mi. Sinon, N ta rabenta-u nhéfa. Fika ta sabe ma N tene nha noiba pa N kasa ku el, i ma N ka kre pa bu nkomada-l na se kaminhu. El e más bunita di ki bo, e más xodibóla, e más raskoâ i e ten tirsera klasi di skóla. N sa ta kre-l tantu txeu, ki tudu bes ki N xinti óndia di mar ta kebra na reia, ta konpara-m se folgu kenti tras di nha totis. Tudu bes ki N odja luâ rodondu ta limia na Seu, ta parse-m ma e se odju grós ki sa ta spia-m di l adi riba Monti Biziâ. Ael e ka sima bo ki tene nterese na mi, so pamodi N fla-u ma N tene djáki gordu pa N bendi, ma N tene kaboku kobadu pa N fase kasa, ku kalda ta stila pa N fase grogu. I pa N tirmina, N kre dexa-u fika ta sabe, ma si Nhor Dés dja kre, pa dos di Febreru N sa ta bai fésta la Sandumingu, mi ku nha noiba, mudjer di nha bida».

DENXU BARBA (ta txiga, Mariâ ta ben na el, ta labanta rostu ta djobe-l tan, ku odju maguadu) — E módi, Mariâ? (Denxu Barba ta finji ma e ka sabe di nada, ma e sta spantadu) Kel-li e kusé, Mariâ? Karta ka staba ben skrebedu?

Mariâ ta longa-l karta sen fla-l nada, e ta toma e ta finji ma e sa ta le dentu del.

DENXU BARBA [V.O.] — «Si bu obi fladu ma dja N móre, ka bu stranha, kifari pa bu txora, pamodi N ta ntupi-bu odju ku po-di-finadu. N julgaba ma bo éra mudjer di nha bida, mas N da kónta ma bu ka ta sirbi nen pa bu toma kónta di nhas limária, kantumás pa bu toma kónta di un ómi, ku rasponsabilidadi di un kasa. I filismenti N pursebe sédu ma bu ka ta npresta. Bu ta arma en relijioza pa bu pode ngana makaku. Sen burgonha, bu ta fla-m pa N ka meste ki mula nha faka, pamodi ma bu ka ta dexa-m mata-u bu porku. Bo bu kuda ma mi e di kes tolobasku ki ta kasa ku mudjer sen ki da-l próva purmeru, pa e bai atxa-l bedja pa rapasis fika ta fase txokóta? I prajá bu sta bédja. Si bo éra nobu bu ta daba mi prova kantu N pidi-u. Mas fase di kónta ma tioxi nu ka konxe kunpanheru i, si bu kontra ku mi na nha kaminhu, ka bu djobe-m, kifari pa bu papia ku mi. Sinon, N ta rabenta-u nhéfa. Fika ta sabe ma N tene nha noiba pa N kasa ku el, i ma N ka kre pa bu nkomada-l na se kaminhu. El e más bunita di ki bo, e más xodibóla, e más raskoâ i e ten tirsera klasi di skóla. N sa ta kre-l tantu txeu, ki tudu bes ki N xinti óndia di mar ta kebra na reia, ta konpara-m se folgu kenti tras di nha totis. Tudu bes ki N odja luâ rodondu ta limia na Seu, ta parse-m ma e se odju grós ki sa ta spia-m di l adi riba Monti Biziâ. Ael e ka sima bo ki tene nterese na mi, so pamodi N fla-u ma N tene djáki gordu pa N bendi, ma N tene kaboku kobadu pa N fase kasa, ku kalda ta stila pa N fase grogu. I pa N tirmina, N kre dexa-u fika ta sabe, ma si Nhor Dés dja kre, pa dos di Febreru N sa ta bai fésta la Sandumingu, mi ku nha noiba, mudjer di nha bida».

DENXU BARBA — Ave-mariâ, Mariâ! Kel-li e kusa ki un omi ten koraji fase un mudjer?!

MARIÂ — Migo! Sikré e pode fla tudu kusa di mi. Mas N ka resta, N ka ta resta. Sima na dóna ta flaba, si lensu e txeu, txapeu e bastanti.

DENXU BARBA — Pedrinhu ngana-m. Ngana-nu nos moku. Sima e ta parse sondongu, la?!

MARIÂ — E ta finji sondongu pa e pode ngana fidju kiriatura. Mas e di kes ki ta tra garsa obi na kadera, na altura ta buâ.

DENXU BARBA — Ami e ngana-m! Te gosi li inda, N ta njuraba pa el… N ta poba dedu na lumi pa el.

MARIÂ — Tanbe bu ta rapendeba!

DENXU BARBA — Náaa! Mi li… teoxi N ta imanjinaba ma e tenba tudu kel stúsia li na se sénsia.

MARIÂ — Dja fladu ma omi e so katxor, e si mé.

DENXU BARBA — Mariâ, kusa di es mundu ka ta ntendedu. Abo bu tene bu dor gosi, bu sa ta fla ma omi e so katxor; ami tanbe, N ten nha rezon, ki N pode flaba ma mudjer e so katxó… (e ta pára e ta kosa kabésa) e tudu kabale. Ami tanbe dja N kustuma pasa u ki bu sta pasa.

MARIÂ — Nen ka bu dezeja!

DENXU BARBA — Ami dja N debeba staba kasadu más di sais mes atras.

MARIÂ — I pamodi ki bu ka kasa nton?

DENXU BARBA — Mariâ… mi ku tudu kusa purparadu, ki diâ di kasamentu markadu, tudu mundu kunbidadu, N pega nha noiba nbarsadu ku un xofer di baskulanti. Inda kaba e koba-m so fédi, e fla-m si e parse ku mudjer ki ta kasa ku omi ki so sabe fase gabion ku diki na ladera.

MARIÂ — Denxu Barba!!!

DENXU BARBA — Ñeee! E so pa bu odja. Mas N ka ta fla ma tudu mudjer e si ki fetu.

MARIÂ — E sima bu fla mé.

DENXU BARBA — Mariâ, pa N purgunta-bu un kusa?

MARIÂ — Bu pode purgunta.

DENXU BARBA — Bu gosta txeu di Pedrinhu?

MARIÂ — N ka ta konta-u kasi. N gosta txeu del, sin.

DENXU BARBA — Mundu go e bénba mé! Kenha ki ka ta merese… o ki ka meste ki ta atxa. Ami N ka sabe kusé ki Pedrinhu atxa ma e tem más midjor di ki bo!

MARIÂ — Sta-m propi ma e ka debe sta bon di kabésa.

DENXU BARBA — Kel go… N ta garanti-u ma e sta. I ma tanbe e sta kontenti… felis di se bida. So ki, ma e tene otu ménbra… e ka kunfia fla-m. Gosi go ki dja N pursebe.

MARIÂ — Si Nhor Dés dja kre… tanbe al parse algun omi pa kasa ku mi.

DENXU BARBA — Mariâ, ami N ta fla-u klaru: kusa ki bu sa ta pasa gosi-li, ami dja N pasa-l tanbe. Kantu ki kontese ku mi, kuazi ki N njura ma nunka más N ka ta kre algen, ma nunka más N ka ta ama, ma nunca más n ka ta kasa. Mas, si bu kre, pa bu mostra Pedrinhu, i ami pa N mostra kel sumera ma nu ka resta, N kre pa nu kasa mi ku bo! Komu es ka meste-nu, nu ta mostra-s ma nos nu meste kunpanheru!

MARIÂ — Nau. Ka ta da. Ami inda N ka sabe si e ka ta ben rapende!

DENXU BARBA — Bu ka sabe si e ka ta bem rapende?! Di tudu kel kusa ki e fase-u li, bu ten koraju di purdua-l, si algun diâ kel se dotóra larga-l?

MARIÂ — Denxu, albes nu ta fase kusa sen nu pensa… sen nu xinti, poku tenpu nu ta rapende. Pode ser ki e fase-m si, mas ki di li un dos diâ e rapende, e ben kóre nha tras pa e pidi-m perdon.

DENXU BARBA — Bu ta purdua-l propi?

MARIÂ — Si Kristu purdua kes ki mata-l na krús… kenha ki e nos pekador pa nu ka purdua kelotu?

DENXU BARBA — Dja N rapara ma bu sta dizatinadu… ma bo e ka kapás di ama ningen na mundu ki ka el.

MARIÂ — Nau. Bu sta nganadu. Imanjina tanbe, ki so pa N vinga del, N ben ranja ku bo gosi li… i dos diâ ka ben da sertu!

DENXU BARBA — So si e pa bu ladu ki ka ta da sertu. Komu N ka ten sórti ku mudjer!

MARIÂ — E ka fla ma e sa ta ben fésta di dos di Febreru?! Óras ki e ben N ta tra próva. Si e ka liga-m… sima e fla… talbes N pode ranja ku bo.

DENXU BARBA — Ka bu fla-m ma bu ta bai kóre tras di omi ki ka meste-u?

MARIÂ — Ami N ka ta bai kóre se tras. Mas si e txoma-m… N ta kudi-l.

Bu ta kudi-l?!

MARIÂ — N ta kudi-l, nton go N pode diskulpa-l kára-a-kára.

DENXU BARBA — Mesmu si bu odja-l djuntu ku se ménbra bu ta bai papia ku el?

MARIÂ — Kel go… nen pa e ka miasa txoma-m. Parse-m ma N ta durba-l ku penedu.

DENXU BARBA — Nton N ta fika ta spéra. Ta fladu ma speránsa e últimu ki ta móre.

MARIÂ — Di kualker manera, mutu obrigadu pa favor ki bu fase-m. Bai bu fla-l ma N ka ten respósta pa el. Ma Nhor Dés riba la na Seu, ki sa ta odja dentu nha korason, sabe módi ki N ta ama-l! I ma un diâ e ta fase-nu djustisa.

DENXU BARBA — N ta fla-l. Ago dexa-m bai. Fika dretu.

MARIÂ — Deós bai na bu konpanha.

Es ta raparti kada un pa un ladu.

VIII SÉNA

Dentu di un bar, Denxu Barba ta sta xintadu ta konbersa ku Amiga.

DENXU BARBA — Obi li, Amiga. Bu ta fika li ta papia sábi ku Pedrinhu, kel ó ki bu odja Mariâ ta kanba djuntu ku Patrixu, bu ta nbarsa Pedrinhu, bu ta finji ma bu sa ta konsedja-l na obidu, bu ta kore-l mo na kabésa. Bu sta pursebe?

AMIGA — Abo bu sa ta da pa dodu ma bu ka konxe-m, o ké? Ami e menina di bóka portu, mos! Riba Txada pari-m, Rubon Balia kiria-m, Reia Grandi nxina-m nada.

Pedrinhu ta txiga, Denxu ta puxa un kadera ta po-l xinta na se ladu..

DENXU BARBA — Inda ben ki bu txiga, Pedrinhu. N staba li N ta papia mi ku Amiga, N ta konta-l di kusa ki Mariâ fase-u. Ael e konxe Mariâ dretu. Es ta trabadjaba djuntu na BTEFA (Brigada Técnica para as Estradas e Fomento Agrário), la Djarakunda, na karaga pédra pa npedra fonti.

AMIGA — E sértu mé Pedrinhu. N konxe Mariâ sima N konxe nha kalsinha. E ten maniâs di ta ranja un omi oxi, e ka ta nen diskulpa e ta ranja otu, sobrutudu, si e omi ki ten kualker pozison. Kantu nu ta trabadjaba djuntu, ka parse un kapatás ki e ka ranja ku el.

PEDRINHU — Dja fladu ma Xúxu e feiu, mas ma kel ó ki e kre ngana-u, ma ka ten más bunitu di ki el.

DENXU BARBA — Filismenti bu sta sienti. Xúxu e feiu kel ó ki e kre.

PEDRINHU — Ami N konxe Mariâ dásdi pekinoti, mas teoxi N ka sabeba ma el éra si!

DENXU BARBA (ta labanta, ta fika sakedu frenti mésa) — Pedrinhu, N ta bai te Rubon Xikeru da un rezon, N ta ben gosi. Amiga ta fika li ku bo, pa bu ka fika bo só. (E ta vira pa Amiga) Bu ka ta nportaba, Amiga?

AMIGA — Ka ten probulema. Bu pode bai N ta fika ku el li.

DENXU BARBA (pa Pedrinhu) — Bu sta ku dinheru pa nhos toma un sumu, timenti N ka ben?

PEDRINHU — N tene dinheru, sin.

DENXU BARBA — Inda bem. (E ta da pa e sai, e ta torna vira) E verdadi… (pa Amiga) da-nu lisénsa dos minotu pa N fla Pedrinhu un kusa. (Amiga ta sai) Pedrinhu, bu tene dinheru ki ta da pa bu nprista-m duzentus merés, kel ó ki N ben di Rubon Xikeru N ta da-u? (Pedrinhu ta puxa kartera di bolsu kadera ta tra un nóta di duzentus merés ta longa Denxu) Mas bu ka meste fla ningen ma N pidi-u dinheru npristadu. Kel ó ki N ben di Rubon Xikeru N ta da-u.

PEDRINHU — Kenha ki N ta fla? Bo bu sabe ma bo e nha midjor amigu.

Es ta bati un sinku ku kunpanheru.

DENXU BARBA (ta txoma) — Amiga! (Amiga ta kanba) Obi li, N ta ben gosi. Porta dretu ku nha amigu… oliás, ku nha armun.

Denxu Barba ta sai.

IX SÉNA

Bera di Igreja, Denxu Barba ku Patrixu ta sta sakedu ta konbersa.

DENXU BARBA — Patrixu, toma kel sen merés li, spéra Mariâ Nhaxunda kel ó ki e sai di misa, fla-l ma mi ki manda-u pa bu ben buska-l pa nhos bai spera-m la na bar di Ntoni Suaris. Kel sen merés li, bu ta ba ta toma bu servejinha, bu ta paga-l algun limunada timenti N ka txiga.

PATRIXU — Ka ten probulema.

Denxu Barba ta da rinkada ta bai.

X SÉNA

Amiga ta sta xintadu na un kantu di bar ta papia ku Pedrinhu, ku ses kopu di bebida dianti, Mariâ ta kanba mo dadu ku Patrixu, es ta bai xinta na un otu kantu.

AMIGA — Dja bu tra próva? El e ka brinkadera! E ta troka di omi sima troka di kalsinha, istué, si el e ka pórka. Pamodi si e pórka e ta troka di omi más di troka di kalsinha. (Pedrinhu ta fika nervozu) Pusenta. Ka bu liga. Si el e ka meste-u, ka bu meste-l tanbe. El e ka más midjor di ki bo!

Pedrinhu ta fika ta nheme denti ta kume unha.

MARIÂ — Paxénxa tanbe! E kel-la ki e mudjer ki e ta troka ku mi?

PATRIXU — Kaba, kel ó ki nu fladu ma anos omi, ma nos e so bésta, nu ta kre briga!

Mariâ ta atxa piada, ta da Patrixu un palmada mimadu, ta kore-l mo, sen nenhum intenson. Pedrinhu ta fika furiozu di siumus.

PEDRINHU — Dja bu sa ta odja?! N ka sabe paké ki e sa ta fase si? Kre e pa e fase-m xinti siumus!

AMIGA (ta nbarsa-l, ta kore-l mo, ta konsedja-l na obidu) — Ka bu liga, Pedrinhu.

PEDRINHU — Inda si kel mos la éra más bunitu ki mi!…

AMIGA — I kel nanprésta la, N ka sabe paké ki e sa fase-l si! E ten getu di malatriza… sen burgónha!

PEDRINHU — Mos ku bexu bu ta kuda pineu di kel tretor ki Djon di Kina ta sta nel!

PATRIXU — Pedrinhu dja fika bazofu na ladu di kel bandida la, ta pensadu ma e tene grandi ménbra djuntu ku el! Granda xula e u ki el e!

MARIÂ — Patrixu, N ten ki papia ku Pedrinhu, da u-ki ta da.

Mariâ ta bira pa labanta, Denxu Barba ta soma na pórta, e ta torna xinta. Denxu ta sana-l ku mo, ta bai pa mésa undi ki Pedrinhu ku Amiga sta xintadu.

DENXU BARBA — Nton gentis, kusa módi ki sa ta bai?

AMIGA — Ale-l ta bai. Pedrinhu ki sa ta xinti un kusinha njuriadu ku konportamentu di se antigoza. Mas dja N fla-l pa e konsentra… pa e poi koraju.

PEDRINHU — Denxu Barba, Mariâ e diskarada dimé-divéra.

DENXU BARBA — Ten kalma. Relaxa un-kóxi. (Pa Amiga) Nhos bai toma un fresku la na ruâ, pa invita xatisa, N ta bai papia ku Mariâ ku Patrixu, pa es dexa di purvoka-nhos.

PEDRINHU — Mas mi N ta gostaba di papia ku el, pa N purgunta-l pamodi ki e sa ta fase-m si. Ami teoxi N ka fase-l nada… Nhor Dées na Seu e testemunha.

DENXU BARBA — Pedrinhu, ka bu ben straga kusa. Si e ka papia ku bo… ka bu papia ku el. Bu ka pode, tanbe, ben sa ta da pa mutu baxu, pa bu lixonxa un mudjer ki ka meste-u!

AMIGA — Pedrinhu, ami e ka nada ku mi mé, mas parse-m ma Denxu Barba tene rezon. Si ael e ka kre nada ku bo… larga-l pa la! (E ta labanta e ta pega-l na mo) Labanta tanbe nu bai toma un fresku la na ruâ.

E ta labanta, Amiga ta nbarsa-l es ta sai na ruâ. Denxu Barba ta bai xinta na mésa undi Mâria ku Patrixu sta xintadu.

DENXU BARBA — Oi! Mariâ, dja N odja ma bo ku matxu-bedju… nen un piu! Nen mantenha nhos ka fla kunpanheru?

MARIÂ — Módi ki e ta fla-m mantenha? Se noiba ta dexa-l propi? Bo bu ka odja módi ki es sai djuntu sima dos kasadinhu?

PATRIXU — Nen tudu kasadu.

DENXU BARBA (ta txoma balkonista) — O balkonista, tarse dos serveja fresku… (pa Mariâ) bo kusé ki bu ta toma?

MARIÂ — Da-m un pirolitu.

DENXU BARBA (pa balkonista) — Dos serveja ku un pirolitu.

MARIÂ — Denxu Barba, kel bu amigu la, ka sa ta regula ben di kabésa.

DENXU BARBA — Dja N konxe striba ku el… dja N fla-l pa e dexa di maniâs, mas e sta puriamar ku bo. E sta paxonadu, e tene medu si bu bai ranja skándula ku el diante se noiba. Tantu… invita txiga ses bera, pamodi e fla ma si bu tenta straga-l se kasamentu, ma e ka ta nporta móre na kadiâ.

PATRIXU — Omi go! Pa ta nosenta fáxi si, Nhor Dés?! Sima Pedrinhu éra un rapasinhu dretu?!

MARIÂ — Mi tanbe e rai ki sa ta stranha-l! Diserteza menina la dja fase-l algun porkariâ.

DENXU BARBA — Prontu! Nton abo tanbe dja e fase-u porkariâ! Ami teoxi N ka odjaba algen dodu na kenha ki ka meste-l sima bo bu sta dodu na el! Inda bu ka rapara ma e tene se bóita tudu rumadu? Paxénxa tanbe! (Mariâ ta txora e ta tenta konsola-l) Bu ka meste txora. Bo bu ka odja ma e ka sa ta liga-u!

PATRIXU — Ka bu liga, Mariâ! Abo omi e k aso el! Bo nen bu ka feia, bu ka mariadu, pa bu fika ta txora omi ki ka meste-u!

DENXU BARBA — Sta-m ma go e óra di bu da-m respósta. Próva dja bu kaba tra: dusnóvi, pela operason invérsa… di tudu manera.

Mariâ ta txora diskonsoladamenti.

XI SÉNA

Dentu’l kasa Nhaxunda ku Bernaldinu, pai ku mai di Mariâ, es ta sta xintadu na sala.

NHAXUNDA — Rapás nobu, abo nton, sima bu fla-nu, bu kre kasa ku Mariâ, nos fidju fémia?

DENXU BARBA — Si Nhor Dés dja kre, ki anhos nhos dexa!…

NHU BERNALDINU — Si Nhor Dés dja kre, pamodi ki nos nu ka al dexa?

NHAXUNDA — E ki tenpu ki bu sa ta pensa na kasamentu.

DENXU BARBA — Ki tenpu?! Ami si éra so pa mi dja nu staba kasadu bedju.

NHU BERNALDINU — Rapás ta parse sériu, Xunda.

NHAXUNDA — Abo e di ki rasa? Di ki famíla?

DENXU BARBA — Ami e gentis Barbóza Mendi.

NHU BERNALDINU — Família Serbam?! Di Sérziu Barbóza Mendi?!

DENXU BARBA — Sin. Ami e netu Serbam… so ki mi e fidju di fóra. Mas N erda tanbe… N ten nha kasa…

NHAXUNDA — Ami di nha párti… ka ten probulema. Ago… Mariâ ku se pai ki falta pa disidi.

NHU BERNALDINU — Ami, si e pa mi, manhan dja es ta komesa distrata papel.

DENXU BARBA (ta bai nbarsa Nhaxunda) — Obrigadu mamai, (ta bai nbarsa Nhu Bernaldinu) obrigadu papai, (ta bai nbarsa Mariâ) N kre-bu txeu, nha amor.

XII SÉNA

Nhu Bernaldinu ku Nhaxunda ta sta riba di kama detadu.

NHAXUNDA — Bernaldinu, ami ka sta da-m ku stangu kel saída di Mariâ ku kel se noibu la, tudu santu diâ si.

NHU BERNALDINU — Ñeh! Es sa ta distranka papel! Es ten ki ta sisti reunion!…

NHAXUNDA — Fórti distranka papel! Fórti sisti raunion, kaba go, so di noti!

NHU BERNALDINU — Abo dja bu skese ma kasamentu ten stribilin txeu?

NHAXUNDA — Kasamentu ten stribilin txeu?!

NHU BERNALDINU — Dja N sa ta xinti kusé ki bu kre fla. Mas N ten kunfiansa na nha fidju fémia. Mariâ e ralijioza e ka ta dexa mos fase-l nada ki el e ka kre.

NHAXUNDA — Odja módi ki bu papia: «ka ta fase-l nada ki el e ka kre» I si e kre? Lenbra ma pólva ku lumi ka ta djase, ma nen Adon ku Eva ka rezisti.

NHU BERNALDINU — Dja N fla-u ma Mariâ e relijióza. E ka ta dexa.

NHAXUNDA — Bon, bo ki sabe. So bu ka ta ben fla ma panha-u nsodadu!

NHU BERNALDINU — Óh mudjer, dexa-m durmi, N diskansa susegadu, pamodi manhan N ta bai tra regu sedu.

Es ta da kunpanheru kósta, es ta kubri kabésa. Un bokadu, Mariâ ku Denxu ta pára ngostadu baxu jinéla ta konbersa.

DENXU BARBA — Ami N gosta txeu di bo.

MARIÂ — N sabe. Dja bu fla-m el un monti bes.

DENXU BARBA — Mas abo bu ka ta kunfia na mi!

MARIÂ — Kunfia na bo, módi?

DENXU BARBA — Dja nu ten kantu mes ta kre mi ku bo… inda bu ka da-m prova.

NHAXUNDA — Dja bu obi? Bu sa ta xinti?

NHU BERNALDINU — Dexa-l… Mariâ ka ta dexa.

NHAXUNDA — Bo ki sabe! Spéra bu ta odja!

DENXU BARBA — Dja txiga óra di bu dexa-m más avontadi ku bo. Trimodi nu sa ta ben kasa ku kunpanheru!

MARIÂ — Kel ó ki nu kasa, nu ta fika avontadi ku kunpanheru, bu ta fase-m kusa ki bu kre. Mas antis di kasamentu… nen ka bu tenta.

NHU BERNALDINU — Obi-l la! N ka fla-u? Mariâ ka ta dexa. Ael e ka bósta nau.

DENXU BARBA — Da N un beju… po-m língua na bóka N txupa.

MARIÂ — Toma beju, áli língua bu txupa. Kes-li, sima Nhu Pádri fla, ta fase párti di namoru. I e fla ma namora e ka pekadu.

DENXU BARBA — Dexa-m mete-u mo na sedju, dexa-m kore-u mo na máma…

MARIÂ — Bu pode mete mo na sedju. Kóre mo na máma e ka nada.

DENXU BARBA — Oooooh! Oh Mariâ, dexa-m perta na bo más un-kusinha!

MARIÂ — Bu pode perta sima bu kre. So mo go, purfavor ka bu dexa dixi di nha biku pa baxu.

NHU BERNALDINU — Obi… bu sa ta obi? Di biku pa baxu pa ka toka-l mo.

NHAXUNDA — Kunfia dimás. Galinha ta farta ku un gran, un gran di midju.

DENXU BARBA — Dizimóla, Mariâ. Dexa-m poi so riba kalsinha…

NHAXUNDA — Mamodi?!

MARIÂ — Nau, senhor.

DENXU BARBA — So di-riba, N ta xinti bu kalor N ta diskansa.

NHAXUNDA — Bu ka sa ta obi, Bernaldinu? Pa dexa-l poi so di-riba?

MARIÂ — Nen ka bu tenta. Si bu tene friu, nu bai dentu bu ba poi mo riba lus di kandeâ, bu ta kenta. Si bu sta kansadu, nu bai bu ba deta.

NHU BERNALDINU — Bu sa ta odja, Xunda? Dja e da-l respósta bedju.

DENXU BARBA — Pur amor di Deós. Dexa-m poi so di-riba… so di-riba.

MARIÂ — So di-riba!

DENXU BARBA — So di-riba … so di-riba… soooo…

NHAXUNDA — Bernaldinu! (Bernaldinu ka ta kudi, ta fika djardjaridu. Es ta labanta, es ta xinta riba kama) Bernaldinu, bu ka ta fla nada?

MARIÂ — Barba, N sta xinti-u ta kre puxa-m kalsinha pa ladu perna!

NHU BERNALDINU — Dja bu obi-l? Dja e rakede-l bédju! E ka ta dexa-l, nau. N ten kunfiansa na nha fidju fémia. So di-riba nada ka ta fase.

DENXU BARBA — Ui, Mariâ; puramor di Deós, dexa-m poi so kabésa.

MARIÂ — Nen ka bu tenta! Timenti nu ka kasa?!

NHU BERNALDINU — Odja kusé ki nha fidju dja fla-l. Sen kasamentu ka ten malkiriadésa.

NHAXUNDA — Leba so na trósa. Kel ó ki kontese na disisu, bu ta odja.

DENXU BARBA — Ui… ui… Mariâ, dizimóla. N tene bariga ta due-m, N tene penti intxadu, bixiga pisadu. Dexa-m poi so kabésa. Ui, ai ki bon. (Mariâ ka ta rusponde) Ui… ui… ui… ísu… ísu… si propi… uaaaaaaiiiii.

NHAXUNDA — Bernaldinu, Bernaldinu, (Bernaldinu ta barbari) bu sa ta obi? Mariâ dja kala, Denxu Barba sa ta grita. (Bernaldinu ta kosa garganta) E fla Mariâ pa dexa-l poi so kabésa… Mariâ dja kala txetu.

NHU BERNALDINU (dizorientadu, ta konko na jinéla) — Ah, Mariâ nha fidju, lenbra so ma e ten kabésa, mas ma e ka ten onbru.

Minís ta spanta, es ta diskarapâti di kunpanheru.