Pub
Por: Cláudio Ramos

 Claúdio11

Onti na boka tardi

N pila un pe di konbersu

Ku rafega di bentu

I e fla-m ma kau ka sta doxi

Pabia, anu foi skoregadu

 

Ku nha odju di speransa

Odja na nterior d’ilha Santiago

Orta stiladu na txon seku raganhadu

I kes padas ki fikaba

Sa ta mori tudu santu dia

Sima sol ora ki ta dobra na kutelu

 

Omi ku mudjer,

Sta sen po di pega na el

I speransa na ses odju

Sa ta seka dia-pa-dia

Sima fonti na boka rubera

 

Mininus,

Ku bariga sopradu

Ta manxi ta spremi lagua

Tonda go ku boka stangu baziu

 

Limaria,

Uns na boronsera stiladu 

I otus na ladera ku bariga ntxadu 

Ta spera distinu di bai

Forti kau brabu

Forti seka medonhu

 

Ma inda nha fe sta bibu

I nha nha speransa sta firmi

Ma ta txika dia ki governu di seu

Ta bota odju na es tera skalabradu

 

P’E  ben poi tudu pilorinhu

Ku bariga riba’l kosta

Limaria ta galopia na rotxa

Mininus ta brinka na lama

I kanpunes ta nbrasa

Si txon solopatu

Comentários  

+1 # Elsa 10-04-2019 19:15
Bunitu. Kriolu fundu. N kurti. Dios ta danu agu' l suatentu. Un ripsru: na undi ki sta txika parsen e txiga. Abrasus
Responder
+1 # Marciano Moreira 09-04-2019 00:09
Deus ta obi-bu, vos di povu!
Responder