Cultura

Cultura

TIATU NA PARLAMENTU — DEPUTADUS DJA BIRA ATOR

• Por Armindo Tavares
• 14 de Jun de 2023

N sukudi kabésa, N para, N matuta dentu mi:– «Kre nu sta na tiatu me» – N rabida N fla-l: – Ku kes Deputadus so ator la, nos Parlamentu dja bira un sirku di Palhasus. Kibasta, es ta ganha ben. Es ta ganha ben pa es ta ridu del, timenti es ta xuxa ku nos povu.

País sta di tanga, Governu na guniâ, Otoridadis ngaioladu, Povu ku kórda na obu ta rastadu kósta na txon. Parlamentu sa ta fase tiatu, ku Deputadus dja kaba bira ator. Atoris di Palhasadas, ki ta atuâ dentu di sirku, ta brinka sukundida, ta sukundi un Relatóriu ki dja staba sukundidu, pa ka sabedu ma Makakus mandadu pa divolve más di 45 mil pe di mandióka ki es rinka furtadu na kau di ses markeru. I na alguns kazu, kel mesmu pe di mandióka rinkadu 2 bes. Nos téra tenedu na kórda banba, tudu satadjadu, sima longisa prindadu na piskôs di gatu, istué, na piskôs di un gatu banhú.

Bon… N ten un netinha ki, lovaradeos, e pilon di sabida. El e ton spérta, bensedes, ki e gosta di ta spreta, subutudu, kusas ki ta pasa na nos Parlamentu. Nos pulítikus e konxe moku-kafika, e sabe tudu kusê ku kusê ki es ta fase o ki es ta dexa di fase; kantu ki es ta ganha pa mes i pa unde ku unde ki es ta bai rabenta ses vaidadi riba kanporta. Ael e un jéniu. Tanbe e ten uma jénu…! Rabês propi.

Un sertu diâ, dentu’l fuska-fuska di bóka-tardi, ku sol-di-makaku ta smira kanba tras di kutelu, dipos ki dja e farta di kema malandrus na kósta, Lura parse, dirapenti, na ekran di televizon, ki staba abertu na kanal TVA, ta kanta un múzika ki ta fla, o ki txoma: SISÍ. Létra di kel múzika foi skrebedu pa nos Ministru di Mar. I Lura, se antigóza, kanta go. I nha netinha fika spantadu kantu e obi-l. Koitadinha. Ael e sépa spérta, e ta ntende kusas tudu nun flá. Tudu rai-di faxi. Sima na matimátika… poku enjinheru ki e sima el. Tantu ki un diâ N purgunta-l kantu ki e 3 ves 8, antis di N kaba purgunta-l e rusponde-m:

– 12.

Na Jeografiâ tanbe, ael e kanpion. N purgunta-l «kusê ki e Téra?» e rusponde-m antis ki Xuxu ferga odju:

– Téra e un exféra kuadradu ki ta jira paradu.

I inda na matemátika, N torna purgunta-l:

– Kantu ki e 2 más 2?

E bira e rusponde-m:

– Ta dipende.

Mi spantadu, N purgunta-l:

– Ta dipende mode?

E fla-m sen papa na língua:

– Si e pa N paga e 4. Mas si e pa N resebe e 22.

Sima N sa ta flaba, Lura kanta létra ki se antigu môs skrebe, e fla:

– «N ta da-bu kónta-sibiki

N ta da-bu kordon di oru

Pexi na mar e tudu pa bo…»

Nha netinha bira djobe-m tan, ku lágua ta nada-l na odju, e fla-m:

– Vó, bai kunpra txeu pexi bu ben guarda, pa nu pode fika ta kume.

N purgunta-l, inda más dimiradu:

– Pamodi?

E rusponde-m trankuilamenti, sima éra se maskabu di senpri:

– Abo, kel ómi ki skrebe kel múzika li e ka Ministru?

N rabida N kudi-l:

– Aian. El e Ministru di Mar. I kusê ki ten go?

Nha netinha poi rostu na txon, e pensa un-kóxi, e rabida e djobe-m tan, e torna fla:

– Kónta-sibiki ate e pode da-l, pamodi ta libra-l di bóka-fedi ku di odju fitisera. Mas ago… pa e da-l tudu pexi na mar… pa nu fika sen kume pexi?!…

N fika tantariadu, kuazi sen resposta. Mas un kualker kusa N tenba ki ta flaba-el. I N fla-l:

– E ka ta da-l pexi na mar nau. E sa ta fla-l asi pa bazofaria! Pa e ngana-l pa e kuda si.

E djobe-m tan, e torna purgunta-m:

– Modi ki bu sabe ma e ka ta da-l? Bu ka sa ta lenbra ki bu flaba-mi, ma pegadu tudu nos avion bendedu fiadu pa un stranjeru, ma nega leba un mudjer…

N interonpe-l, N konpleta:

– Eloiza. Kel mudjer txomaba Eloiza.

– Ezatamenti. Eloiza staba ku dor di pari, avion nega taqrse-l Praia pa e bem pari, es po-l na lantxa es leba-l pa Sal, na kaminhu e móre dentu di lantxa, prenhada sima e staba.

Sen mutu getu, mas N konkorda ku el:

– Kel go e si me. Avion nega leba-l pamodi e ka teneba dinheru pa e pagaba pasaji.

E kontínua:

– Kaba inda bu fla ma avion nen ka pagadu, ma podu Stadu kaloti, torna tomadu.

N fika trapadjadu, N ta tenta invita kusa pa N fla nha néta:

– Mas pexi na mar e ka ta da-l nau. Ael pa e da-l pexi e ten ki ta kai na mar pa e bai pega… i el so e kai na mar e ta foga. E ka sabe nada.

Nha netinha fika más spantadu inda. E purgunta-m:

– Vó, abo Ministru di Mar tem ki ta sabe nada?

N rabida N purgunta-l:

– Pamodi? Abo, Ministru di Saúdi ten ki ser un duenti? Ministru di Edukason ten ki ser un Tagi? Ministru di Pulísia ten ki ta ser bandidu? Ministru di Finansas ten ki ta ser Enprezáriu?

I e torna purgunta-m:

– I modi ki bu sabe ma e ka sabe nada?

N rabida N fla-l:

– El e di Somada. Somada ka ten mar.

Dja kuazi nu ta termina, e purgunta-m:

– Sta na algun Relatório ma el e Ministru di Mar, mas ma e ka sabe nada?

N kudi-l, N fla-l:

– Kel go… N ka sabe. Relatóriu inda sta sukundidu, pamodi sta txeu kusa na el ki ka kredu pa sabedu.

E ri, e purgunta-m:

– Kel Relatóriu ki Deputadu fla na Parlamentu ma e tiatu ki es sta na el?

N ri tanbe, N fla-l:

– E kel propi. Nos Deputadus gosi e so ator.

– Mas dja es dura na el, vovó! – Nha neta rapika – I nen es ka sa ta fadiga, ki fare pa es nega. So es ta fla ma kes-otu tanbe dja furtaba mandióka di genti.

I pa N konklui, N bira N fla-l:

– Kerdizer ki «Djan ki konxe Djon». Ladron ki furta ladron ten 100 anu di perdon.

Nha netinha toka palmu, e rapika pe na txon, e fla:

– N ta spéra ma N ta ben le kel Relatóriu li antis ki kabelu bira-m branku na kabésa… pa atxa-m inda ku tudu nhas denti na bóka.

N ri N fla-l:

– Nha netinha… abo inda bu tene txaskan 5 anu.

E rabida e fla-m:

– Tenpu ta passa faxi.

N sukudi kabésa, N para, N matuta dentu mi:

– «Kre nu sta na tiatu me» – N rabida N fla-l: – Ku kes Deputadus so ator la, nos Parlamentu dja bira un sirku di Palhasus. Kibasta, es ta ganha ben. Es ta ganha ben pa es ta ridu del, timenti es ta xuxa ku nos povu.

Palmareju, 13 di Junhu di 2023