Cultura

N nansi pa N brilha

So Séu e nha limiti

Ka ningén mostra-m más nha lugar

Karneru nansi ku si lan

Dimeu ka kai, nen pa ka túskia

Odju fitxadu, N ta xinti na altura

Sima pexi fóra d’agu

N nansi ku aza pa N bua

Nha tapeti burmedju e odju di kenha ki N ta ama

Nha mo sta stikadu so pa N longa-l un buké di flor

Distinu di puéta e un grandi mistériu 

Nen el e ta ntendi si própi kabésa

Palavra e terapia

Vérsu livri ka ten tema

Dja sta bon di abuzu na subúrbiu

Nhos dexa N liberta nha subalternidadi

Pamodi N ka nansi pa N vivi

Ku lugar markadu na sosiedadi

Nhos dexa N liberta

So Séu e nha limiti