Cultura

Pa Princezito

Óra ki da-m gana ba nha téra

nha kurason é rufu d’águ ta disponta 

nha odju é berdi ninadu riba séra

skesedu’l tenpu kasabi ti di konta

óra ki n bai n ta bota pasu sumaradu

n ta bota odju ku xintidu ardigadu

pamodi fladu ma tenpu marguradu

inda sta baxu batenti musgedjadu

óra’l ben é sima subi un subida

kurason na konpasu trapadjadu

korpu ta sangra sima un frida

mas kerensa ta poi aima paziguadu

fladu kel ki ka boita dja perde si rinkon

mas si spritu naveganti ka ta txora

: e sabe m’é na kel txon la k’e ta mora

si tudu pátria é ka só sonbra di iluzon

si mundu andadu ka boita poku

i séu sukuru ka ninhu pertu

anda sen mapa é palpa dizertu

undi só morti k’é strada abertu

mas obi bu spritu ta fla-u (di)spertu

: é li ki bu sta finkadu sima un toku

na dizusperu ta batuka más ki soku

ku speransa ma manhan é ragás sertu

Link para a música: https://www.youtube.com/results?search_query=princezito+txoru+cantado