Cultura

VI SÉNA

Diana sta dentu sala, el-so, ku un karta na mo. E ta abri e ta le dentu del.

DIANA [V. O.] – «Dereson Nasional di Polísia di Ordi Públika. Senhor. Dáriu Silva, Dereson Jeral di Viason manda-nu kópia di un ofísiu ki ben di Trubunal, ta abiza-nu ma, di gosi pa frenti, nhu sta proibidu di giâ kualker tipu di karu, móta, o kusa ki ten mutor i ki ta anda na strada. I, aparir di gosi, nhu ten 30 diâ pa nhu ntrega-nu, vuluntariamenti, kel karta amador ki nhu ten, sinon, nhu ta komete krimi di dizobidénsia, previstu i punidu pa lei. Di nos párti nu ta ben manda un sirkular pa tudu Postu ku Skuadra di Polísia di país, pa prende-nho si panha-nho ta giâ. Nu ta informa-nho, inda, ma nhu pode linpa Rejistu Kriminal di-nho, si nhu pidi riabilitason, ó ki fase-nho kuatu anu fóra kadiâ».

DIANA (barbaridu) – Nhor Dés! Kel-li ka ten ipótis di N fla Dáriu! E ka ta bai gosta, i mutu menus aguenta. Nen mi! Mas kusé ki N fase propi nes mundu, pa N merese kel sorti li, Nhor Des? Ali na Kabu Verdi, unde patron e txaskan Stadu, pa un Enjenheru Agrónimu, ku bon nóta na se diploma, média di 19 valor, ka ten enpregu?! Dja N sabe: N ka ta fla-l nada. N ka ta mostra-l kel karta li. I N ta fase getu N ta sukundi-l se karta di konduson pa e ka kai na tentason di konduzi, pa Polísia ka bota-l mo, o midjor, N ta bai ntrega-l na Trubunal ku nha pé, kel ó ki dja fase kuatu anu ki e sai di kadiâ, li dja go, N ta bai pidi se riabilitason sen e da kónta, N ta ben fase-l supreza. N ta trabadja diâ ku noti, pa mi ku el. Kel ki N ta ganha ku kel ki nos páis ta djuda-nu, ta da pa tapa braku di nos mizéria.

E ta xinti Dáriu ta txiga, e ta soti karta dentu sedju, e ta tenta dispista. Dáriu ta da-l beju ta bai xinta na sufá, xoloi. Diana ta bai purpara-l un kopu di sumu ta tarse-l, ta xinta na sufá, ta djobe-l tan.

DIANA – Dáriu, dja ten kuatu anu ki bu sai di kel Infernu.

DÁRIU – Ki N sai di kel infernu… sima bu fla. Pois, N sai di kel N kanba na otu, i otu bes, sen ki N komete pekadu ki ta podia lebaba-mi la.

DIANA – Mas… prontu! Ka ten dor ki ka ta kalma, ka ten kenti ki ka ta fíria.

DÁRIU – So si!… ki ka al bai, sertu. Trimodi si bai so si, na últimu kazu, propi mórti e remedi.

DIANA – N tene un kusa pa N fla-u.

DÁRIU – Ki kusa?

DIANA – Duranti tudu kel tenpu-li N sukundi-bu un segredu… pa N fase-bu un supreza.

DÁRIU – Segredu? N kudaba ma entri nos ka tenba segredu?

DIANA – E un segredu ki dja N sabe ma ta po-u fika kontenti.

DÁRIU – Ñ… N ka sabe si riba di es mundu inda resta kusa ki ta po-m fika kontenti!

DIANA – Bu sa ta lenbra kantu ki bu resebeba kel karta di Viason?

DÁRIU – Purfetamenti.

DIANA – Ka pasa nen un sumana, N atxa otrun ki ben di Polísia, ki Trubunal manda pa toma-u bu karta i pa prende-u si atxa-u ta giâ karu.

DÁRIU – Nnton bu ka fla-m teoxi?

DIANA – Dja bu ka teneba unde más di lebaba tantu disgostu. N purferi popa-bu.

DÁRIU – I si N giaba karu… i N pegada?

DIANA – Bu ka éra dodu pa bu ba giaba karu sen karta.

DÁRIU – Ami N ten karta.

DIANA – Bu karta N bai ntrega na Polísia.

DÁRIU – Bu fase kel-la, Diana? Sen ki bu abiza-m?

DIANA – Pa bu ben, keridu. Mas gosi go, bu pode pidi bu riabilitason, bai labanta bu karta i fase bu bida sima kualker sidadon.

DÁRIU – Na sériu?! Kenha ki fla-u?

DIANA – Si dja bu kre, bu pode pega dja na un fódja di papel azul di 25 linha i bu fase un rekidimentu pa juis di ezukuson di péna, bu pidi-l bu riabilitason. Dja bu ten direitu.

DÁRIU – Nton N ta bai ja kunpra un fódja di papel azul.

DIANA – Bu ka meste bai kunpra. N tarse uns i es sta na gabéta di mezinha-di-kalbisera. Spéra N bai buska un.

Diana ta kanba na kuartu, ta sai ku un fódja di papel azul na mo.

DÁRIU – Obrigadu… obrigadu… mutu obrigadu Diana. (E ta toma papel e ta torna longa-l) Skrebe abo ki ten létra más bonitu. N ta dita-u. “Meritísima Juíza di ezukuson di péna di komarka di Son Visenti” pontu. “Mi” vírgula “baxu asinadu” vírgula “Dáriu Delgadu Silva” vírgula “antigu rukluzu” vírgula “N ben pur es viâ rakere nha riabilitason (pauza) pamodi dja N kunpri prazu legal pa isu” vírgula “u ki ker dizer” vírgula “ma dja N ten kuatu anu ki N sai di kadiâ” pontu. “N ta djunta un fotokópia di nha Rejistu Kriminal i un strátu di senténsia” pontu. “N ta spéra defirimentu” pontu final.

Diana ta kaba skrebe ta longa-l.

DIANA – Ago e so bu manda-l pa koreiu. Sta-m ma tudu kusa ta bai fika rozolvidu. Ma nos kalváriu dja txiga fin.

DÁRIO – Deós ta obi ku bo, kerida linda. (E ta le rekidimentu, e ta abri un gabéta e ta tra fotokópia di Rejistu Kriminal ku stratu di senténsia e ta mete na un envlopi) Bon Diana, N ta purbeta, N ta bai po-l na koreiu gosi li.

DÁRIU – Boa. Kuantu antis, más midjor.

Es ta nbarsa kunpanheru pertadu, dipos Dáriu ta sai ku présa, ku envlopi na mo.

VII SÉNA

Diana ta sta xintadu na ladu di Dáriu, Ofisial di Dilijensia ta konko na pórta.

DIANA (riba pórta sakedu) – Bondiâ sinhor Ofisial. “Gudi Nius?”

OFISIAL – Kusé?

DIANA – Bon notísia?

OFISIAL – Ahn! Parse-m ma sin. Enbóra ka konpletamenti, mas dja e bastanti bon. I N kre papia ku senhor Dáriu. E ka sta?

DIANA – E sta sin, senhor. Ale-l ta ben. Oliás… nhu kanba.

OFISIAL (ta entra ta bai pa Dáriu) – Bondiâ, senhor Dáriu.

DÁRIU – Bondiâ, senhor Ofisial. Ki nobidadi ki nhu tarse?

OFISIAL – Parse-m ma des bes nobidadi e sabi. Apénas ten un pikenu bran-bran.

DÁRIU – Bran-bran?! Ki bran-bran? Juíza ka seta?

OFISIAL – Juíza defiri pididu di-nho sin. So ki e manda pa tarse-nho un kóntra-fé, pa nhu paga Vítima se indeminizason, djuntu ku inpostu di djustisa. Si nhu fase si, Rejistu Kriminal di-nho ta fika linpu.

DÁRIU – Dja nen N ka sa ta lenbra kantu ki éra indeminizason.

OFISIAL – Indeminizason éra 200 kontu i inpostu di djustisa éra 30.

DIANA – 230 kontu.

DÁRIU – Será ki nos pai pode djuda-nu?

DÁRIU – Ami di-meu nen si e tene nha madrasta ka ta dexa-l da-m.

OFISIAL (ta berefika dosie) – Komu dja pasa más ki 7 anu, ku juru di móra i atualizason di inflason… dja e ka so kel valor li más ki sta pa paga. Dja subi pa 600 kontu.

DIANA – Ave-mariâ! Mas pamodi ki dja subi di kel manera li?

OFISIAL – Kel-li dja N ka sabe, D. Diana. (Pa Dáriu) Senhor Dáriu, nhu sina-m li-sin-sin, pur favor, ma nhu toma konhesimentu di dispaxu di Juíza.

Dáriu ta sina, Ofisial ta dispidi ta sai.

DIANA – Nes mumentu N ka sabe si nha pai tene es dinheru ki e pode djuda-nu! Bu sabe ma e gasta txeu dinheru ku kasamentu di Zuraima, nha irmá, ma dipos e fase kel operason na próstata ki tanbe kusta-l txeu dinheru... mas simé, N ta bai tenta papia ku el.

DÁRIU – Di serteza e ka debe tene kel kuntiâ li tudu. E un muti dinheru!

DIANA – Mas N ta bai tenta.

DÁRIU – Dja N pensa na un kusa ki parse-m ma e midjor soluson.

DIANA – Kál? Gosi e pa nu pensa na tudu kusa ki nu atxa ma ta da óbra.

DÁRIU – Ami N studa na Purtugal, N konxe txeu algen la i N sabe ma la N ta safa. Mesmu ki e pa N bai trabadja na óbra, mas la ten senpri fórma di ganha algun tiston.

DIANA – Pur akazu!

DÁRIU – Nu ta bai tenta buska vixtu pa nos dos, nu ta báza pa Portugal. La N ta konsigi trabadja. Abo tanbe bu pode trabadja na kasa patroa, nu ta ganha ki ta da-nu pa nu vive i pa nu kontínua ta studa. Ami N ta fase nha Dotoramentu, abo, komu dja bu ten 7u anu, bu ta martikula na universidade bu ta fase bu lisensiatura. Nu ta trabadja di diâ nu ta studa di noti. Modi ki bu atxa nha ideia?

DIANA – Sinplismenti fantástiku… sima senpri.

DÁRIO – Nton, pensa nisu.

DIANA – Da-m bu pasaporti, N ta bai gosi li, N ta bai tenta buska vistu. Kantu óra ki sta?

DÁRIO – Um’óra i meia di tardi. Konsuladu ta abri so tres óra.

DIANA – Ta abri tres óra, mas N ta bai ta tra ku pe manenti, ó ki tres óra ta da ta atxa-m la.

Diana ta purpara ta sai.

VIII SÉNA

Diana ta kanba e ta bai pa Dáriu ki ta purgunta-l ku ansiadadi.

DÁRIU – E módi, fidju-fémia! Farinha o farelu?

DIANA – Farelu, fidju-matxu.

DÁRIU – Nau!... I di es bes e pamodi kusé?

DIANA – Rejistu Kriminal. Foi purmeru kusa ki Konsu pidi-m.

DÁRIU – Kantu kriminozus, ki, N konxe, ki konsigi vistu!

DIANA – Kantu N ta sai na pórta, un funsionária txoma-m aparti , fla-m ma si N da-l duzentus i sinkuénta kontu, ma e ta ranja-m vistu pa bo dja manhã.

DÁRIU – Ali ki ta funsiona e skema mé! Korupuson di tudu manera! Diana, si dimé-divéra algen ta torna rienkarna, si nu ta torna ben pa es mundu, ami N ta purferi fika karbon na Infernu, di ki pa N torna nase na kel téra li.

DIANA – Ka bu fla si nau, Nhor Des ta graba di bo. Odja ma lumi di téra, ki e labadu ku novi águ, módi ki e kenti, kifari go, lumi di Infernu ki e ka labadu ku nenhun águ.

DÁRIU – Si Deós ka sta grabadu di mi… e sa ta tersidja-m di kel manera-li, nton si e staba?

DIANA – Deós sabe kusé ki e ta fase, Dáriu.

DÁRIU – Fórti ka justu tanbe. Fórti N pasa mal tamanhu.

Diana ta bai nbarsa-l, ta perta-l rixu na petu. E ta larga-l di rapenti.

DIANA – Bu sabe ku sé ki N pensa gosi li, xerí?

DÁRIU – Kusé?

DIANA – Pamodi ki N ka pensaba isu a más tenpu?

DÁRIU – Pensaba kusé?

DIANA – N ta bai fala ku nha pai, si inda e kre npista-nu kel dinheru pa nu abri un Enpreza, nu ta abri so na nha nomi.

DÁRIU – Boa! Mi tanbe N ka tinha pensadu nisu…

Es ta nbarsa otu bes, es ta karapati rixu na kunpanheru