Cultura

Nhos djuda-nu ser algen

Nhos nxina-nu fase ben

Nu ta rekuza ser ningen

Flisidadi tanbe nu kre ten.

E na nos ki oxi sta kiriansa

Ki nhos debe poi speransa

Pa óras ki bedjisa nhos abrasa

Anos nu ser nhos seguransa.

Ka nhos dexa-nu pasa fomi

Ka nhos dexa-nu sen bai skóla

Pa nu ben ten nos kusa kume

Sen ki nu ten ki pidi zimóla.

Ka nhos atxa-nu diferenti

Di kes ki páis tudu ta da

Nos mé nu kre parse na frenti

Sen medu leba un bafatada.

Nu kre ri tanbe sima es ta ri

Pa nu sanadu sima es sanadu

Nos tudu ki nâse e mai ki pari

Nos bóka mé meste bokadu.

N ka kebra djudjun dja ten dos diâ

Nha koléga fla-m ma e sta ku anziâ

Pamodi ma e kume un balansiâ

Dipos di un praton di kaldu moriâ.

Fomi perta-m kada bes más inda

N lenbra un kusa ki papai ta flaba:

Ma kenha ki ten… kume te farta,

Ki ka ten… sensia te móre.

Nha mai ta deta senpri tardi

E ta durmi txaskan un-txos

E sabe ma mi senpri N ta pidi

Anti-manxe pa e da-m fidjós

Papai ta labanta di mardugada

Tudu diâ ki Deós poi na krus

Pa e ka sai di kasa sen kume nada

E ta ngana stangu ku padás di kuskus

Mas nos bizinha ki e Dotóra

Ta korda senpri la pa 10 óra

Ta sai na karu ku se mo fóra

Ta txiga trabadju sen dimora.

Mamai alves ta poi katxupa

Sen gran di pintu nen rabisku pexi

Otóra e ta kusia kaleron di sopa

Nu ta kume-l sima ki e bifi.

Onti e kusia un funsa loron

Pamodi na kasa otu kusa ka ten

Oxi e staba sen nun tiston

Nton e kusia se tenteren

(Palmarejo, 12/05/2019)