Cultura

Es djunta es tudu-fepu es fase

I tudu, moku-kafika tra purbetu

Ago más tardi uns ben djagasi

Ben buska toma kesotu postu.

Es sai na txada es konta mentira

Votadu tudu na es numa skarera

Es subi na stribu, es fase asnera

I es toma tudu kusa na xuxadera.

Es xinta pé na txon es bende tudu

Kaba go, es bende tudu pa baratu

Baratu ka txiga, anton es da fiadu

I mesmu fiadu i baratu ka pagadu.

Nega pagadu torna tomadu

Povu inda nada ka splikadu

Es obi un bóka di Xefi-Stadu

Kelóra dja, mandadu rekadu.

Pa e dexa di fase kunfiadésa

Di sta mete na ses aldrabisa

Ma sikre es manda ku tolisa

Ses purkurason povu ki pasa.

I es djunta sima ki na brinkadera

Es fase tudu-fepu di ses manera

Dentu'l poku tenpu es ranja géra

Móda TAGI es komesa ta separa.

Es bira tres grupu kóntra kelotu

Mas nenhun des ka éra Buzotu

Na poku tenpu, moku djongotu

I es dizorienta ki nen perdigotu.

Es kritika Trubunal ku Milisia Popular

Es kaba ku djustisa, es tra-l tudu valor

Kes ki linha nes trabadja na bon lugar

La na kau ki devia staba un bon Dotor.

Krimis di kularinhu-branku bira barnal

Kusa di Stadu bira ta tomadu na fabal

Si striba fladu ma algun kusa sta mal

Sima Viera Lopi, ta moredu na Ospital.

Língua KIRIOLU es larga kuali-kuali

Di portuges es skodje komu Ofisial

Kaba inda, el e Patrimoni Imaterial

Komu disprezu pa sforsu di Kabral.

Pamodi di un Mersedi, algen seta

Nomia un Enbaxador ki e Rasista

Bandidu ki fla ma pretu e pa mata

Ki la na Europa e di Strema Direita.

Nha genti... nhos nu skese di pasadu

Pamodi e foi un pasadu mutu pisadu

I purisu e mutu midjor si del skesedu

O midjor, si mete-l baxu txon nteradu.

Palmareju, 1 di Maiu di 2023