Cultura

Ka bu kai na iluzon

Nen dexa nada ngana-u

Bo e rapazinhu di Praia

Ku biku nteradu la Fóra

Ómi nansi pa vive ku si paduku y di sor di si tésta

Trabadja, bu ten

Ka bu xobexa na pórta di ningén

Nen spéra nada di algén

Pamodi ramóki e fetu pa malkonxedu

Bazoria di ómi e ten si sal

Badiu di Fóra

Ka ta pontadu dédu

Balenti dja tradu baxu balenti

Mufinu nunka ka bafadu

Xibileti Ferera dja móri

Nha Minininha Ferera si mai

Dja sta na mundu verdadi

Palu Silina dentu Vila Nóva

Nobu, ka mal tadjadu

Dj’e kre

Tudu kenha ki dja kre-l

Nos kriolu e sabi di tudu manera

Kru o kuzinhadu

Ku sal o sen ténpra

Na pratu, o prindadu na rabaditxa

Nu ta saboria-l sime

S’e pa bóka sisí

Dexa língua intxadu

Nu longa mo, nhu fla mantenha

Pamodi kaminhu lonji ta andadu di béspa

Nhos txoma-m Marsianu Morera

Pamodi ALUPEC e di nos tudu

Djuntu, nu ta valoriza nos língua matérnu