Cultura

Kantu N odja-u pasa na mi

Ki bu spia-m ku bus odju mansu

Ki bu mostra-m kel surizu falsu

N ka kudaba ma bu ka éra omi.

N kuda bo éra omi di nha bida

Ki ta faseba mi un mudjer filis 

N ka djobe Seu, N ka djobe Téra

N fitxa odju N krapu na bo.

N ka lenbra nen di nha idadi

Nen ma na mundu ten maldadi

Kantu N sperta ki N abri odju

Tudu kusa dja ka stragaba.

Bu fase-m sima bu ntende

Bu po-m na krus di kaminhu-grandi
Bu disgrasia-m, bu bandona-m, 
Ku bariga pan di mininu.

Nóvi mes N pari bu fidju matxu

N manda fla-u, bu ka sirbi-m

Nen ku kaldu, nen ku kueru

Nen ku garafa mantega Téra.

Nen ku litru midju kotxidu,

Nen ku kanéka’l nboji-faba

Pa N kusia katxupa, pa N dixi leti

Pa bu fidju máma te farta.

N kati-kati mi ku Deós na seu

N striba N kiria nha mininu

Gosi ki dja N torna ben rastora

N sta xinti-u ku lósga na korta-m leti.

Mas N ta rakede-bu séti légua

Pur favor sai-m di nha kaminhu

Ka bu tristorna-m más di ki si

Mi ku nha mininu nobu na mo.

Bu fase tudu pa bu tristorna-m

N sabe ma bu ri di nha disgrásia

Mas N ten fe ma inda N ta odja-u

Tormentadu ku nha alegria.

E ka praga ki N sta pidu-u

E ka mal ki N sta dizeja-u.

Mas, sima Bíblia ta fla:

«Cá se faz, cá se paga».