Colunista

Matadu mai di un inspetora

Pulísia Judisiária dizuspera

Es pega es mata un kiriaura

Ki nen ka staba ali na altura

Es mata Zezitu Denti D'Oru

Ku más di korénta disparu

Mas e lebaba antis un tiru

Ki un xefi dispara purmeru.

Fladu ma Zezitu Denti D'Oru

Staba xintadu dentu se karu

La Sidadela nun kau suguru

Es mata-l ku 2 mo na altura.

Sugundu un amigu ki prizensia

El e ka mostra nun rezisténsia 

Es txiga ku tudu ses arogansia

I es toma logu ses purbidénsia.

Oit'anu dja pasa, djustisa ka fasedu

Purkurador atxadu ma sta kunfiadu

Trokadu faxi kaba inda suspendedu

I na se kasa mandadu bai rabistadu.

Alguns Inspetoris suspendedu

Jornalista measa na prendedu

Es intxidu moku so di kunfiadu

Ma es a ta tra djustisa segredu.

Prusesu mandadu pa arkivadu

Ma Denti D'oru foi ben matadu

Pur isu foi propi komemoradu

Pamodi ma foi lejítima difeza.

Lejítima difeza, kel-li, so es ki fla

Zezitu matadu k'un txuba di bala

Uki gosi es sa ta ben fla e bla-bla

Skluzon di ilisitudi nunka e kel-lá.

Skluzon di kulpa ki li-sin invokadu

E pamodi lei ki ntendedu mariadu

O e di kaloti ki asi sa ta kre fasedu

Pelu ki Direitu ten ki torna studadu.

Pois, txaskan na korpu di un koitadu

Más di korénta bala na el disparadu

Kes ki dispara, ka staba pankadiadu

Nen ses korpu tinha un kau ranhadu.

Lejítima difeza debe ser moderadu

Na nun kazu ka debe ser ezajeradu

Pamodi komu krimi e pode tomadu

I matxu-bedju julgadu i kondenadu.

Debe uzadu meius nesesáriu

Kónta difendedu di diversariu

Si bai te ki kontese okontráriu

Fla lejítima difeza? E ka sériu!

Kenha ki aji na lejítima difeza

Ka ta kondenadu pa nun krimi

Kódigu Penal ka ta konsidera-l

Ma e skluidu di antijuridisidadi.

Mas si ovi exsesu na difende

Santxus ta rusponde pa krimi

Tipifikadu komu dolu o kulpa

Ministru ta bai serdu la Infernu.

Na Banku di Urijensia di Praia

26-10-2022

Armindo Martins Tavares