Cultura

Omi di nha tera

E son di korneta tokadu

Rapikada’l txabeta

Bandera finkadu n'aitu Sera Malageta

E vibrason di tornu dadu

Mudjer di nha tera

E korpu, talentu di muzika kantadu

Lingua disbobradu konbersu papiadu

E asukra sakedu t’anda ka ta dindereti

Su pol na lingua ku bulil boka ta feti feti

Omi di nha tera

E po ku pilon

midju ta subi di txon

E kafe kenti tonda ku bora

kofu di katxupa

Mudjer di nha tera

E raiu di sol, strubon, txia ki linpa tudu rubera

Kufongu ku fo gu’l panela ki farta tudu simentera

strumu ki struma tudu Txon Bon

E pikareta ku inxada ki konpu tudu Txon mau

Omi di nha tera

E rubera xeiu di lima

E padja sakedu na ladera

E leti'l kabra fresku xeiu di skuma

E oliu ku sabon di purga

Mujder di nha tera

E nha mai, nha madrinha

Irma, nh'amiga, prima Fatinha

Kriadu riba’l tera pufa pufa

Na forsa kusal berdi tupa tupa

Omi di nha tera

Bunitu, bazofu,

So odjadu la ta ben

Fogeti ta zingi la kel otu len

Korpu di Afrika

Ki so nhu djobi agu ta pari na boka

Mujder di nha tera

N ta odja’l ta pasa kabelu labanta-m na kabesa

Tra’l konbersu, toma’l tenpu na trakinesa

Djuda’l karega si troxa ku manduxu furta’l txapu dentu’l boka

Djoronbo’l sulada, kasamentu markadu tabanka ben ta toka

Omi di nha tera

Odju di strela

Surizu di lua

Freskura di orbadju

N ta trasforma in sereia

Serieia di nha tera…

ka mesti pinta nen pentia

Ta nada agu ta brikibriki

Karni moli kritxikritxi

Sen fastiu ka resta nun fatia

Omi di nha tera

El ki ta fla-m kretxeu

Me kre odja-m ku veu

Pa nu ama mesmu la na seu

Ma si amor pa mi e txeu

Mudjer di nha tera

E "mel"-Ô-dia oras ki sol labanta

Alegria na kasa oras pinta manta

lus kanba’l na odju ngoda’l baxu’l jetu

roba’l kurason tranka na bu petu

Omi nha tera

Korista sabi’l konkista

Ben xinta na nha bera

Na txon o riba di stera

Bu obi storia di nha rubera

Autoria:

Andreia Tavares /foto) i Nek Medina