Cultura

Na bu odju, N odja tristeza

Tristeza di pobreza

Un tristi rialidadi di dizigualdadi

Separadu pa sosiedadi

Na bu rostu

Teni sufrimentu

Sufrimentu di vivi sen vensimentu

I trabadja sen rendimentu

Na bu korpu

Teni kansera

Kansera di mudjer trabadjadera

Ki buska bida ku si banhera

Na bu pensar

Teni rapendimentu

Rapendimentu di odja bu fidju larga skola

P’el trabadja i ser omi di kasa

Na bu korason

Teni priokupason, na pensa, kuse bu ta poi na kalaron

Sabendu ki bu ka teni nun tiston

Un dia, na puera, podi ben bu sorti

Pamodi bo e, un mudjer forti

Bu sabi sukundi dor

Tudu ki bu fasi e ku amor

Bo, mudjer kriola

Ki meresi txeu ligria