Colunista

N sunha ma Djustisa bira dodu

Antis di e bai Trindadi nternadu

E sai na me-di ruâ ta papia el-so

Ta deklama kel puema li-sin-sin:

Abo e ton buru ki bu ka da kónta

Ma un grandi silada nu pronta-u

Klienti nu prende, pasaporti nau

Kel-la éra iska pa nu pode pega-u.

Dipos bu marinba na disizon

N manda pa po-bu na prizon

I bu staba ta armaba en bon

Anton, N enxina-bu toma ton.

Ku patron ka ta brinkadu

Sikre abo e un deputadu

I atentadu kóntra Stadu

E ka kusa ki ta toleradu.

Bu intxi juizis di aldrabonzeku

Ma ami e pilon di inkonpitenti

Go dja N mete-bu dentu beku

Pa bu odja ma bo e ka balenti.

Sikre nu fladu: "sen burgónha"

Pa nu ka mete sidadon medu

Na Trubunal e nos ki ta ganha

Sikre provadu ma nos e ladron.

Anos nu sta li tudu susegadu

Sen medu si fitiseru kume-nu

Mesmu ki nhos da pa sabidu

Nhos dizeju nunka ta tinji-nu.

Nos nu sta li móda pisónha

Pa fitiseru, nu ka ta kumedu

I nen si nhos bira ta dibinha

Kóntra nos, nada ta fasedu.

Sikre Trubunal dura ku julga

O sikre mesmu e nega julga

E ka uniku instánsia ki nu ten

Ki ta demora ku rozolve kusa.

Nos Trubunal e indipendenti

I nos juis tanbe e  konpitenti

Ken ki ben li, arma en ezijenti

Ta konsideradu un dilinkuenti.

Nos e un Stadu di direitu dimokratiku

Unde ta funsiona separason di poder

Djustisa ka pode sta fastenta Governu

Governu ka pode sa ta xatia Djustisa.

Bu pode pensa ma al-ben un diâ

Ki bu ta ben  po-m kórda na obu

Ta rasta-m kósta na txon li Praia,

Dixi Pónta Belen kanba Sukupira.

Palmarejo, 30 de Julho de 2022