Cultura

Des ki universu brilia

Dios da-bu bida

Mas kalindariu kria

Oitu di marsu pa bu dia

Mudjer, bo e, tudu dia

Ta manxi ta rasgata un fatia

Ku presa ku fadiga

Forsa e bu kantiga

Bo e mudjer, mo di tirna

Rostu di sinsa

Bexu di brasa

Odju di fumu

Surizu di kufongu

Kabesa di troxa

Txeru di mufia

Petu di kabas

Korpu doxi di bagas

Koxa di lua xeia

Kabelu sima flor di binbirin

Pe finkadu sima kalaron

Koraju di pe di sinbron

Mudjer di saia ku prega

Di grodi fora lensu

Mudjer ki modja pe, ku urbadju di laxidu

Ki p’el kusia, el ten ki fri ku spinhu

El fasi tapun na rubera

Inbipu pa korbu ku pelada

Ku si kandia ta libra lolu di ladera

Ta kori dentu di txuba pa ba po lata na inbera

Na bu porta nen pa bu xinta na sulera

Na bu boronsera ka ten strumu

Mas bu kosta ten ninhu pa bu fidju

A mudjer di boita, mundu

Sen tenpu di diskansu

Bu meresi ligria

Na bu kantu

Anu riba di anu

Perinkuantu bu teni bida