Colunista

Mordomia ta nfrakesi ser umanu. Por isu ki pobri ten karan mas rixu di ki riku.

Antigamenti  oki  mudjer staba gravida, e ta sigui ta da si rezan normal ti ke da lus: se pexera,e ta sigui ta bendi si pexi , se pursora e ta sigui ta da si skola, se rabidanti e ta sigui ta rabida si bida.

Por isu ki manenti mininu ta naseba  fora di kama, alguns nasi na kaminhu otu nasi na orta, dja nasi na lugar, dja nasi na ladera, ti na fornadja mininu dja nasi. Sen konta kes ki paridu na ta bai manenti:  na karu, na lantxa, na barku, na kamion, na avion, i ten mudjer ki dja dixi di buru pa podi pari.

Ta kontadu ma ten mudjer ki pari el so, kaba korta mininu biku ku denti.

Txeu bes, mininu ta podu nomi stranhu, dividu a kes situason li, di akordu ku sirkustansia  o lugar ke nasi . “Texte” e nomi di un rapasinhu ki pa gosi debi sta ku si 15 anu di idadi. El e nasi dentu di sala di aula di un universidadi na sidadi di Praia, en plenu testi.

Okanti e nomi di un sinhor ki debi teni 45 anu di idadi, es "então" mininu oji mediku di miniu, nasi en plenu osianu atlantiku dentu di un naviu, por isu e erda nomi di es barku ki ta faseba viaji entri Cabo Verdi i Guiné Bissau.

-Diploma… Ó Diploma! ben toma leti…  dentu kel un rapasinhu di si 7 anu di idadi trabesa rua na skarera  perdi na beku. Na baskudja pamodi ki kel kriansa ten kel nomi, avo konta:

- Si mai sai di Kau Verdi pa ba fasi kursu na Brasil, na tirseru anu e ben pa tera ku rapasinhu dentul mo, dja nomi pega faxi propi… Diploma.

Ten txeu argen ku nomi di limaria, dias di simana, otu ten nomi di apelu a vida., pur izenplu un mai ki ten purmeru fidju mori, sugundu mori, dja kel terseru si nasi matxu podi podu arguns di kes nomi li, pa podi ka mori: Bodi, Djak, Galu, Kabritu, Matxu, Nhu Buru, Kintu etc…

Si nasi femia ta podu: Nha Baka, Pinton, Ponba, Kinta, Sabu, Diminga Sugunda etc.

Pari e un kusa ki ka ta spera, ma dja txiga ora, nada ka ta paral.

Ken ki ta flaba ma mudjer ta ten fidju riba di un pe di arvi. Keli kontisi na Mosanbiki na 2008 na altura di kes purmeru txeia.

Mudjel gravida e kusa bunitu, dilikada, frajil; kanela gros, naris largu, kosta pa dentu, bariga pa fora, boton folgadu, xixi pertadu, ropa poku, sapati razu, 10 kilu a mas. Ki fofura... Uns ta kumi duranti 24 ora, otu ta tra stangu ti 4 ora. 

Ago, ten un kusa ke so prenha Kabuverdiana ki ten; “Fastiu”.

Fastiu di piskos di maridu, fastiu di porteru di ospital, fastiu di kotxi po, fastiu di pitsa, fastiu di Abron, fastiu di ronku jilera,fastiu di karu kanpanha, fastiu di Trinku, fastiu ti di sinu 6 ora ku businu kar di Toku

Otu kusa ki prenha di tera ten sen konta e Sénsia (manha) ou seja un gravida podi janta so xurasku duranti novi mes, dipos, e ka kumel nunka mas na vida…. Na papia na xurasku, un storia dja ben na mimoria, i pa konfirma kel ki sta skrebedu di pa riba, es storia sa ta ben ser kontadu sima pasa.

Un amigu ki ka ta da pa fla nomi (Paulo di Purfica) tinha si sinhora na kel stadu di grasa, madame xinti un gana kumi xurasku ki ka ten otu ramedi, so ki ora dja staba avansadu na noti i es ta moraba un kusinha lonji di kioski, mas  dipos di algun insistensia sen susesu, sinhora kumesa ta uza kes arma ki nun omi ka ta aguenta:

Dona puxa boka, rufa rostu, spanka porta, koba gatu, subi tv, sanha na mininu.  Tenson kumesa subi si kunpanheru, i pa ivita danus maiores Maridu labanta di sufa, bisti, po txapeu sai tras di xurasku.

-Gosi ka mesti mas n sa ta ben deta! Mudjer rasmunga kuazi dentu del

Omi sai konfortad má xatiadu. Dipos di anda vila di un ponta pa keletu

E volta pa kasa suadu, kansadu pe rusu, ku un gastu  di mil skudu, dentu es kau mau, ku si mei xurasku dentu papel aluminiu.

E abri porta e kanba e fla djan trazeu xurasku

- N ka kre xurasku fomi dja pasa.mudjer kudil rosta pa tv

Bu ka kre xurasku?... N ka ta kerdita

Pasa meia ora mudjer ka djobi xuraku ku si odju: Kunpadri xinta da un bedju na xurasku,  ku kuza fresku, subi kama deta.

Un ora dipos e argui pe ba kaza banhu e atxa mudjer xintadu lapu na txon ta nhemi kes osu, na maior prazer di mundu.

Mudjer foi sinsera ku el go...

-Mor!... mi e osu ki n kria, mas so osu ka ta bendedu!...

Obrigadu kode

obs: Ja agora un alerta:

Sunha ku sanpe e sinal di gravides sertu! Verefika.

Princezito