Cultura

Madur, moli

Nobu, loti-loti

Berdi, la Kaká

Madur ku leti kenti'l boli

Ku pexi, kaldu pexi

Sen pexi, txira

Banana Kunha

Banana Bentura

Banana Dimingu Pazinhu

Es k’e banana ki da di papia

Pe na txon, odju pa seu

Sen el, festa ka dimeu

N ba na Bana, N pidi-l un katxu

N ba na Ana, N pidi-l un mama.

Fodja berdi bisos ta sana

Ka ten distrinsa femia ku matxu

Konxedu propi pa banana

Sima sol ta ba ta fortia

Djunta fodja fasi manta

El ku mandioka ku karni bodi

Nha genti, banana e bental di rabidanti

Boisu di kanpunes

Boisa di nos ospri

Bu ten txon, bu poi banana

E dinheru ki bu poi na kofri

E kuasi sima mudjer

Ten mama

Ten biku

Ten leti

Tanbe kuasi sima omi

Ten katxu

Ten katxon

Ten katxeti

Preta biku-berdi tera masan

Ten pon, anon, jiganti

Ki ta distrinsa-s, e rabidanti

Ten bedja, ten rapariga

Si bu odja-l prenha

E bota bariga

Fama di sendi, N ka obi m’e dadu

Mas rabidanti fla m’e ten rabu

Banana ten mau maskau

Kel kamisa ki mas ta ronka-bu

Fladu e kel k’e ta noda-bu