Colunista

Ta papiadu na Separason di Puder

Mas anos, nu ten Union di Puderis

Dja es djunta es tres ta tersidja-nu

Nton nos dja nada fase nu ka tene.

Es tene nos téra kabésa pabaxu

Bóka ntoladu na se propi gumitu

Mas nu ten fé firmi na Nhor Des

Ma inda kalsa ta kai-s di kadera.

Puder Judisial poi sidadon na kadiâ

Lejislativu toka palmu, fla: Apoiadu!

Ezekutivu bira kósta i fla dentu del:

Si inda bu ka prende bu ta rapende.

Mas, sidadon nada ka faseba.

So e intxi juis di aldrabonzeku,

Di inkonpitenti i grandi gatunu

Pamodi ma e falsifika prosesu.

Pa kel-la, juis ka julgadu

Sidadon tanbe ka fitxadu

I ago es panha-l nsodadu

Sen dór e sta butuperiadu.

Mas e ka el ki debe strobadu di fla

Ma na es téra ta fasedu so asnera

Mas sin, e algen ki ten ki ta paradu

Pa e ka fika senpri e ta fase mérda.

Pamodi di kes kusas ki el e fla

Uns pokus ratu pode bai prezu

Mas pa kel go ki ratu sa ta fase

Kuénsa-kuénsa e pa nos moku.

Ta flaba un bes, un ditadu popular

Ma tra ka poi, sikre na txeu, ta kaba

Ma si rukutidu oxi, rukutidu manhan

Dentu poku tenpu ta kaba kusa rukuti.

Más pior indimigu di nos téra

E kes ki sta xintadu na puder

Ku pratu xeiu i bolsu stufadu

Ku dispréziu pa fidju koitadu.

N ka ta saporta odja makakus ta furta

Pa N fika ketu sen N fla po nen pédra

Si es kre graba pamodi N fla-s ladron

Mi me N ta graba, pamodi es furta-m.

Na nos téra ka ten mizéria

Ten e governantis ka sériu

Ku milionsis na ses saláriu

Povus ta vive vida prekáriu.

Óras ki un des sai kelotu ta kanba

Ta nbosta riba'l bósta kel ki staba

Aes tres es tene kabésa djuntadu

Pa dexa-nu tudu-fepu disgrasiadu.

Dja es jura pa es ka frónta kunpanheru

Pa es tudu es pode djunta txeu dinheru

Pa es skese ma es e so fidju di mokeru

Ki moraba mariadu dentu dun pardueru.

Fladu ma separason di puder

E fundamental na demokrasia

Mas di-nos go djuntadu fepu

Pa pintxa povu pa disgrasia.

I odja ma povus dja sta kansadu

Un kualker diâ lumi pode sende

Kaba gosi ki bonberu fase grevi

Lumi ta lastra, kau ta txumuska.

Palmarexu, 2 de Agostu di 2022

Armindo Martins Tavares