Colunista

[badiu]

Dja rueda ma nos

e partidu di sanbisenti

npos ku skoregadela di bisenti

gosi dja n konfirma

sima kuatu son dos más dos

e purisu ki nu perde

kes kámara li na ilia di santiagu

e dinheru pa karnaval

e ikonumia du mar

e kumandu di guarda naval

e pilintra ta inogura bar

ta fuma padjinha

na si pasa-sabi

ki el ta fika uar-uar

ta sai ta fika ta dispara

ta kanta «eu sou u kara»

e alex kasabi

na ruberinha

e adiministrason di enapor

kuandu so praia

ten más muvimentu di bapor

ki kes otu kabuverdi interu

(kel li tudu brajeru

sabe di kor

sima un pesa di talaia

tokadu dés bes la musteru)

si nos pueta kandidata pa prizidenti

el ten ki fase dos prugrama

un prugrama di konkista votu

i programa verdaderu mas sekretu

(pamodi un munti di nos inda

ka sta pruparadu pa es pasu izijenti

pa nos konpletu libertason

purisu nu ten ki bai ketu-ketu

non dizendu mas fazendu)

ki e prumove un rifirendu

non pa rijionalizason

ki kel li dja e ka opson

kel li na pontu ki  dja nu sta

ka ta leba-nu nun kau

e so gasta dinheru ki ta kusta

mas pa nu leba ti últimu konsikuensia

diskursu ki nu ta obi ku frikuensia

na boka di sanpadjudus «nos somu

istu  nos somu akilu  oropeu i tal

santiagensis so mandjakus afrikanu

sikre es ta fla ma es e kapital»

kre aes e branku merkanu

nau  midjor  es e propi marsianu

nu ten ki toma pruvidensia da un sinal

ma enbora dj'es toma praia es e ka donu

(grandi abíliu duarti ki inpidi kapital

di podu na sanbisenti  kel li e un sinal

ma ten badiu konsienti afinal

i e ku es ki nu ta konta pa es prujetu final)

sin  sima n sa ta flaba-bo

nton kel prugrama verdaderu

(sukundidu  pamodi si sabedu

es ta larga-nu lisin nos so

i komu nos badiu e mal-konxedu

nu staba fudidu  e pa nu kanbaba na bueru)

e pa purgunta si nos tudu e berdianu

i si ten kes ki ta atxa ma es e otu kusa

nton nos mandjakus i afrikanus santiagensis

nu debe kria nos repúblika

repúblika di santiagu indipendenti

kenha ki kre kunpanha ku nos ta djunta

ku nos nun spésia di federason d'ilias

kenha ki kre sigi si kaminhu el so o ku otus

tanbe el ten si liberdadi di toma es opson

parse-m ma nos pueta ta linhaba

na kel prujetu libertador i ridentor li

(e si o ka si?

parse-m ma ta daba-el ku stangu)

sima n sa ta flaba

sustentadu (pa ka disgasta-l)

nun spésia di ucid li di santiagu

mas más radikal

kel li ki era poi kau lumi propi

nu ta nxinba-es modi

ki ta dadu ramoki

nu ta fla-s ma santiagu tudu pode

ma gosi es ta ben badja na nos toki

p'es ben fla ma nu ta kume na ses pratu

bon kel fejuada la tanbe foi senpri un poti

                                              di dizakatu

mas nos nu ta apoia tudu bairismu

na ses rivindikason

di un diferenti distinu

sikre keda na abismu

[nun ton más di gozu]

[badiu]

Pamodi nos e kontra kolonizason

o mesmu sinplis okupason

sokols nu ta fornese-s bazukas

rpgs granadas (mísil antiaériu

nau pamo nos téra dja ka ten avion

i kel li e ka ninhun mistériu)

kontra todus esis okupas

di mpdes paiceves mandjakes

seja kenha di ki kor

                            ki es for

fora ku tudu es

pa kada un kume na si kaza

i na si pratu

p'el brasa si frieza o si braza

p'el skodje si propi kandidatu

p'el liberta na mumentu izatu

k'e di imidiatu

p'el ka sosia ku brabus di matu

p'el ka papia língua di pretu

(k'es kre inpo-nu el pur dikretu)

ki son esis santiaguensis djakras

ki ka ta dexa otus ilia en pas

[un personajen kuju sotaki

e di norti mas ki ta persebedu

m'e di un di kes di otu ilia 

ki bai sanbisenti o un badjudu

(sanpajadu nasedu na praia)

mas ku mitu ki ses gentis grandi

ta po-s na kabesa (i es ki e pior

bairista kontra praia) ta toma palavra

i el ta kontinua   otor tantu na kazu

di badius komu di sanpadjudu

o badjudu el ta limita da

personajens vos   so koru ki sabe

kal k'e si pensamentu]

[badjudu]

Ku ses sentralismu kolonialista

ku ses fomi ki ka ta kaba

ku ses filuzufia di konkista

sima ki nos e ses mudjeris braba

i inda es ta fla ma nos k'e bairista

es faze ses repúblika afrikanista

nos nu ta djunta ku oropa

aes es ta seka sima soka

nos nu ta navega riba la na krista

nu ta fitxa tudu nos frontera

pa ivita invazon des bárbarus

badiu jamas nu ka ta tolera

si es oza ta sai-s ben karu

[xuxinhu ta fika ta da palmada

na kadera ta fika ta fla]

[xuxinhu]

                         Es ta leba na kel kau

                         undi ki ta dadu mininu

                         tau-tau

                         pa ka ser trakinu

[badjudu]

Un viva pa nos k'e úniku kabuverdianu

oténtiku i verdaderu

(kes otu fika so ku txeru)

pa nos ki stória konsagra-nu

bersu des nos distinu umanu

k'e ka dexa badiu nen rabaxa-nu

kuantamas umilia-nu

sikre dja nu mandaba i nu ta kontinua

ta manda    esta e ke e a verdade krua 

ki so nu amiasa abri boka

dja tradu mama dja nu podu na boka

pa ivita sulabanku ku bronka

rijionalizason dja e ka meta

gosi ki dja nu entra na reta

di indipendensia   nu marxa firmi

pensa dotu forma pa nos e krimi

es fika ku ses repúblika indipendenti

ku kel badiu li armadu en balenti

komu ses prizidenti   es na ses téra

nos na di-nos   sinon e propi trisera géra

                                               mundial

i sugundu géra di libertason antikolonial

nos na nos reinu di rotxa nua

sen kasubodistas na rua

sen badiu ku txeru fedi

sen es mandjakus ta da pedi

avanti ti nos libertason final

nos distinu dja nu sabe e kual

vive na nos sonsenti libertadu

ku monti kara ta suri pa nos

alegria disfraldadu pa tudu ladu

pamo nu ta ben vive livri nos ku nos

na nos paraízu pikininu

mas k'e nos grandi distinu

ku nos bandera (i nos inu)

k'e es séu azul ki ta kubri-nu

ku nos reis i rainhas di karnaval

na folía na klubi naval

ku nos mandingas úniku manifestason

di karis afrikanu ki nu ta pirmiti

pamodi kultura di pretu ten limiti

nes reinu di pasa-sabi   nes txon

ki stória i distinu konsede-nu

purisu nu ta toma nos indipendensia plenu

pa nu konsagra morna nos verdaderu rainha

i paródia nos rikonhisidu kaminhu

tudu nhos nhos ten ki ta linha

ki ka kre ten ki djobe otu ninhu

rilason karnal ku es badius stranjeru

ta ben ser tirminantimenti proibidu

si ka obidisedu  ka setadu o ka kunpridu

nton es ta iziladu pa kel téra di disteru

i si es ten fidju komu konsikuensia des inkonsiensia

fidju ta fika i antis i di es bai es ten ki paga un inpostu

di terapia di asimilason konverson i frikuensia

di sanpadjudismu ki nu ka pode odja nen ses rostu

na kazu di konprovadu i reiteradu inkapasidadi

di asimilason di nos valoris   valoris des nobri sidadi

nu ta manda-s un iternidadi pa stotxa    un prizon

na mei di rotxa ki e un forma di iternu skumunhon

pa tudu nos sidadon intirioriza dretu

ma mankumuna ku badiu e traison di morti

es ten ki ten prupózitu firmi i disizon forti

karega senpri es krensa dentu di ses petu

pa disuadi tudu konspurkason di nos rasa

abortu nes sirkunstansia ta ser di grasa

i disendenti di badiu ti tirseru jerason

enpregu k'el pode ten e so bare ku koba txon

pamodi nes ragas ten so un pensamentu

ntera tudu kel k'e badiu o afrikanu

k'e mesmu ki fla es inkreus kanibais i musulmanu

p'es ba faze miskita ku funku na ses txon di nasimentu

non nes nason di un so dios pai

non nes paraízu ki maior pekadu

e nega ma paródia e rai

i ka pidi bu pai ku bu mai

pa ka korda-u oki bu sta detadu

ta obi un morna ta nina-u sufrimentu

di anus ki bu vive na téra di badiu

na ses sidadi sen sintimentu

sen portu grandi xeiu di naviu

gosi e tenpu di volta pa ragas

larga téra di djakras

da un orora kuluridu

pa es nos ilia sufridu

[nes pontu ta entra un artista

ta interpreta morna «súplika» di Djóia

kelotu badiu ki mante senpri kaladu

ti k'el persebe si kelotu prumeru ka era

                            ninhun infiltradu ki mandadu ben tra

                             del nton el ta papia]

[sugundu badiu]

Nos nu ta faze un otu pruposta

parse-nu ma kel li propi k'e rasposta

pa kes ki kre kontinua bixeru d'oru di stória

mas p'es fika ta sabe ma nu ten mimória

di kantu ki inpididu kriason di liseu

i kantu ki kriadu studa era so ti kintu anu

pamodi so pa es ki debe ten séu

kes otu pa kontinua djakras

pa fika senpri atrazadu ses tras

mante sina di splorason di afrikanu

ki pa es tanbe e so musulmanu

(ó diabu forti aes es ta odia-nu)

di plafon di inportason i tudu otus umiliason

ki ninhun santiagensi nunka ka debe skese

mas ki ta ben kaba oki nu da-s kel k'es merese

alias dja kaba pamodi nos e un rikonhisidu nason

                            mesmu si txeu di nos irmon ki sta na puder

                            e alienadus ki dja skese o bende ses ser

                            i sta npenhadu konsenti o inkonsentimenti na traison

nos meta e txiga glória

fase stória

nos kaminhu e libertason

ta kanta i ta badja na kel un son

baxu di bandera di nos kurason

riba txon di nos paxon

pa nu mostra-s ma nu sta pruparadu

nu ta aplika taxas pizadu

pa tudu prudutu ki ta ben di ses téra

(nu ka sta odja kuze mas dj'es sta avizadu)

kel li e justu  más ki justu  pamodi géra e géra

nu ta insentiva konsumu di vinhu

ku kafe di fogu  keju ku sabola

di maiu  p'es sabe ma nos kaminhu

e un lison ki ten ki fase skola

entrada na nos gloriozu i libertadu país

so es pode pirmitidu dipos di un korentena

p'es ka ben kontamina-nu nos fonti i nos raís

atraves di ses úniku prudutu di sportason

                                                k’e ses pikenas

otu disizon mutu inpurtanti k'e un katisismu

                                                            di ason

ki nu ta ben sigi sima nomi di nos batismu

e ma nu ta ben diklara sanpadjudismu

(di sanbisenti) erezía i ofensa más gravi

ki pode kumetedu kontra nos integridadi

ses múzika nen un son  nen un klavi

p'es sabe ma nu sabe lida ku ses bairismu

di-nos e ka bairismu e atu jinuínu di libertason

di-nos si for (i e ku mutu si) e riativu i non ativu

nu ka pode dexa-s torna manda na nos

                                           fase-nu di djabakos

es ka dexa-nu ninhun saída   ninhun otu opson

brava si ka dispovoa el so di el pa el

nu ta transforma-l nun stansia di ripozu

di kriason artístiku i intilektual ki el

e jardin ki dios fase pa nos gozu

enbora dj'es sufri txeu kaladu

bandonadu skesedu i izuladu

ki nu ten ki ben da naturais di la

un insentivu grandi pa kontinua la

si es kre sai tanbe nu ta apoia

tudu pa praia nos libertadu kapital

di kes sanbisentinu tudu fidjus di kabra

ku bodi   i nu ka sabe más ki otus animal

ka finu nen linpu sima es gentis di djabraba

ki nu ka kre odja más na mar brabu ta boia

aliás sima un fogensi k'e di-nos ta ben prupoi

nu ta kria un federason indipendenti di sul

undi ki branku pretu pardu amarelu tudu e erói

[dentu kel li ta parse un omi ngispadu

flipadu propi  ta kumesa ta dispara

kontra santiagu i ta trava enbalu di

badiu na si pruposta federativu 

es individu nu ta txoma-l klaséniu kapina]

[klaséniu]

Nos nu ka kre nada ku es badius xuxu

es sentralistas ki larga-nu na mei di rabuxu

nu ka kre integra ninhun federason di sul

indipendenti o nau  es ba rabenta la pa infernu

nos nu ka kre ses fedor di kolonizason iternu

nos nu kre e kes gentis di kel téra sabi i kul

ki e branku torna finu sikre mufinu sima

katxor  nos tanbe nos libertason sta prusima

nos k'e sustedu na merka i es k'e fidju d'oropa

badius brabu rabeladu p'es ba vive na ses toka

gosi dj'es studa tudu ki dj'es ká pasa-nu

gosi ku tudu arogansia dj'es kre masa-nu

mas nos e branku ku stória i ku pasadu

aes dj'es rikise  mas nobreza ka ta kunpradu

[badiu]

Ale-s nel   kre es ka odja ma tenpu muda

inda es sta ku mania di branku di sobradu

ki dj'es fika na ses stratifikason nkunhadu

mas p'es ka skese ma ki liberta santiagu

i torna-l ton odiadu i nos di kintal el sperta

pa nu ka fika so ku stangu ku bariga ta perta

pa nu ka fika ta txomadu di pretu i di bagu

pa nu ka fika so ku mo na kexada ta kuda

foi nos ki ka podeba nen sunhaba studa

foi nos ki ka tinha nen farelu enpriende

si ti oxi inda ses kabesa ka konprende

e pamodi es ka ivului  es fika paradu

na tenpu  menti ka liberta  mante alienadu

spritu di-ses kontinua kolonizadu

mas sima nu sta flaba antis di es

publisista intoronpe-nu ku si bairismu

antisantiagu (mas gosi e ka un bes

gosi nos ki ta guverna nos distinu

purisu kes ki kre ku nos nu ta bira un so

kes ki ka kre p'es bai p’es dexa-nu nos so)

djarmai lisin go ku si gentis mansu

nu ta mante-s baxu d'odju un bes

senpri na nos alkansu  na alkansu

                                    di nos mo

pamodi nu ka ta kunfia na es

                                          nen po

es pode da moli bandia pa norti

i kel la e traison ki ta pagadu ku morti

nton ku rostu runhu senpri riba des ta djobe-s

antis di es fase kualker kusa es ta pensa dos bes

[lisin ta torna entra un personajen ki más

tardi ta entra nun diskuson ku Euritristi

                           Tontera sobri mudjer]

                           [fogensi]

Nos di djarfogu du ka tortu

nos e propi ratorku

du ta djuntâ vinhu ku grogu

pa du fasê sen dimora

baxu des bunitu séu azul

enves di santiagu indipendenti

federason indipendenti di sul

ku omesmu prizidenti

pa du kaba-s ku es batinbora

ku apoiu di merka

du ta korê ku davidi chow

du ta tra xines karepa

du ta mostra-s ken k'e bon pa xou

es federason du ta ben stima-l

sima nos fidju i nos kretxeu

pa du ser pa senpri afinal

djuntu más livri i indipendenti

ku nos ruspetadu prizidenti

ki dja nhos sabe al ser kenha

du ta da mo du ta fra mantenha

du ta mostrâ ma du ten prakenha

pamodi vinhu ku grogu

praia ku djarfogu

es nasê p'es ser kel un

suma koka-kola ku run

dos korpu un so kurasaun

kuatu korpu si e nhos opsaun

mas des bes pa rizulta

des bes du ka ten diskulpa

dos nason (o kuatu nason)

mas tudu irmon

dos kaminhu o kuatu

mas un so distinu

ta badjâ funaná ku talaia

ta torâ ta labantâ saia

ta tra djatu

ki ta kabâ ku madorna

mas tanbe ku morna

(mas so di maiu ku djabraba)

na sabi ki nunka más ka ta kabâ

lonji di kes sanpadjudu mofinu

amantis di toresma di suínu

ki na ses língua xuxu es ta txoma txuke

es ki ka ta pasâ di pobri duki

fidjus di gadu kaprinu

pa du ka txuma-s fidjus di kelotu kusa

ku rostu di fomi ti ki dja papusâ

ku nos sínbulu di nos vulkon

ku nos monti piku ntoni

ki es ta djobê pa imensidon

omesmu tenpu ki es ta mostra-nu txon

nos paraízu apagadu pur un truvaun

k'e rainha di nos kurasaun

i sima du sta fraba xeiu di imusaun

k'es ta riskâ distinu di liberdadi

nes tenpu di nos idadi

na stason di maturidadi

ku nos signu i nos nomi

ki nasê pa es nisisáriu unidadi

e ku orguliu inormi

ki du ta prupô adotâ komu nos inu

kel ki pueta ofereseba kabuverdi

mas komu es e kobardu i mofinu

es ka setâ i es ki fikâ ta perdê

du ben kanta-l pa tirminâ

suma pueta kantâ nos sina

ora dja sa ta prusimâ

nos papel e so konfirmâ

[ta entra inu «pátria [e] liberdadi»]

PÁTRIA [E] LIBERDADI

Nu orizonte azul

furjámus u destinu

aki neste sul

onde a maun du omein

peska strelas

du kabu à ilia

da sina à sorte

du gritu à glória

se du piku à eira

da lestada u son mufinu

naun sesamus de skutar

onbru au ar

nosa arte de marear

nus alenta na surtida

nese mar ke é toda a vida

kon suor i ânimu

regaremus

kontra u tenpu

i kontra u ventu

plantaremus

a serteza da pátria firme

a ideia du omein livre

kontra a maun da opresaun

na manhan

ein ke us búzius kantaraun

ó pátria livre

livre de ser

ein somente liberdade

u xaun du omein

a várzea da verdade

umanu mandamentu

ke eternamente

kantaremus

du kabu à ilia

da sina à sorte

nese mar

ke é toda a vida

                            [pueta ta kontinua ta bana kabesa

                            mas koru ta kontinua sen fla-nhos si

                            era spantu o aprovason  dipos ta entra

                            «santiagu» di danel rendal a-sigir «ilia

                            di santiagu» di máriu lúsiu i un talaia

                            ki ta kanta djarfogu inda «txoru di maiu»

                            di tibau tavaris i na kaminhu di djabraba

                            koru tanbe  ta digigi kabesa i ta fase

                            es diskursu inigmátiku]

                             [koru]

À tentason tentason

ali ben tenpu ki pikinoti

ta tenta ser inda más pikinoti

ta tenta dividi padas-padas

p'el fla m'e distinu di tudu bibu

kuriji o vinga mau nasimentu

o kel ki desdi kumesu di tenpu

dja staba disididu

i des manera kontesta variason

o diferensa sima sonbra dentu'l poti

o keda na skuridon di noti

skesendu pa senpri kel antigu pas

ki era sinta sertu o obuskuru simentu

ki ta manteba identidadi na si stribu

o kaminha lonji di tudu prigu

gosi odju dja abridu pa pekadu

dja skesedu fidelidadi pa pasadu

                           ó omi si bu ka riseia sonbra'l prigu

si tudu pa bo bira bentu banal

sen kel grandi strondu ta anunsia

skuridon dentu di abismu final

sen sabe si bu al kunfia

nton e pamodi riba di bu nasimentu

podu un pedra di tamanhu di pobreza

i bu rostu ka djobe nunka más pa grandeza

i nen si bu boka abri pa pidi perdon

dja bu ka konxe palavras o son di reza

nen rikeza pirsigidu di kontradison

di diferensa na krensa

                           o na diskrensa

so eku di bu osu ta digigi na si tenpu

sima un murmúriu di kontrison

nun sertu séklu ta buska si perdon

ó omi ki dja bu ka ta vive na rinunsia

nen bu orguliu ka ta anunsia

prazu di festa o kazamentu

pamodi di ladu d'osu bida e tormentu

i ali ben tenpu ki nen oraku o sensia

pa fla-u ma alarmi e otu simenti

o sinplis vizitason silesti

obi-l si bu sabe sintoniza si frekuensia

kel li tudu e festa pa obidu di nos mestri

kanson o toki pa nu skese sufrimentu

o frida o sangi di mumentu

pamodi nos e pikinoti vil bitxu terestri

i nu entantu nu ta labanta nos mo

nu ta konko spantu xintadu el so

pamodi téra e stretu

i vatísinius e mufinu

pa tantu ki nu meste

mas noti iternu al planta-nu

imensidon dentu di nos petu