Pub
Por: Ricardo Cabral

 rcabral pic cronicas 01

Kel inxada; simplis kusa, mas tambe storia di um povo condenadu na pobreza. Ah monda!

Palmu mon ratxadu, gros, di nos pai ku mai, e copia di mon di nos yaya ku bisavo. Tudu s'es mon, e mon ki da-nu cumida na pratu, ku vagar i forsa di inxada.

Batata, mandioca, baxinha; tudu mata-nu fomi; tudu mata fomi ti di kenha ki ka conxi orta; i tudu sai di txon nbrudjadu na inxada.

Kel omi simplis ku rostu cansadu, kemadu na sol i ku odju bermedju trocadu puera, e kel omi ki garanti nha saudi, garanti buniteza di nhas irma, garanti nosentesa di nhas subrinhu i ti bacandeza di kenha ki tem tendensia di bacan.

E' usa um inxada. Kel um po bedju ku feru ferujadu, ki tem mas idadi ki mi. Es da ku el na tera undi gentis grandi masa ku pe, i undi mininus dja obi da cumpanheru ku pedra. Congu nasi sime, midju da boneca, cana ba' ceu.

Luta na sedu, pa sobrevivensia, di kel omi ku si familia, mudjer ku fidju, ki faze-nu subrivivi mas tardi. Ale-nu li gosi, basofu ku mon finu.

Inxada ki pripara txon na kel tempu, tambe pripara txon ki oxi nu sta cori tudu dia, memu ki nu sta longi di lugar. Na kel mare es busca azagua ki modja nos sabura di gosi. Nu selebra, nu lembra. Nu e rixu sima inxada.

E nos me' ki ta compu txon di nos distinu.

Comentários  

0 # Sleni 11-02-2019 09:38
Muito bom meu amigo. Poesia dedicado a todos que dia vem, dia vai segura a sua inxada para procurar o sustento da sua e de outras famílias. Minha mãe é uma delas, minha avó foi uma delas assim como muitos outros. Em nome de todos tomo a liberdade de dizer obrigada pelas lindas e sabias palavras.
Responder
0 # Marciano Moreira 09-02-2019 01:37
Ti ki algen ten odja pa odja i kurason pa ama, seu e limiti pa puezia! Obrigadu pa es ominajen meresedu! Obrigadu pa ser nos porta-vos ilukuenti! Forsa!
Responder
+1 # Francisco A.Carvalho 08-02-2019 11:54
Parabéns, Ricardo! Um retrato poetiku bunito di nos rialidadi!
Responder