Cultura

VERGINHA (pa Pirekis) – Dja N sabeba. Afinal éra un di bus «mamadores».

AJENTI – Antis di e moreba, e sa ta trabadjaba ku tiu di Sugundu Ex.

PIREKIS – Dja bu sta odja? E más un «mama-m buâ». Más un aldrabonzeku móda bo.

AJENTI – El e ben mâria el ku kes otus rapasis… ku kamaradas di Komandanti!…

PIREKIS – Tudu kes kurúputus, kes gatunus ki N kóre ku el, bai djuga fepu na bu timi.

VERGINHA – Si e kel ki N sa ta kuda… ka bu skese ma el tanbe e foi konbatenti sima bo. Ma el mé e pega na arma pa nhos pode toma téra.

PIREKIS – Gosi bu fala un kusa bunitu.

VERGINHA – Ami senpri N ta fala bunitu. Ka bu skese ma mi e dotoradu.

PIREKIS – Mas gosi go bu fala mas bunitu, pamodi bu papia verdadi. Kusa ki difisilmenti bu ta fase.

VERGINHA – Kusé ki N fla, ki bu atxa bunitu?

PIREKIS – Bu fla: «Pega na arma pa nhos pode toma téra».

VERGINHA – N sta na brinkadera ku bo.

PIREKIS – Bu ka sta nada na brinkadera. Patifu ki bo e. Gardion!

VERGINHA – N ka sabe si dja bu rapara ma mi N ka sa ta ofende-u!

PIREKIS – Anos nu toma téra, anhos nhos ben go salta-nu, nhos da-nu kasu-bodi, dja nhos torna kaba bende stranjerus kuazi fepu. Orelengus! Maldisuadus!

VERGINHA – Ningen ka manda-nhos pega na arma. Nhos ka ten ki ben da ningen ramoki gosi.

PIREKIS – Mal lobadu! Si Kabral ka daba se bida… si nos nu perdeba nos mosindadi na matu nu ta briga pa nu toma nos téra, bu ta ben mandaba na bu kumadrti di madrinha. Fidju di naxu! Bazalisku!

VERGINHA – Ka bu skese ma kel pesoâ ki bu sa ta fla ma djunta ku mi pa nu kóre ku bo, ma tanbe, e pega na arma.

PIREKIS – El e ka pega na arma teoxi. Es e un-monti ki staba la… ta faseba más, éra faxina na kusinha. Txeu des nunka ka da un tiru… nen ka sabe modi ki ta dadu un tiru ku spingarda.

VERGINHA – Nton pamodi ki nhos ta fla, i nhos baza-s dinheru sima padja, pamodi ma tudu kes ki ben di matu ma e konbatenti?

PIREKIS – Fla mé?! Bo bu ka flaba tanbe ma dimokratas e kes ki linha na bu movimentu pa da ku mi na txon?

VERGINHA – I e sima N fla. Sta skrebedu na dikretu-lei ki N skrebe.

PIREKIS – Bu skese go, ma ten kusa ki ka debe kiriadu pa dikretu. Dimokrata ta nâse. Ka ta fasedu, ka ta kiriadu. E ka nos ki ta fla kenha ku kenha ki e dimokrata.

VERGINHA – Mas prontu… dja kaba.

PIREKIS – Ok. Si dja bu reia… N ta seta. Ago… komu divogadu ki bo e, kusé ki bu atxa ma nu debe fase?

VERGINHA – Nu dexa kusa fika li-sin, i sima sta li. Kel tipu di skándula li, na nos, e pior di ki vírus di SIDA, ÉBOLA, DENGI o KORONAVÍRUS.

PIREKIS – Kel go… e sima bu fla mé. Dja N odja ma oxi bu sta pa bu papia un verdadi. Purtantu, si bai kexadu ma nu staba na malkiriason, N ta papia ku Zemanébra e ta torna rakonduzi Porkariador-jeral, e ta subil más dinheru, e ta da-l un di kes Mersedis nobu… Porkariador ta manda arkiva prosesu.

VERGINHA – E ta manda ruma-l djuntu ku kes un-monti ki e tene la na gabéta ta kiria mofu. Djuntu ku kes un-monti di-bo ki e tene la! Só kóntra bo e tene más di dés prosesu na se gabeta guardadu

PIREKIS – Mas ka nu pensa na kel-la gosi. Nu konsentra na kusé ki nu debe fase pa nu difende nos kabésa

VERGINHA – Sikre Zemanébra ka rakonduzi-l, fla-l pa e manda-l trabadja la Timor. La e ta bai ganha dinheru sima padja, e ta skese di tudu nos bandidésa.

PIREKIS – Aian! Abo bu poba un-monti des la.

VERGINHA – Klaru! La es ta ganha más di mil kontu pa mês… es ta goza di imunidadi ki krimi ki es comete li ta prescreve moku, timenti es st ala.

PIREKIS – Ten un propi ki fladu ma bu poi la, pamodi ma e djuda-u ngana Bispu ma bu ta diskubri kenha ki kebra-l se Santu na igreja. Ma kantu kusa da pa tortu, ma bu manda-l Timor pa e ka rusponde na djustisa.

VERGINHA – Papia más baxu! Bu ka odja ma pode obidu?

PIREKIS – Bu ten medu?! Kaba fladu ma e po-u na burgónha! Ma e ta staba la, ta «da di punhu» na meiu di kolégas, pa e mostra ma el e matxu.

VERGINHA – Trimodi e ka so ele ki koredu ku el di Timor.

PIREKIS – E verdadi. Oxi go dja bu tra pa bu papia verdadi. Ten un tanbe ki koredu ku el pa inkompiténsia, mas nhos ben po-l li e ta fase so mérda… poi téra gravimenti miasadu ku se buréza.

VERGINHA – N ka sabe pamodi ki bu gosta di falta algen!

PIREKIS – Diskulpa-m!

VERGINHA – Ok. Mas bu ten serteza ma Zemanébra ta torna rakonduzi Porkariador-jeral?

PIREKIS – Ki otu ramedi ki e ten?! Si e riska na bai nomia otu Porkariador-jeral, Ki ka di se konfiansa polítika, e ta odja lumi. E ta odja Xuxu! Ku tudu kes pursesu ki sta la kóntra el, duranti kes sinku anu ki sta pa frenti li… e ka ta froxa se kadera di banku di reu.

AJENTI (pa Pirekis) – Nton dja nhu purdua-m, kamarada Komandanti? (Verginha ta djobe-l ku rabu d’odju, ta da-l un ngulidura) Dja nhu purdua-m, sinhor Dotoradu?

PIREKIS – Kamarada Ajenti pode bai.

VERGINHA – Senhóra Ajenti pode bai. Nha sta purduadu di es bes.

PIREKIS – Mas ka nha fika ta bebe di kel manera li, ó ki nha sta di sirbisu.

AJENTI – Oxi N sta di fólga. N sai gosi li di piketi.

VERGINHA (pa Enpregada) Nha ka ta nporta di sirbi-nu un rodada, dipos N ta ben paga-nha?

AJENTI – Ami N kre un grogu. (Enpregada sirbi-s Ajenti ta bebe di-sel rápidu, ta da rinkada pa e sai) Nhos fika ku Deos.

ENPREGADA – Senhóra Ajenti inda ka paga se grogu.

AJENTI – E ka Sugundu Ex ki manda pa nha sirbi-nu un rodada?

VERGINHA – Mi N manda pa sirbi-nu mi ku Pirekis. (E ta para un bokadu) Mas nha dexa star. Nha poi na kónta N ta ben paga tudu djuntu.

AJENTI – Obrigadu. N pode toma más un?

VERGINHA – Si nha ka sai, imidiatamenti di li, N ta kumunika xefi di-nha kusé ki nha sta nel.

Polísia ta sai faxi, ta bai ta da dibanda, ta djobe pa tras.

ENPREGADA – Gosi li ki N lenbra: sta-m so ma e kel rapariga ki staba la sin xintadu, djuntu ku kel rapasinhu, ki tra-nhos kartera di biolsu. Es manda-l rapatiadu di Mérka i e pilon di Tagi.

VERGINHA – Mas modi ki e tra-nu kartera?! Di-meu staba na bolsu kamisa, ku koleti riba del i kazaku riba koletii!

PIREKIS – Di-meu tanbe staba na bolsu balalaika pa dipadentu.

ENPREGADA – Ela e ta konsigi tra. I putu anton?!… el e ta furta karu, e ta da algen kasu-bodi, e ta salta kasa ki nen gatu. Es e so Tagi.

PIREKIS – Bu sa ta odja falta ki milisianus sa ta fase? Bu kaba ku es!

VERGINHA – N kaba ku es, N kiria BIK-BAK. Pulisia di xóki. Es tanbe es ka ta brinka.

PIREKIS – Sikre bu pode ranja BRUKU-BRUKU, mas es e ka sima nhas milisianus.

ENPREGADA – Kuazi tudu diâ Polísia ta leba kel putu pa Skuadra, mas pamodi el e menor, Trubunal ta manda-l enbóra más purmeru ki Polísia ki prende-l. I e ta sai ta ri, ta fase trósa di pulísias.

PIREKIS – Pur kóza di un-monti lei di porkariâ ki kel nha golpista li fase.

ENPREGADA – Rapariga dja pegadu kantu bes ta furta, mas e ta sai di Trubunal so ku TIR… Termu di Entidadi i Razidensia.

VERGINHA – Kulpa e di juizis inkonpitentis, ki ta interpeta lei mariadu. Ki nen entri es ku es, es ka ta ntende kunpanheru! Dja nhos rapara un juis ta manda prende un Deretor jeral pamodi dizobudese se órdi, otu juis ta manda larga?

ENPREGADA – I fladu ma Konsedju Superior di Majistratura da juis ki manda prende rezon.

PIREKIS (ta ri) – I kaba nhos ta da mal di Trubunal popular! Si éra la, kel-li ka ta kontiseba. Kel Deretor ta lebaba uns xix láki nakilu, e ta prendeba ruspeta otoridadi.

VERGINHA – Kel putu ku kel put… oh, nhos diskulpa-m! El ku menina es e armun?

PIREKIS – Putu e ka si fidju?

ENPREGADA – Putu e si mos. Menina e si ménbra.

VERGINHA – Es ten ku kunpanheru?!

ENPREGADA – Menina ten vinti i tal anu, rapasinhu ten poku más ki dés.

PIREKIS – Nha sabe napunde ki es ta mora?

ENPREGADA – Es ka ta mora nun kau. Es e sima piskador. Konformi maré sta, i unde es odja kardumu pexi, la es ta piska.

VERGINHA – N atxa ma e más midjor si nu bai fase kexa na Polísia.

PIREKIS – Bu ta seta sirbi-m divogadu?

VERGINHA – Klaru ki N ta seta. N ta kobra-u.

PIREKIS – Kantu?

VERGINHA – Sentu i sinkuénta kontu.

PIREKIS – Poxa! Tudu ki N tene na banku!

VERGINHA – Pa N striba te ki N kursa divogadu, ka foi brinkdera nau, nha amigu. N pasa dés anu na universidade, kantu noti odju ragaladu N ta fase kábula.

PIREKIS – Dés anu?! Kursu di duireitu e ka 5 anu?

VERGINHA – Sta-u ma dés anu e txeu?

PIREKIS – Abo ka sta-u? Dés anu pa bu fase un kursu di sinku… un lisensiaturinha?!

VERGINHA – N ka raprova txeu. N txunba so un bes di kada anu.

PIREKIS – Gosi ki N sa ta rapara pamodi ki bo e bon divogadu! Bo e ton bon divogadu sima bu foi bon alunu di Direitu.

VERGINHA – E ka nada ku bo. Bu ta paga-m 150 kontu o nau?

PIREKIS – Nton es pode fika ku kartera. N tinha so sen merés na el!

VERGINHA – Fórti mizéria. Un Ex! Na di-meu N tinha kuatu kontu.

PIREKIS – E ka nha ábitu anda ku dinheru txeu na kartera. Teoxi N ka xinti nisisidadi.

VERGINHA – Klaru. Si na banku bu tene so sentu i sinkuénta kontu, e ka dimiradu si na kartera bu tinha so sen merés.

PIREKIS – Paké ki N kre sai ku dinheru txeu? N ka sa ta bai kunpra kasa, nen karu, nen paga algen pa vota na mi.

VERGINHA (na gozu) – Sima ki kel últimu li e si mé.

PIREKIS – Bu pode bai prizenta bu kexa, si bu kre, mas ka bu konta ku mi pa sirbi-u di testemunha.

VERGINHA – Ok. N ta sirbi-u di divogadu di bórla. Sta fixi?

Pirex ta ri ta bai da Verginha un anbrasu pertadu.

ENPREGADA – Ladrão que rouba o outro ladrão, tem sete anos de perdão.