Colunista

Di tudu mar  fundu  o furna

ku nos nomi flor di bruma

seleson tudu dja nu ká ruma

bira bodona dja nu kustuma

ale-nu argedu na stribu di paxon

ale-nu sustedu na son di bonbolon

boita grandi ka no di un dia

rufu rixu el ten pabia

esuatin nu kume-s na fin

angola nu da-s badju bola

camarões na ses bandola

nu dexa so simenti binbirin

inda ten líbia ki nu manda

síbia  i nu fla-s ma nos e ka

fidju nofrájiu nen di seka

k’inda e kastigu pa es nos banda

mas ku nos nomi tubaron

ku nos fomi di kume txon

pa riba nos ka ten mondon

gritu konkista e nos refron

nos e di txada  di sala  i di salon

nos e raiu  strondu  furakon

alma berdi ban di imuson

tenpra-nu gana  firma-nu don

i si tudu tenpu e tenpu bira bon

i nos fibra e tal lava di vulkon

si len di mundu e ka más ki txon

nton nu afirma na skala tudu ton

futida gosi e stória dun bes

kanafradus dja nu skese des

si ta fladu ma ka ten dos sen tres

anos e kel onzi k'e bon pa es

ka da di-banda  firma ku getu

sopru di glória dja intxi-nu petu

li na nos txon nos ki ta manda

ka ten mondon ki al po-nu kanga

npos kes otu tudu dja nu poi di banda

strada di glória ale-nu nel ta anda

méxiku merka kanadá ti txiga final

e nos  e nos propi k’e tubaron di kanal

alias ka di kanal mas di kauberdi

ki ka ta funda  nen ka ta perde

mas ta navega pa tudu orizonti

desdi es txon k’e nos bon fonti